Deuteronome 20 - Tshwa Bible

¹ Loku wena u hloma yimpi ku yalwa ni valala va wena, loku u wona mahaxi ni tikareta ni vanhu vo tala ku hunza wena, u nga va chavi; hakuva Jehova Nungungulu wa wena i zinwe na wena, yena loyi a ku humesileko tikweni ga le Gipite.

² Loku mu longile a kuya yimpini, a mupristi i tata mahlweni a ta wulawula ka vanhu, aku:

³ Ingisa Israeli! Mu longile inyamutlha a kulwa ni valala va nwina! A timbilu ta nwina ti nga mbheli ntamu, mu nga chavi, mu nga rurumeli, hambu ni ku dzukiswa ha vona;

⁴ hakuva Jehova Nungungulu wa nwina i famba zinwe na nwina ku mu lwela ka valala va nwina ni ku mu nyika kuhlula.

⁵ Zonake a tinduna ti ta wulawula ka vanhu, tiku ngalo: Himani a akileko a yindlu yiswa, kanilezi a nga se nga yi nyikelisisa ke? A tlhele a famba kaya kakwe, ku nga taku a yafa le yimpini, zonake a munwani a ya yi teka a yi nyikelisisa.

⁶ Himani a byalileko a xivina, kanilezi a nga se ngaga mihanzu ya xona ke? A tlhele a famba kabye, ku nga taku a yafa le yimpini, zonake munwani a sala aga mihanzu ya xona.

⁷ Himani a wutileko a nhwana, kanilezi a nga se nga mu teka ke? A tlhele a famba kaya kabye, ku nga taku a yafa le yimpini, zonake munwani a sala a mu teka.

⁸ Ni tinduna ti ta simamisa ti wulawula kambe ka vanhu, tiku ngalo: Himani a chavako, a tsemekileko hlana ke? A tlhele a famba kaya kabye, ku nga taku a timbilu ta vamakabye ti nyeka khwatsi hi ya yena mbilu. Vala. 7:3

⁹ Zonake loku a tinduna ti mbhetile ku wulawula ka vanhu, va ta yimisa tinduna ta mabutho to rangela vanhu.

¹⁰ Loku u chikela kusuhani ni muti a kuva u wu hlasela, u ta wu kombela hi kurula.

¹¹ Loku wona wu ku hlamula hi kurula, va ku vulela tontlhe tinyangwa, vontlhe vanhu lavo va nga ka wona va tava mahlonga ya wena, va ku tirela xibalu.

¹² Kanilezi loku va nga zwanani na wena, va lava kulwa na wena, u ta wu vimbezela.

¹³ Loku Jehova Nungungulu wa wena a wu nyikele canjeni ga wena, zonake wena u ta hlasela vontlhe vavanuna ni tlhari.

¹⁴ Kanilezi a vavasati ni vanana, ni zifuyo ni zontlhe lezi zi nga lomo mutini, a muphango wontihe wa kona, u ta wu teka wu maha wa wena, uga a muphango wa valala va wena, lowu Jehova Nungungulu wa wena a ku nyikileko.

¹⁵ U ta mahisa zalezo ka yontlhe miti leyi yi nga kule na wena, leyi yi nga hiko miti ya lawa matiko.

¹⁶ Kasike loku yi hi miti ya matiko lawa Jehova Nungungulu wa wena a ku nyikileko a kuva tshomba ya wena, u nga siyi hambu ni munhu munwe wa ku hanya. Ekso. 23:32; Jox. 10:40; 11:11

¹⁷ U ta lovisa bhi a vaHiti, ni vaAmori, ni vaKanani, ni vaPerezi, ni vaHivi, ni vajebusi, khwatsi hi lezi Jehova Nungungulu wa wena a ku leleteleko.

¹⁸ Kasi ku fela ku kala va nga mu gonzisi a ku maha wontihe manyala lawa vona va mahelako vanungungulu vabye, nwinawu mu onha ka Jehova Nungungulu wa nwina.

¹⁹ Loku mu vimbezela xikhati xo leha a muti lowu mu lavako ku wu wutla, u nga tsemeleli tisinya hi xihloka; hakuva xinwani xikhati mu taga mihanzu ya kona; hikwalaho mu nga ti tsemi, hakuva a sinya ya le masinwini a hi munhu loyi a fanelweko ku vimbezelwa.

²⁰ Kanilezi a tisinya leti u ti tivako ku ngalo a ti giwi, u ta ti tsema u tira ha tona a mitiro ya ku vimbezela a muti lowu u lwako nawo, kala u wu hlula.