Deuteronome 2 - Tshwa Bible

¹ Zonake loku hi tlhelile hiya xiwuleni hi ndlela ya Bimbi go Pswhuka, khwatsi hi lezi Jehova a wulileko ka mina, hi lo renzelekela masiku yo tala xitsunga xa Seire. Mitse. 14:25; 21:4; Deut. 1:40; Vala. 11:18

² Zonake Jehova i lo wulawula ka mina, aku:

³ Nwina mu renzelekele xitsunga lexi masiku yo tala; fambani makunu le Nwalungu.

⁴ U ta leletela vanhu, uku: Mu ta tsemakanya a tiko ga vamakabye va nwina, a vanana va Esau, lava va akileko Seire; na vona va ta mu chava. Kanilezi ti woneleni,

⁵ mu nga holovi navo, hakuva cima nzi nga ta mu nyika nchumu lomu tikweni gabye, hambu ni laho mu ta nga kanzihela hi nkonzo wa nwina, hakuva a xitsunga xa Seire nzi nyikile Esau a ku maha tshomba yakwe. Gen. 36:8

⁶ Nwina mu ta xava zakuga kabye hi mali, mu rihela ni mati lawa mu ta nganwa.

⁷ Hakuva Jehova Nungungulu wa wena, i ku katekisile mitirweni yontlhe ya canja ga wena; i tivile kufamba ka wena le xiwuleni lexi xa hombe. Lomu ka 40 wa malembe, Jehova Nungungulu wa wena i wa hi zinwe na wena; a ku vumalangi nchumu.

⁸ Zonake hi lo hunza, hi va siya tlhelweni vamakabye va hina, a vanana va Esau, lava va akileko Seire, hi ndlela ya nzhelelo wa le Elate ni Ezioni-Gebera. Zonake hi lo hunza hi ndlela ya xiwula xa Moabi.

⁹ Jehova i te ngalo ka mina: U nga dzuki u vuka vaMoabi ulwa navo, hakuva cima nzi nga ta ku nyika nchumu xa tiko gabye, hakuva a tiko ga Ara nzi nyikile a vanana va Loti a kuva gi maha tshomba yabye.

¹⁰ (VaEmima va wa akile lomo kale, gi wa hi tiko ga hombe, gi nga hi ni vanhu vo tala na va zimukile kota va ka Anake.

¹¹ Ku ambiwa lezaku vonawu mbaRefaime, zinwe ni vaAnake, kanilezi a vaMoabi va va vitana lezaku mbaEmima.

¹² A kale a Seire gi wa akilwe hi vaHori, kanilezi a vanana va Esau va lo ta va wutlela a tiko lego, va va hlasela, zonake va aka matshanwini yabye kota lezi zi mahilweko hi vaIsraeli a tikweni legi Jehova a va nyikileko lezaku giva gabye.)

¹³ Makunu sukani, mu tlhatuka xicongwana xa Zerede. Zonake hi lo tlhatuka xicongwana xa Zerede.

¹⁴ A masiku lawa hi nga famba kusukela Kadexe-Barnea kala a siku legi hi nga tlhatuka xicongwana xa Zerede ma wa hi 38 wa malembe, kala ku mbhela vontlhe vavanuna lomu wugovelweni va hlomako yimpi, kota lezi Jehova a hlambanyileko.

¹⁵ Hakuva a canja ga Jehova gi wa hi hehla kabye, ku va tshikelela lomu wugovelweni va kala va mbhela.

¹⁶ Laha na ku mbhelile tinhenha tontlhe xikari ka vanhu,

¹⁷ Jehova i lo wulawula ka mina, aku:

¹⁸ Inyamutlha u ta tsemakanya Ara, a mbhinganwini wa Moabi.

¹⁹ U ta chikela ka vanana va ka Amoni. Kanilezi u nga va vukeli ulwa navo, hakuva cima nzi nga ta ku nyika nchumu xa tiko ga vanana va ka Amoni xi maha xa wena, hakuva nzi gi nyikile ka vanana va ka Loti lezaku gi maha gabye. Gen. 19:38; Vala. 11:15

²⁰ (Gonawu tiko legi gi wa hi tiko ga vaRefaime. A vaRefaime va wa akile ka gona kale loko; ni va ka Amoni va va vitana ku ngalo mbaZamzumima.

²¹ Gi wa hi tiko ga hombe ga vanhu vo tala na va zimukile kota vaAnake; kanilezi Jehova i lo va lovisa mahiweni ka va ka Amoni, zonake va teka a tiko gabye, na vona va akile matshanwini ya vona,

²² kota lezi Jehova a nga mahela a vanana va ka Esau lava va akileko le Seire, i lo lovisa vaHori mahlweni ka vanana va ka Esau, zonake va teka tiko gabye, va aka matshanwini ya vona kala nyamutlha lezi.

²³ Ni maAvima, lava va akileko zimutaneni kala le Gaza, va lovisilwe hi vaKaftori, lava va nga huma le Kaftori, va aka matshanwini yabye.)

²⁴ Sukani mu famba, muya tlhatuka xicongwana xa Amoni. Languta, nzi nyikele canjeni ga wena Sihoni a muAmori, a hosi ya Hexboni, zinwe ni tiko gakwe. Fambani mu yalwa naye mu teka a tiko gakwe.

²⁵ Inyamutlha nzi ta sangula ku chavisa ni ku dzukisa ha wena a matiko wontihe lawa ma nga lahasi ka tilo. Ma ta rurumela ma mbhela ntamu mahlweni ka wena, laha va ta ngazwa a wudumo ga wena. Ekso. 23:27; Deut. 11:25

²⁶ Laha hi nga wa hi xiwuleni xa Kedemote, nzi lo rumela a mitsumi ka Sihoni, a hosi ya le Hexboni, ni magezu ya kurula, nziku:

²⁷ Nzi vumele nzi tsemakanya a tiko ga wena. Nzi ta famba hi ruwa, cima nzi nga ta hambuka xineneni ge hambu xibhabheni.

²⁸ U ta nzi xavisela a zakuga za wena ni mati lawa nzi ta nganwa; nzi kala nzi tsemakanya hi milenge ya mina basi;

²⁹ kota a vanana va ka Esau lava va akileko le Seire, ni va ka Moabi lava va akileko le Ara, va nzi vumeleko kala nzi tlhatuka Jordani nzi enghena ka tiko legi Jehova Nungungulu wa hina a hi nyikileko gona.

³⁰ Kanilezi Sihoni a hosi ya Hexboni i lo ala a kuva hi tsemakanya kontlhe lomo, hakuva Jehova Nungungulu wa wena i nonohisile a mbilu yakwe, kasi a fela ku mu nyikela canjeni ga wena kota lezi zi mahekileko.

³¹ Jehova i te ngalo ka mina: Languta, nzi sangule ku nyikela Sihoni ni tiko gakwe mahlweni ka wena. Sangula ku gi khozisa, kasi a tiko gakwe giva tshomba ya wena.

³² Zonake Sihoni i lo ta tlhangana na hina na hi ni vanhu vakwe vontlhe a ku talwa le Jahaza.

³³ Kanilezi Jehova Nungungulu wa hina i lo mu nyikela mahlweni ka hina, hi mu hlula zinwe ni vana vakwe ni vontlhe vanhu vakwe.

³⁴ Ka xona xikhati lexo hi lo teka yontlhe miti yabye, hi yi hahlula, hi hihirita vavanuna ni vavasati ni vanana, ku nga sali ni munwe.

³⁵ Ntsena hi phangile zifuyo, ni muphango wa miti leyi hi yi tekileko.

³⁶ Kusukela le Aroera kusuhani ni nkova wa Amoni, ni muti lowu wu nga laha xikari ka nkova, kala le Gileade, ku wa hi hava a muti wu nga wa yimelana na hina; hakuva Jehova Nungungulu wa hina i lo yi nyikela yontlhe mandleni ya hina.

³⁷ Kanilezi a hi chikelangi ka tiko ga vanana va ka Amoni, gontlhe legi gi nga mbhirini wa congo wa Jaboke, hambu loku ku hi miti ya le xitsungeni, ni ka zontlhe lezi Jehova Nungungulu wa hina a hi tsimbeteleko.