Deuteronome 19 - Tshwa Bible

¹ Laha Jehova Nungungulu wa wena a ta nga lovisa a matiko lawo Jehova Nungungulu wa wena a ku nyikileko tiko ga wona ku gi fumela, laha u ta nga va hlasela u va wutlela zabye, ni loku u akile lomu mitini yabye ni lomu tindlwini tabye, Ekso. 21:15; Jox. 20:2

² wena u ta ti pambulela miti minharu u yi yimisa xikari ka tiko ga wena legi Jehova Nungungulu wa nwina a ku nyikileko ku gi fumela.

³ U ta basisa a tindlela ta kona, ni ku panza mbhingano ku maha zipanze zinharu lomu ka tiko legi Jehova Nungungulu wa wena a ku nyikileko lezaku giva tshomba ya wena; kasi ni wihi mudayi a fela ku chavela kona.

⁴ A mhaka ya mudayi loyi a ta nga chavela leyo kasi a fela ku hanya hi leyi: Loye a dayako wakelane wakwe hi mhango, na a nga mu vengangi ka masiku ma hunzileko;

⁵ khwatsi hi loku a munhu a famba khwatini ni wakelane wakwe, a ku ya tsema tihunyi, ni canja gakwe gi tlakusa xihloka ku tsema sinya, ni xihloka xi kunuka lomu ka mbhinyi xiya tsema wakelane wakwe, afa. A munhu loye i ta tsutsumela ka munwe wa leyi miti, a hanya.

⁶ Ku nga taku a muphoteli wa nkhata a mu lanza zangeni yakwe, a mu kuma laha ndleleni loku a pfhuka wu lehile, a mu daya, na kasi lezo i wa nga fanelangi ku dawa, hilezi i wa nga mu vengi wakelane wakwe ka masiku ma hunzileko.

⁷ Hikwalaho nza ku laya lezaku u ti pambulela miti minharu.

⁸ Ni laha Jehova Nungungulu wa wena a ta nga enzelekisa a tiko ga wena, khwatsi hi lezi a hlambanyileko ka vararu va wena, ni ku ku nyika gontlhe tiko a nga wula ku ngalo i ta gi nyika vararu va wena;

⁹ hakuva loku hakunene u hlayisa yontlhe milayo leyi nzi ku leletelako inyamutlha, na u kari u ranza Jehova Nungungulu wa wena, u famba hi tindlela takwe wontihe masiku, zonake u ta engetela yinwani miti minharu ka leyi ya minharu;

¹⁰ kasi ku nga halatwi a nkhata wu nga hava nanzu a tikweni legi Jehova Nungungulu wa wena a ku nyikileko a kuva a tshomba ya wena, ni lezaku u nga dzuki uva ni nanzu wa nkhata.

¹¹ Kasike loku munhu ku hi ku venga wakelane wakwe, a mu xiyelela, a mu vukela a mu daya, zonake a tsutsumela ka munwe wa miti leyi,

¹² a masingalakati ya lowo muti ma ta rumela vanhu kuya teka loye munhu, va ta mu nyikela mandleni ya muphoteli wa nkhata kasi a fela kufawu. Gen. 9:6; Ekso. 21:12, 14

¹³ U nga mu nyenyeleteli, kanilezi u ta susa a kuhalatwa ka nkhata wu nga hiko na nanzu lomu ka Israeli, kasi wa fela ku tshameka.

¹⁴ U nga rurisi a mbhingano wa wakelane wa wena, lowu vahombe va nwina va nga wu panza lomu ka tshomba leyi u ta ngaya yi kuma le tikweni legi Jehova Nungungulu wa wena a ku nyikileko kuya gi fumela.

¹⁵ A munhu munwe a nga ringani ku maha kustumunyu wa kuonha ka munhu, hambu loku a lo maha xionho xa lihi lixaka; a timhaka ti ta tiyiswa hi vakustumunyu vambiri kutani vanharu. Mat. 18:16; 2 Kor. 13:1; Maheb. 10:28

¹⁶ Loku a kustumunyu wa mawunwa a lumbeta munhu hi ximaho xo biha,

¹⁷ zonake a vanhu lavo vambiri va holovisanako va ta ya yima mahlweni ka Jehova, ni mahlweni ka vapristi ni Valamuli lavo va ta ngava kona lawo masiku.

¹⁸ Ni Valamuli va ta hlolisisa a zinene za mhaka leyo, zonake loku a kustumunyu loye a kustumunyile wunwa, a hembela wakelane wakwe,

¹⁹ zonake mu ta mu maha lezi a nga wa lava lezaku zi mahiwa ka wakelane wakwe, mu susa kubiha xikari ka nwina.

²⁰ Kasi vanwani va fela ku zizwa, zonake va chava, va nga ha engeti kambe va maha kubiha ko kota loko xikari ka nwina.

²¹ A tihlo ga wena gi nga mu tsetsi; a wutomi gi ta rihiwa hi wutomi, a tihlo hi tihlo, a tino hi tino, a woko hi woko, a nenge hi nenge. Ekso. 21:23; Mat. 5:38