Deuteronome 17 - Tshwa Bible

¹ U nga mu tlhaveli Jehova Nungungulu wa wena a xifuyo xa hombe, hambu xa xitsongwani lexi xi nga ni bawa kutani mbulema, hakuva lezo za yila nguvu mahlweni ka Jehova Nungungulu wa wena.

² Loku a hi kona munhu ka munwe wa miti leyi Jehova Nungungulu wa wena a ku nyikileko yona, kutani ngwanuna, kutani ngwasati, a mahako kubiha mahlweni ka Jehova Nungungulu wa wena hi ku hambunyeta xivumelwano xa yena,

³ a khozela vanwani vanungungulu, a khizama mahlweni ka vona, kutani mahlweni ka gambo ni ka hweti, kutani hi ka handla gontlhe ga tilo, lezi mina nzi nga leletelangiko,

⁴ loku a mhaka leyo yi bikilwe ka wena, ni loku u yi zwile, u ta yi wutisisa khwatsi; zonake loku a mhaka yi hi yona, na yi bikilwe, na xionho xa kunghaho xi mahilwe lomu ka vaIsraeli;

⁵ zonake wena u ta humesa loye wanuna kutani loye wasati lahandle ka muti, u ta mu gandla hi maribye loye wanuna kutani wasati, afa. Ekso. 22:20

⁶ Yena i ta dawa hi wukustumunyu ga milomu ya vakustumunyu vambiri kutani vanharu, cima a nga na ku dawa hi nomu wa kustumunyu munwe, Mat. 18:16; Joh. 8:17; Maheb. 10:28

⁷ A mandla ya vakustumunyu hi wona ma ta nga ranga ma tlhateka hehla kakwe ku mu daya, zonake ku lanzela a mandla ya vontlhe vanhu. Hi ku maha lezo mu ta susa lezi zo biha xikari ka nwina.

⁸ Loku ku nehiwa timhaka to karata ka wena, na ti hi timhaka ta kudaya, kutani kubangelana, kutani ta timbanga, a timhaka leti ti vuxako mazolonga lomu mitini ya nwina, zonake u ta suka uya ka wutshamu legi Jehova Nungungulu wa wena a ta nga gi hlawula;

⁹ u taya ka vapristi a va ka Levi, ni ka mulamuli loye a ta ngava kona lawo masiku; uya wutisa, zonake va ta ku byela kulamula ka nongameto;

¹⁰ na wena u ta maha khwatsi hi lezi va ta nga ku byelisa zona laho ka wutshamu lego Jehova a ta nga gi hlawula, zonake u maha hi zontlhe lezi va ta nga ku byela zona.

¹¹ U ta maha kota nayo va ta nga ku leletelisa wona, ni laha va lulamisileko mhaka ha kona, u nga tsiki a gezu legi va ku byelileko gona, u hambuka kuya xineneni hambu xibhabheni.

¹² A munhu loye a kanyisako, a nga ingisi mupristi loyi a yimisilweko ku khozela mahlweni ka Jehova Nungungulu wa wena, hambu ku ingisa mulamuli, a munhu loye i tafa. U ta susa lezi zo biha xikari ka vaIsraeli.

¹³ Vontlhe vanhu va fela ku zizwa va chava, va nga ha kanyisi.

¹⁴ Laha u ta nga chikela tikweni legi Jehova Nungungulu wa wena a ku nyikileko gona ku gi fumela ni ku aka ka gona, loku wena u alakanya ku ngalo: Nzi lava ku ti yimisela hosi, kota manwani matiko lawa ma nzi ranzelekeleko; 1 Sam. 8:5

¹⁵ hi zona, wena u ta ti yimisela a hosi leyi Jehova Nungungulu wa wena a ta nga yi hlawula. U ta teka munwe xikari ka vamakabye va wena, u mu yimisa a kuva hosi hehla ka nwina; kanilezi u nga yimisi a wamatiko, loyi a nga hiko munwe wa vamakabye va wena.

¹⁶ Ntsena lezaku a nga ti longiseli a mahaxi yo tala, hambu ku zwanana ni Gipite kasi kuva ni mahaxi yo tala; hakuva Jehova i te ngalo ka nwina: Mu nga ha tlheli kambe muya hi ndlela leyo. 1 Tih. 10:26, 28; Isa. 31:1

¹⁷ Ni kambe a nga teki vasati vo tala, ku nga taku a mbilu yakwe yi hambukiswa; hambu ni ku hlengeletela a nzalama ni siliva yo tala.

¹⁸ Ni laha a ta nga tshama xitshanwini xa wuhosi, yena i ta tsala a nayo lowu lomu ka bhuku, kota lezi wu tsalilweko bhukwini legi gi tshamako ni vapristi va ka Levi.

¹⁹ Yena i ta tshama nago, kasi a fela ku gonza lomu ka gona a masiku wontihe ya kuhanya kakwe, lezaku a gonza ku chava Jehova Nungungulu wakwe, ni ku hlayisa a timhaka ta lowu nayo ni zileletelo za kona, a zi maha;

²⁰ kasi a mbilu yakwe yi nga ti kukumukisi hehla ka vamakabye vakwe, ni lezaku a nga hambuki nayweni, aya tlhelo ga xinene hambu a tlhelo ga xibhabha, kasi yena wa fela ku engetelwa a masiku yakwe lomu mufunweni wakwe, yena ni vana vakwe lomu xikari ka va ka Israeli.