2 Samueli 22 - Tshwa Bible

Davida a dumisa Jehova.

¹ Davida i lo wulawula ka Jehova a timhaka ta leli lisimu, a siku lego a nga poniswa mandleni ya vontlhe valala vakwe, ni mandleni ya Saule, aku:

² Jehova ribye ga mina, ni khokhola ga mina, ni muponisi wa mina! Deut. 32:4

³ Nungungulu wa mina, a ribye ga mina legi nzi chavelako ka gona, A xitlhangu xa mina, ni limhonzo la kuhanya ka mina, Ni khokhola ga mina gi tlakukileko, ni wuchavelo ga mina! Muhlanguti wa mina, u nzi hanyisako ka lava va nzi hlokisako. Lu. 1:69; Maheb. 2:13

⁴ Nzi vitanile nziku: A bongiwe Jehova! Na mina nza hlangutwa valaleni va mina.

⁵ Hakuva a mabyandlati ya lufu ma nzi ranzele, A ntalo wa kubiha wu nzi dzukisile;

⁶ A tingoti ta Xeoli ti wa nzi bohile, Ni maziyo ya kufa ma wa nzi phasile.

⁷ Lomu tikhuruxwini ta mina nzi lo vitana Jehova, Ina, nzi lo rilela ka Nungungulu wa mina; Na yena i zwile a gezu ga mina na hi lomu tempeleni yakwe; Ni kurila ka mina ku lo chikela tindleveni takwe. Tis. 3:5; Jona 2:3

⁸ Zonake a misava yi lo tsekatseka yi rurumela, Ni ziseketelo za tilo zi lo ninginizwa, Zi tsekatsekiswa hakuva yena i wa zangarile.

⁹ Ku lo tuvika musi wu huma hi lomu tinhovini takwe, Ni nzilo wu lovisako wu lo huma hi lomu kanwini kakwe; Ku lo huma ni makhala ma vurako. Ekso. 19:18; Deut. 4:24

¹⁰ Yena i andlele a matilo a chika; Ni munyama wu wa hi lahasi ka mikonzo yakwe.

¹¹ I lo khilela hehla ka kerubima a puruma, Yena i lo woneka na hi tipapeni ta mheho.

¹² I lo ti ranzela hi munyama, wu maha a tenda gakwe, A tsombanyisa mati yo tala ni marefu ya munyama.

¹³ A kungangamela loku ku nga hi le mahlweni kakwe, Ku lo vurisa a makhala.

¹⁴ Jehova i lo dzinza na hi le tilweni, Loyi a nga Hehla-hehla a zwata a gezu gakwe.

¹⁵ A phanda miseve yakwe, a hangalasa valala va mina ha yona, A humesa lihati, a va chavisa.

¹⁶ A kueta ka bimbi ku lo wonekeliswa kubaseni, A ziseketelo za misava zi lo funungulwa ziku dlunya, Hi kukawuka ka Jehova, Hi bhubhutsa ga zanga yakwe.

¹⁷ A nawuluta a canja gakwe na hi le hehla, a nzi khoma, A nzi humesa lomu matini ya hombe;

¹⁸ A nzi tlhatlhisa ka nala wa mina wa ntamu, Ni ka lava va nzi vengako, hakuva va wa nzi hlula.

¹⁹ Va lo nzi vimbezela a siku legi nzi nga hi khombyeni; Kanilezi Jehova a maha xiseketelo xa mina.

²⁰ A nzi humesa laha kubaseni; A nzi tlhatlhisa hakuva i nzi ranzile.

²¹ Jehova i nzi chachazele khwatsi hi kululama ka mina, Kambe i nzi tlhelisele khwatsi hi kubasa ka mandla ya mina. Joba 22:30; Tis. 17:1

²² Hakuva mina nzi hlayisile tindlela ta Jehova, A nzi hambunyetangi ka Nungungulu wa mina.

²³ Kakuva zontlhe zileletelo zakwe zi wa hi le mahlweni ka mina, Ni kambe mina a nzi fularelangi milayo yakwe.

²⁴ Nzi wa nga hi na xisolo mahlweni ka yena, Nzi ti hlayisile kasi nzi nga kumi nanzu.

²⁵ Hikwalaho Jehova i nzi chachazele khwatsi hi kululama ka mina, Khwatsi hi kubasa ka mina mahlweni ka yena.

²⁶ A munhu wa wuxinji u mu mahela wuxinji, Loyi a mbheleleko u mu mahela kululama.

²⁷ Loyi a basileko u mu kombisa kubasa ka wena, Kanilezi a wa kubiha u mu chachazela hi kubiha kakwe.

²⁸ Wena u ponisa a vanhu lava va nga khombyeni, Kanilezi wena u koramisa a mahlo ya lava va ti kukumukisako. Dan. 4:34; Lu. 1:51

²⁹ Hakuva wena Jehova u kandiya ya mina, Na Jehova i ta woninga munyama wa mina.

³⁰ Hakuva loku nzi hi na wena nza tsutsuma hehla ka valala, Hi Nungungulu wa mina nzi tlula makhurisi.

³¹ A ndlela ya Nungungulu yi lulamile, A gezu ga Jehova gi basile; Yena xitlhangu xa vontlhe lava va tsutsumelako ka yena.

³² Himani Nungungulu, ahandle ka Jehova ke? Himani a nga ribye, ahandle ka Nungungulu wa hina ke?

³³ Nungungulu hi khokhola ga mina gi tiyileko, Yena i nzi rangele ndleleni yi lulamileko.

³⁴ I mahile mikonzo ya mina yi fanana ni ya pswele ga mhuti: I nzi vekile hehla ka xitsunga xa mina.

³⁵ I gonzisile a mandla ya mina a kulwa; Kasi a woko ga mina ga zi kota ku kwaya a wura ga suku.

³⁶ Wena u nzi nyikile a xitlhangu xa kuhanyisa ka wena, A wunene ga wena gi nzi kulisile.

³⁷ Wena u anamisile a ndlela lahasi ka mikonzo ya mina, A mikonzo ya mina a yi retemukangi.

³⁸ Nzi hlasele a valala va mina nzi va lovisa, A nzi tlhelangi na nzi nga se va mbheta.

³⁹ Nzi va hetisile nzi va kanzihela, va tsanzeka ni ku nzi vukela; Ina, va wile lahasi ka mikonzo ya mina.

⁴⁰ Hakuva u nzi bohile hi bhandi ga ntamu ga yimpi, U nzi khozisele lava va nzi vukeleko.

⁴¹ Wena u nzi hlongolele valala va mina, Kasi nza fela ku lovisa lava va nzi vengako.

⁴² Va lo languta, kanilezi ku wa nga hi na munhu wa ku va hlanguta. Va rila ka Jehova, kanilezi a nga va hlamulangi. Joh. 9:31

⁴³ Nzi va silile khwatsi hi ntshuri wa misava, Nzi va pswhinya, nzi va kanzihela khwatsi hi nzhope ya laha ndleleni.

⁴⁴ Wena u nzi tlhatlhisile a kukanetisaneni ka vanhu va mina; U nzi yimisile a kuva hosi ya vamatiko; Ni vanhu lava nzi nga kala nzi nga va tivi va nzi khozela.

⁴⁵ A vamatiko va khoza ka mina, Hi xikhanzakanya xa lezi va zwako ha mina, va ti koramisa.

⁴⁶ A vamatiko va na ni gome, Va rurumela loku va huma lomu makhokholeni yabye.

⁴⁷ Jehova wa hanya! A gi dumiswe a ribye ga mina! A kuliswe Nungungulu, a nga ribye ga kuhanyisa ka mina!

⁴⁸ Nungungulu loyi a nzi photelako, Loyi a nzi khoziselako a matiko;

⁴⁹ Loyi a nzi lwelako ka valala va mina. U rizi tlakusile nziva hehla ka lava va nzi vukelako; U nzi ponisile ka wanuna wo leva.

⁵⁰ Hikwalaho, O Jehova, nzi ta ku bonga xikari ka vamatiko, Nzi yimbelela tisimu ta ku dumisa a vito ga wena. Rom. 15:9

⁵¹ Yena i ponisile a hosi yakwe hi kuhanyisa ka hombe, A kombisa wuxinji ka a totilweko wakwe, Ka Davida ni ka pswalo wakwe kala kupinzuka.