2 Samueli 17 - Tshwa Bible

Huxai a onha a xikungo xa Ahitofeli.

¹ Ahitofeli i te ngalo ka Absalome: Nzi vumele nzi hlawula 12,000 wa vavanuna, nzi lanza Davida wusiku legi.

² Nzi ta ya mu kuma na karele, na hi ni gome, nzi ta ya mu dzuxa, zonake vontlhe vanhu lava a nga navo va ta tsutsuma. Nzi ta daya hosi yoce.

³ Zonake nzi ta tlhelisa a vanhu vontlhe; a vanhu vontlhe va tava kuruleni.

⁴ A gezu lego gi lo xalalisa Absalome ni wontihe masingalakati ya ka Israeli.

⁵ Kanilezi Absalome i te ngalo: Vitanani Huxai a muArke, kasi hi fela ku ta zwawu a gezu gakwe.

⁶ Zonake Huxai i lota ka Absalome. Absalome aku kakwe: Ahitofeli i wulile lezi ni lezi; xana hi ta maha lezo a wulileko ke? Loku zi nge ngaho, wula za wena!

⁷ Huxai i te ngalo ka Absalome: Inyamutlha a xikungo xa Ahitofeli a xi sasekangi.

⁸ Huxai i lo engeta aku: Wena wa gi tiva wunhenha ga raru wa wena ni ga vanhu lava a nga navo; va leva ku fana ni urso gi lahlekelweko hi vanana va gona lomu khwatini; ni kambe a raru wa wena munhu wa yimpi, a nga tshami ni wusiku laha vanhwini,

⁹ Languta, yena i fihlele makunu ka rinzi go kari, kutani ka wutshamu go kari; ku taku loku vanwani va dawa, a mahungu ma zwala, yaku ngalo: A vanhu lava va lanzelako Absalome va hlulilwe.

¹⁰ Lahoke hambu wanuna loyi wa wunhenha ga hombe, ni loyi a nga ni mbilu yo kota ya nghala, i ta rurumela a chava, hakuva vontlhe va ka Israeli va zi tiva lezaku a raru wa wena i nghwazi, ni lezaku vontlhe vavanuna lava va mu lanzelako tinhenha.

¹¹ Hikwalaho a ga mina gezu hi legi: vontlhe va ka Israeli ngha va tsombana ka wena, kusukela Dani kala le Berexeba, vava vanyingi ku fanana ni seke ga bimbi. Ni lezaku wena wutsumbu u yawu kulweni. Vala. 20:1

¹² Kasi hina hi fela ku ya mu kuma kani hi kwihi laho a nga kona, hi mu pomela khwatsi hi nzhokati loku yiwa laha misaveni, kasi ku nga poni ni munhu munwe, hambu yena wutsumbu.

¹³ Loku yena a chavela ka wunwani muti, vontlhe va ka Israeli va ta neha tingoti ka muti lowo, hi wu kokela lomu Congweni, ku nga sali ni ribye ginwe ka wona.

¹⁴ Absalome ni vontlhe vavanuna va ka Israeli va te ngalo: A xikungo xa Huxai a muArke xi sasekile ku hunza xa Ahitofeli. Hakuva Jehova i wa xuvile ku chipisa a xikungo xa xinene xa Ahitofeli, kasi a khombo ga wela Absalome. Joba 5:12

¹⁵ Zonake Huxai i te ngalo ka Zadoke na Abiatari: Ahitofeli i wulile lezi ni lezi ka Absalome ni ka masingalakati ya ka Israeli, kanilezi mina nzi wulile lezi ni lezi.

¹⁶ Makunu rumeleni mhaka ka Davida hi kuhatlisa, muku: A wusiku legi u nga tshami lomu kusuhani ni mapelo ya xiwula. Famba mahlweni; yi nga ta lobyiswa hosi ni vontlhe vanhu lava yi nga navo.

¹⁷ Makunu Jonatani na Ahimaza va wa tshama hi le Enrogeli, kanilezi a nanza ga xisati gi wa tolovela kuya gi ya va byela timhaka toya ka Davida, hakuva va wa chava ku ti wonekelisa le mutini.

¹⁸ Hambu lezo va lo wonwa hi jaha, gi su ya byela Absalome. Kanilezi vona hi wumbiri gabye va lo suka hi kuhatlisa vaya ndlwini ya munhu wa Bahurima, loyi a nga wa hi ni hlowo yo eta laha mutini wakwe, va ya relela lomu nzeni ka yona.

¹⁹ A wasati i lo teka xifenengeto a fenengeta a nomu wa hlowo, a aneka mavele ma kanzilweko hehla ka yona, kasi ku nga woneki nchumu. Jox. 2:4, 6

²⁰ A malanza ya Absalome ma lota le ndlwini ya wasati, ma taku: I kwihi Ahimaza na Jonatani? A wasati aku kabye: Va tlhatukile xicongwana. Loku va va lavile va nga va kumi, va lo tlhelela Jerusalema.

²¹ Anzhako na va sukile va famba, Ahimaza na Jonatani va lo huma lomu hlobyeni va famba va ya byela hosi Davida, vaku: Sukani mu hatlisa mu tlhatuka congo, hakuva Ahitofeli i mahile xikungo xo mu vukela.

²² Zonake Davida ni vontlhe lava a nga hi navo, va lo suka va tlhatuka Jordani; gi te gica ni mixo, vontlhe na va mbhelile ku tlhatuka Jordani.

²³ Makunu laha Ahitofeli a nga wona lezaku a xikungo xakwe a xi lanzelangi, i lo gabhatsela a mbongola yakwe, a suka aya mutini wakwe. Laha na leletele timhaka ta laha ngangweni wakwe, i lo ya ti sunga afa, a lahliwa xilahleni xa raru wakwe.

²⁴ Zonake Davida i lo chikela le Mahanaime. Absalome i lo tlhatuka Jordani ni vontlhe va ka Israeli lava a nga hi navo.

²⁵ Absalome i wa yimisile Amasa a kuva nduna ya yimpi matshanwini ya Joabe. Amasa i wa hi nʼwana wa wanuna loyi a vito gakwe a nga Itara, a muIsraeli, loyi a nga wa tekile Abigaili wa Nahaxi, a makabye wa Zeruia, a nyine wa Joabe.

²⁶ Zonake va ka Israeli na Absalome va lo gova le tikweni ga le Gileade.

²⁷ Makunu laha Davida a nga wa chikele le Mahanaime, Xobi nʼwana Nahaxi wa le Raba, wa vanana va ka Amoni, na Macira nʼwana wa Ammieli wa le Lodebara, na Barzillai a muGileade wa le Rogelima,

²⁸ va lo neha masango ni zinamelo, ni timbita ta wumba, ni mavele, ni sevada, ni mapa, ni mavele ma wocilweko, ni tinyawa, ni tikoxani, ni wuputsu,

²⁹ ni wulombe, ni mawomba, ni tiyivu, ni mulaza wa tihomu, va lo ta zi nyika ka Davida ni vanhu lava a nga wa hi navo vaga; hakuva va waku: A vanhu va na ni ndlala, va karele, kambe vazwa tora lomu xiwuleni.