2 Samueli 13 - Tshwa Bible

Amnoni na Tamara.

¹ Anzhako ka lezo Absalome nʼwana Davida i wa hi ni makabye wa mbhuri, a vito gakwe a nga hi Tamara. Amnoni nʼwana Davida i lo mu ranza.

² Amnoni i lo hlokiswa hi ku mu navela, a kala a babya hi kota ya makabye wakwe Tamara, hakuva i wa nga se nga tiva wanuna; hikwalaho zi wa tsanza ka Amnoni a kuva a maha nchumu kakwe.

³ Kanilezi Amnoni i wa hi ni munghana loyi a vito a nga hi Jonadaba, a nʼwana wa Ximei a nakulobye wa Davida; Jonadaba i wa hi mbyhori ya hombe nguvu.

⁴ Aku ngalo kakwe: Hi kuyini siku ni siku u wonza ku hunza mpimo, wena nʼwana wa hosi ke? Xana a ku zi koti ku nzi byela ke? Amnoni i te ngalo kakwe: Nzo navela Tamara makabye wa Absalome a nakulori.

⁵ Jonadaba aku kakwe: Etlela laha mubhedini wa wena uku khwatsi wo babya; zonake loku a raru wa wena a ta ku wona, u taku kakwe: Nza kombela lezaku makweru Tamara a ta nzi phamela zakuga; i ta zi bhika kwalaha kuwoneni ka mina, nzi ta zi amukela lomu mandleni yakwe.

⁶ Zinghaho Amnoni i lo ya etlela, a ku khwatsi o babya; zonake a hosi yi lo ya mu wona, Amnoni i te ngalo ka hosi: Nza kombela makweru Tamara a ta nzi bhikela zibaba zimbiri kuwoneni ka mina, nzi taga lomu mandleni ya yena.

⁷ Zonake Davida i lo rumela mhaka ka Tamara le ndlwini yabye, yaku: Famba le ndlwini ya nakuloni Amnoni u ya mu longisela zakuga.

⁸ Tamara i loya le ndlwini, a nakulobye Amnoni na a etlele. I lo teka a mapa a ma kanyanga, a maha zibaba kuwoneni kakwe, a zi bhika.

⁹ I lo teka a ngelo a zi nukula kuwoneni kakwe; kanilezi yena i lo ala kuga. Zonake Amnoni i te ngalo: Humesa vontlhe lava vanhu va nga laha ka mina. Zalezo vontlhe lava va nga wa hi lomo ndlwini va lo huma lahandle.

¹⁰ Amnoni aku ka Tamara: Neha zakuga seno kwarutwini, kasi nza fela ku ta gela lomu mandleni ya wena. Tamara i lo teka zibaba lezi a zi mahileko a zi neha ka nakulobye Amnoni lomu kwarutwini.

¹¹ Laha a nga wa mu phamele zakuga, yena i lo mu khoma, aku kakwe: Ngone makweru u ta etlela na mina.

¹² Yena i te ngalo: A hi zona makweru, u nga nzi wisi tingana, hakuva lezo a zi na ku maheka lomu ka Israeli; u nga mahi manyala ya ku nghahi! Levi 18:9; 20:17; Deut. 27:22

¹³ Mina, nzi ta ti rwala kwihi a tingana ta mina ke? Hambu wena u ta fanana ni munwe wa zipumbu xikari ka Israeli. Kanilezi wulawula ni hosi, a nga ta nzi beletela ku tekiwa hi wena.

¹⁴ Kanilezi yena a nga lavangi ku ingisa a gezu gakwe; i lo mu kurumeta hi ntamu, a mu onha, a etlela naye.

¹⁵ Zonake Amnoni i lo mu venga hi livengo la hombe nguvu, hakuva a livengo leli a nga wa mu venga ha lona li wa hunza liranzo leli a nga wa mu ranza ha lona. Amnoni i te ngalo kakwe: Susa u famba!

¹⁶ Yena i lo hlamula, aku: U nga mahi kubiha ku hunzako loku kunwani u nzi maheleko, uya hi ku nzi hlongola.

¹⁷ Kanilezi yena i lo ala ku mu ingisa; zonake i lo vitana a nanza legi gi nga wa mu tirela, aku ka gona: Humesa loyi wasati, u khotsa livati.

¹⁸ Yena i wa hi ni nguwo ya mavalavala, hakuva a vanhanyana va hosi va wa ambala a tinguwo to maha lezo. Zonake a nanza ga Amnoni gi lo mu humesa lahandle, a tlhela a ta khotsa livati.

¹⁹ Tamara i lo teka a khuma a ti chela hlokweni yakwe, a hanzula a nguwo yakwe ya mavalavala a nga wa yi ambele, a rwala mawoko yakwe laha hlokweni, a suka a famba na a kari g rila. Joba 2:12; Jer. 2:37

²⁰ A nakulobye Absalome i te ngalo kakwe: Kasi a hi nakuloni Amnoni a nga hi na wena ke? Makunu miyela, makweru. Yena i nakuloni, u nga bayiseki mbilu hi mhaka leyo. Zinghaho Tamara i lo tshama lomu ndlwini ya nakulobye Absalome na hi hlomulweni.

²¹ Makunu laha hosi Davida a nga zwile tontlhe leto timhaka, i lo zangara nguvu.

²² Kanilezi Absalome a nga wulangi nchumu xo biha hambu xo saseka ka Amnoni, hakuva Absalome i lo venga Amnoni hi lezi a nga onha makabye wakwe Tamara.

²³ Makunu na ku hunzile malembe mambiri, Absalome i wa hi ni vakayi vakwe le Baal-Hazora, kusuhani ni le Efraime. Absalome i lo ramba vontlhe vafana va hosi.

²⁴ Absalome i loya ka hosi, a yaku: Langutana nanza ga wena gi na ni vakayi va gona, makunu nza kombela a hosi ni malanza yakwe lezaku va famba zinwe ni nanza ga yena.

²⁵ A hosi yi te ngalo ka Absalome: Ahihi, nwananga, a hi na ku zi kota ku famba hontlhe, hi nga ta ya maha nzhwalo ka wena. Absalome i lo mu kurumeta, kanilezi Davida i lo ala ku famba, kanilezi i lo mu katekisa.

²⁶ Zonake Absalome i te ngalo: Kanilezi loku u tsanzeka wena, nza kombela lezaku nzi famba ni nakulori Amnoni. A hosi yiku: Kasi ku fela kuyini?

²⁷ Kanilezi Absalome i lo mu kurumeta, kala a vumela Amnoni ni vontlhe vafana va hosi a ku famba zinwe naye.

²⁸ Absalome i lo leletela malanza yakwe, aku: Xiyisisani khwatsi, a xikhati lexi a mbilu ya Amnoni yi tangeleko hi vinya, ni loku nziku ka nwina: Dayani Amnoni! Dayani futsi. Mu nga mu chavi! Ma zizwa lezo ke? Tiyani, muva vavanuna va tinhenha!

²⁹ A malanza ya Absalome ma lo maha ka Amnoni khwatsi hi lezi a va leleteleko; zonake a vana va hosi va lo suka, loyi ni loyi a ti khilelela a mula gakwe, va tsutsuma.

³⁰ Na va ha hi laha ndleleni, a mahungu ma lo ya chikela ka Davida, vaku: Absalome i dele vontlhe vana va hosi, a ku salangi hambu ni munwe.

³¹ Zonake a hosi yi lo suka yi hanzula tinguwo ta yona, yi etlela lahasi. A malanza yakwe wontihe ma lo suka ma yima laho, a tinguwo ta wona na ti hanzulwe.

³² Jonadaba nʼwana Ximea, nakulobye wa Davida, i lo hlamula, aku: Ngha hosi ya mina yi nga dzuki yi alakanya lezaku va dele wontihe majaha ya hosi, hakuva hi Amnoni yece a fileko, hakuva lezi Absalome a zi mahileko, zi sukela siku legiya a makabye wakwe Tamara a nga onhiwa hi Amnoni.

³³ Hikwalaho a hosi ya mina ngha yi nga bayiseki mbilu hi ku alakanya lezaku vontlhe vafana va hosi va file, hakuva hi Amnoni yece a fileko,

³⁴ Kanilezi Absalome i lo tsutsuma. A jaha lego ga murinzeli i te aku hoxo mahlo, a si wona a vanhu vo tala na vata hi ndlela leyi yi humelako laha reveni ga xitsunga, hi le nzhako kakwe.

³⁵ Jonadaba i te ngalo ka hosi: A vafana va hosi hi lava, va wuya, khwatsi hi lezi a nanza ga wena gi wulileko.

³⁶ I te a gumesa ku wulawula, a vana va hosi na Va su chikechike; va loba nkosi va rila. Yonawu hosi ni malanza ya yona wontihe va lo rila hi nkosi wa hombe nguvu.

³⁷ Kanilezi Absalome i lo chavela ka Talamai nʼwana Amihudi, a hosi ya le Gexura. Davida i lo hlaluka nʼwana wakwe wontihe masiku.

³⁸ Zinghaho Absalome i lo chavela le Gexura a ya tshama kona malembe manharu.

³⁹ Davida i lo xuva ku yela Absalome, hakuva a mbilu yakwe yi wa rulile makunu, hi ku wona lezaku Amnoni i file.