2 Kronekele 10 - Tshwa Bible

Kuavanyiswa ka Mufumo.

¹ Rehoboamu i loya le Xekemi, hakuva vontlhe va ka Israeli va loya leyo kasi ku ya mu wumbela wuhosi.

² Makunu laha Jeroboamu nʼwana Nebate a nga wa zwile lezo i lo wuya hi le Gipite, leyo a nga wa tsutsumele kona hi ku chava hosi Solomoni.

³ Va lo mu vitanisa, zonake Jeroboamu ni vontlhe va ka Israeli va lota va ta wulawula na Rehoboamu, vaku:

⁴ A raru wa wena i lo hi rwexa mikhinyavezo yo binza, makunu wena hi hehukisele mikhinyavezo leyi yo binza ya raru wa wena, zonake hina hi ta ku tirela.

⁵ Yena aku kabye: Fambani mu yaxwa masiku manharu, anzhako ka lezo wuyani. A vanhu va lo famba.

⁶ Hosi Rehoboamu i lo wutisa a madota ya kale lawa ma nga tira ni raru wakwe Solomoni, xikhatini lexo a nga ha hanya, aku kabye: Nzi ta ta va hlamulisa kuyini a vanhu lava ke?

⁷ Vona va lo wulawula naye, vaku: Loku u maha khwatsi ka vanhu lava, u va amukela hi wuxinji, u wulawula navo khwatsi, va ta ku tirela kala kupinzuka.

⁸ Kanilezi Rehoboamu i lo tsika xikungo lexi a madota ma nga wa mu byelile, a ya maha xikungo ni majaha lawa a nga kula nawo, lawa ma nga wa mu khozela.

⁹ Yena i te ngalo ka wona: Hi ta ta hlamula yini ka vanhu lava va teku ka mina: Hehukisa a mikhinyavezo leyi a raru wa wena a hi rwexileko ke?

¹⁰ A majaha kulobye lawa a nga kula nawo, ma lo hlamula maku: A vanhu lava va teku ka wena: A dadani wa wena i hi rwexile mikhinyavezo yo binza, kanilezi wena hi hehukisele, u ta va hlamula, uku: A litiho la mina la kanu li dzivile ku hunza xiwunu xa dadani wa mina.

¹¹ Hakuva dadani i wa mu rwexile mikhinyavezo yo binza, kanilezi mina nzi ta engetela ku yi binzisa; dadani i wa mu tsayisa hi tshilani, mina nzi ta mu tsayisa hi tihume!

¹² Zinghaho Jeroboamu ni vanhu vontlhe va lota ka Rehoboamu hi siku ga wunharu, khwatsi hi lezi a hosi yi nga wa wulile, yiku: Tlhelani mu wuya hi siku ga wunharu.

¹³ Hosi Rehoboamu i lo va hlamula hi lunya, a tsika a xikungo xa madota,

¹⁴ a wulawula ka vona khwatsi hi lezi a majaha kulobye ma mu byelileko, aku: Dadani i mu rwexile mikhinyavezo yo binza, kanilezi mina nzi ta engetela ku yi binzisa, hakuva dadani i mu tsayisile hi tshilani, kasike mina nzi ta mu tsayisa hi tihume.

¹⁵ Zinghaho a hosi a yi ingisangi za vanhu, hakuva zi wa hi za le ka Nungungulu, kasi ku fela ku tatiseka a gezu ga Jehova legi a gi wulileko xungetano na Jeroboamu nʼwana Nebate hi nomu wa Ahija a muXiloni.

¹⁶ Laha vontlhe va ka Israeli va nga wa wonile lezaku a hosi a yi va ingisangi, va lo yi hlamula, vaku: Hi na ni xiavelo muni na Davida ke? Hina a hi na tshomba ni nʼwana Jese! Va ka Israeli, tlhelani muya makaya ka nwina! Makunu wena Davida, tiwonele a yindlu ya wena nwinyi! Zinghaho vontlhe va ka Israeli va lo yela makaya kabye.

¹⁷ Kanilezi Rehoboamu i lo fumela a va ka Israeli lava va akileko lomu mitini ya va ka Juda.

¹⁸ Zonake hosi Rehoboamu i lo ruma Hadoramu a nduna ya mitiro ya wuhosi, kanilezi a va ka Israeli va lo mu gandla hi maribye afa. Hosi Rehoboamu i lo pona hi lezi a nga hatlisa ku enghena kareteni a tsutsumela Jerusalema.

¹⁹ Zinghaho a va ka Israeli va lo hambana ni yindlu ya ka Davida kala lezi.