1 Samueli 31 - Tshwa Bible

Kudawa Ita Saule yimpini.

¹ Makunu a vaFilistia va lolwa ni va ka Israeli; a vavanuna va ka Israeli va tsutsuma va chava vaFilistia, va gwazetelwa va mbambamela le xitsungeni xa Gilboa.

² A vaFilistia va lo tsimbeketa va lanzela Saule ni vana vakwe; zonake va lo daya Jonatani, na Abinadaba, na Malkixua, a vafana va Saule.

³ A yimpi yi wa tshingile nguvu laha ku nga wa hi na Saule, ni Vamawura va lo tsimbeketa vaya kakwe. I lo karateka nguvu hi kota ya vona.

⁴ Zonake Saule i te ngalo ka muweleli wa matlhari yakwe: Hlomula a supado ya wena u nzi gwaza ha yona, kasi a makhuna lawa ma nga dzuki ma nzi gwaza ma nzi xanula. Kanilezi a mukhomi wa matlhari yakwe a nga vumelangi, hakuva i wa chava nguvu. Zonake Saule i lp teka a supado yakwe a ti tlhava ha yona.

⁵ Laha a muweleli wa matlhari yakwe a nga wona lezaku Saule i file, yenawu i lo ti tlhava hi supado yakwe, afa.

⁶ Zinghaho Saule i lofa zinwe ni vana vakwe va vanharu ni muweleli wa matlhari yakwe, ni vanhu vakwe vontlhe, ka gona siku lego ga ginwe.

⁷ Laha a va ka Israeli lava va nga wa akile, hi le tlhatuko munwani wa nkova, ni lava va nga wa hi tlhelo ga le Jordani, laha va nga wona lezaku a vavanuna va ka Israeli va panzanyekile, ni lezaku Saule ni yana vakwe va vanharu va file, va lo tsika a miti yabye va tsutsuma. Zonake a vaFilistia va lo ta tshama ka yona.

⁸ Hi siku gi gamelako a vaFilistia va lo ta phanga lava va delweko, va si ta kuma Saule ni vana vakwe va vanharu na va wile le xitsungeni xa Gilboa.

⁹ Zonake va lo tsema a hloko yakwe, va teka matlhari yakwe va ma rumela tikweni gontlhe ga vaFilistia ni ku ya bika timhaka lomu ndlwini ka zifananiso za vanungungulu vabye, ni xikari ka vanhu vontlhe.

¹⁰ Va lo veka matlhari yakwe lomu tempeleni ya Axtarte, va hayeka xirumbi xakwe laha khurisini ga le Betexane.

¹¹ Laha a vanhu va le Jebexe-Gileade va nga wa zwile lezi a vaFilistia va nga wa mahile ka Saule;

¹² Vontlhe vavanuna va tinhenha va lo suka, va famba wusiku gontlhe, va ya teka xirumbi xa Saule ni za vana vakwe laha khurisini ga le Betexane; vaya nazo le Jebexe va ya zi hisa kona.

¹³ Va lo teka marambu yabye va ma kelela lahasi ka sinya ya kanyi le Jebexe, va yila ntlhanu wa masiku ni mambiri.