1 Samueli 30 - Tshwa Bible

Davida a khozisa vaAmaleki.

¹ Laha Davida ni vanhu vakwe na va chikele le Ziklagi hi siku ga wunharu, va lo kuma lezaku a vaAmaleki va wa hlasele le Dzongeni ni le Ziklagi. Va wa putsuketile Ziklagi va gi hisa hi nzilo.

² Va wa khomele vavasati ni vontlhe laya va va kumileko, a vatsongwani ni vahombe, va nga va dayi; ntsena ku va gula va famba navo.

³ Loku Davida ni vanhu vakwe va chikele laha mutini, va lo wu kuma na wu hisilwe hi nzilo, a vavasati vabye ni vafana vabye ni vanhanyana vabye na va khomelwe.

⁴ Zonake Davida ni vanhu lava a nga hi navo va loba huwa, va rila kala va nga ha kumi ntamu wa kurila.

⁵ A vasati va Davida, Ahinoame a muJezreeli, na Abigaili a sati wa Nabali, a muKarmeli, hi wumbiri gabye va wa khomilwewo.

⁶ Davida i wa hi hlomulweni wa hombe nguvu, hakuva vanyingi va wa alakanya ku mu gandla hi maribye, hakuva a timbilu ta vanhu vontlhe ti wa hi hlomulweni, hilezi loyi ni loyi i wa karatekela a vafana vakwe ni vanhanyana vakwe. Kanilezi Davida i lo ti tiyiseta hi Jehova a Nungungulu wakwe.

⁷ Davida i te ngalo ka mupristi Abiatara; nʼwana Ahimeleki: Neha laha a efode. Abiatara i lo neha a efode ka Davida.

⁸ Zonake Davida i lo wutisa ka Jehova, aku: Loku nzi lanza a yimpi leyi, nzi ta yi kamanyeta ke? Yena i te ngalo kakwe: Yi lanze, hakuva hakunene u ta yi kamanyeta, u tlhatlhisa zontlhe.

⁹ Zinghaho Davida i lo suka ni vanhu va 600, va ya chikela le xicongwaneni xa Besora. Laho ku lo ta yima lava va nga wa sele lenzhako.

¹⁰ Kanilezi Davida i lo lanza aya mahlweni zinwe ni 400 wa vavanuna, kanilezi lava va 200 va lo sala hakuva va wa karele nguvu, va tsanzeka hi ku tlhatuka xicongwana xa Besora.

¹¹ Va lo kuma a muGipite lomu xiwuleni; va mu neha ka Davida. Va lo mu nyika zibaba aga, va mu nyika mati anwa.

¹² Va lo mu nyika ni xikhemu xa xikhekhetselo xa makuwu, ni zitata zimbiri za mauva yo woma. I loga, zonake a kuma ntamu, hakuva ku wa hunzile masiku manharu ni wusiku ginharu na a ngagi nchumu hambu kunwa mati.

¹³ Zonake Davida aku ka yena: Hi wena mani? Na u humela kwihi? Yena aku: Nzi mufana wa muGipite, nzi khumbi ya muAmaleki; makunu nwinyi wa mina i nzi tsikile hilezi nzi wa babya masiku manharu ma hunzileko.

¹⁴ Hi wa lo ya hlasela le Dzongeni ga vaKereti ni le tikweni ga ka Juda hi le Dzongeni ga ka Kalebi, hi hisa na Ziklagi. Jox. 14:13; Ezek. 25:16; Zef. 2:5

¹⁵ Davida i te ngalo kakwe: Wa zi kota ku nzi heleketa ka yimpi leyo ke? Aku: Hlambanya ka Nungungulu lezaku u nga ta nzi daya, hambu ku nzi nyikela mandleni ya nwinyi wa mina, zonake nzi ta ku heleketa ka yimpi leyo.

¹⁶ I lo mu heleketa, va ya va kuma na va mbambamele ka wontihe matlhelo ya tiko, na va kari vaga, vanwa, na va tsakela muphango lowo wa hombe va phangileko tikweni ga vaFilistia, ni le tikweni ga ka Juda.

¹⁷ Zonake Davida i lo va hlasela kusukela ni mixo kala laha gambyeni ka siku gi gamelako; laho a ku ponangi munhu ahandle ka 400 wa majaha ma nga wa khilele makameli ma tsutsuma ha wona.

¹⁸ Davida i lo tlhatlhisa zontlhe lezi zi nga wa tekilwe hi vaAmaleki, a tlhatlhisa ni vasati vakwe va vambiri.

¹⁹ Laho a ku vumalekangi munhu, hambu tsongwani kutani wa hombe, hambu vafana kutani vanhanyana, hambu ni xihi xilo xi phangilweko ka vona; Davida i lo tlhelisa zontlhe.

²⁰ Davida i lo teka zontlhe zifuyo lezi za zitsongwani ni lezi za hombe; zonake a vanhu lava va nga wa gula mitlhambi va rangela mahlweni va waku: Lowu muphango wa Davida.

²¹ Davida i lo ya chikela ka vavanuna lava va 200, lava va nga wa karele nguvu, va tsanzeka ku lanza Davida, lava va nga siyilwe le xicongwaneni xa le Besora. Vona va lo suka va khinga Davida ni vanhu lava a nga wa hi navo. Davida i tshinela kabye a va wutisa kuhanya kabye.

²² Kanilezi a vanhu vontlhe vo biha ni vaBeliali, lava va nga hi xikari ka lava va nga wa fambile na Davida, va lo wulawula vaku: Kota lezi va nga kala ku famba na hina, cima hi nga ta va nyika nchumu xa muphango wa lezi hi phangileko, ahandle kaku munwe ni munwani a teka sati wakwe ni vanana vakwe a ti fambela.

²³ Zonake Davida i te ngalo: Cima mu nga ta mahisa lezo, vamakabye, hakuva lezi hi nyikilwe hi Jehova; a hi hlayisileko a nyikela mandleni ya hina a yimpi leyi yi nga wa tile ku ta hi vukela.

²⁴ Makunu hi mani a ta nga mu ingisa ka mhaka yo maha lezo ke? Hakuva a xiavelo xa loyi a nga wa yile yimpini xi ta fanana ni xiavelo xa loyi a nga sele laha ka zibya, va ta avelwa hi kuringana.

²⁵ Ku lo mahisa lezo kusukela lego siku kuya mahlweni, ku lo maha lezo; va lo zi maha xileletelo ni nayo lomu ka Israeli kala legi siku.

²⁶ Laha Davida a nga wa chikele le Ziklagi, i lo rumela muphango ka masingalakati ya ka Juda ni lomu maxakeni yakwe, aku: Hi lexweni xinyikiwo xa nwina, xa muphango wa valala va Jehova.

²⁷ I lo rumela xinyikiwo lexo ni ka lava va nga hi le Beteli, ni ka va le Remote wa le Dzongeni, ni ka va le Jatira,

²⁸ ni ka va le Aroera, ni ka va le Sifemoni, ni ka va le Exitemoa,

²⁹ ni ka va le Rakale, ni ka lava va nga wa hi mitini ya le Jerameeli, ni ka lava va nga wa hi mitini ya vaKeni,

³⁰ ni ka va le Horama, ni ka va le Boraxane, ni ka va le Ataka,

³¹ ni ka va le Hebroni, ni ka matiko wontihe lawa Davida ni vanhu vakwe va nga wa tolovele ku fambela ka wona.