1 Samueli 19 - Tshwa Bible

¹ Saule i lo wulawula ni nʼwana wakwe Jonatani, ni malanza yakwe wontihe, aku: Mina nzi lava ku daya Davida! Kanilezi Jonatani nʼwana Saule i wa ranza nguvu Davida.

² Hikwalaho Jonatani i lo byela Davida, aku: Baba wa mina Saule i lava ku ku daya. Hikwalaho ti wonele ni mixo, u tshama xihundleni u fihlala.

³ Kasike mina nzi ta huma nzi ya yima kusuhani na dadani le handle, hi tlhelo lego u nga kona wena; nzi ta ku wulawulela ka dadani lezo nzi ta nga zi wona ka yena, nzi ta ku byela.

⁴ Jonatani i lo Wulawulela Davida ka raru wakwe Saule, aku: Ngha hosi yi nga dzuki yi onha hi ku vukela a nanza ga yena Davida, hakuva a nga ku onhelangi nchumu, kanilezi lezi a mahileko hi lezi zi ku vunako nguvu.

⁵ Hakuva yena i ti enghenisile mhangweni a hlasela vaFilistia, na Jehova i hlulele vaIsraeli ha hombe. Wena u zi wonile ha wece u kala u tsakiswa ha zona. Makunu u ta mahisa kuyini ku onha hi nkhata lowu wu nga hiko na nanzu, u daya Davida ahandle ka xigelo?

⁶ Saule! lo ingisa a gezu ga Jonatani, a hlambanya, aku: Nzi hlambanya ha Jehova a hanyako, cima a nga ta dawa.

⁷ Zonake Jonatani i lo vitana Davida, a mu byela tontlhe timhaka leto, a mu neha ka Saule. I lo yimeletela hosi kota zinwani zikhati.

⁸ Ku lo engeta ku huma yinwani yimpi, na Davida i lo huma a yalwa ni vaFilistia, a va hlasela nguvu kala va panzanyeka mahlweni kakwe.

⁹ Kanilezi a moya lowu wobiha wu tako hi ka Jehova wu lota ka Saule na a tshamile lomu ndlwini yakwe, na hi ni tlhari canjeni gakwe, Davida na a kari a yimbelela hi xitende.

¹⁰ Saule i wa lava ku tlhava Davida a mu patsanyeta ni khurisi hi tlhari gakwe. Kanilezi Davida i lo vika mahlweni ka Saule, ni tlhari gi lo ya gwe-lela khurisi. Davida i lo tsutsuma, a pona gona wusiku lego.

¹¹ Kanilezi Saule i lo rumela vanhu le ndlwini ya Davida a ku ya mu rinzela kasi a fela ku mu daya laha mixweni. Kanilezi a sati wakwe Mikali i lo mu byela, aku: Loku u nga tsutsumi wusiku legi, u ta ta dawa ni mixo.

¹² Zinghaho Mikali i lo releta Davida hi laha njhaneleni, a huluka hi kutsutsuma. Miti. 9:25

¹³ Zonake Mikali i lo teka a xifananiso xa terafime a xi etlelisa laha mubhedini, a vekela xitshikelo xa woya ga timbuti laha hlokweni ya xona, a xi fenengeta hi nguwo.

¹⁴ Saule i lo rumela vanhu a ku ya khoma Davida, kanilezi Mikali i te ngalo: Wa babya!

¹⁵ Saule i lo rumela kambe vanhu a ku ya wona Davida, aku: Mu neheni hi mubhedi laha ka mina, nzi ta ta mu daya.

¹⁶ Laha mitsumi yi nga wa enghenile, yi lo wona a xifananiso laha mubhedini zinwe ni xitshikelo xa woya ga timbuti laha hlokweni ya xona.

¹⁷ Saule i te ngalo ka Mikali: Hi yini u nzi khohlisa u tsika a nala wa mina a tsutsuma ke? Mikali aku ka Saule: Hi yena a ngaku: Nzi tsike nzi famba, nzi ta ku dayela yini ke?

¹⁸ Davida i lo huluka a tsutsuma aya ka Samueli le Rama a ya mu hlawutela zontlhe lezi Saule a mahileko ka yena. Zonake yena na Samueli va lo suka va ya tshama le Naiote.

¹⁹ Zonake va lo byela Saule vaku: Davida i le Naiote le Rama.

²⁰ Saule i lo rumela a vanhu a ku ya khoma Davida; zonake vona va lo wona a ntlawa wa vaprofeti va nga wa profeta, na Samueli a hi xikari kabye a va rangela, zonake a Moya wa Nungungulu wu lota hehla ka mitsumi, vonawu va profeta.

²¹ Va lo ya bikela Saule, zonake Saule i lo rumela vanwani vanhu, vonawu kambe va lo ya profeta. Saule i lo ruma mitsumi hi xikhati xa wunharu, na vonawu va profeta.

²² Zonake yenawu Saule i loya le Rama; laha a nga chikela le hlobyeni ya hombe yi nga le Seku, i lo wutisa, aku: I kwihi Samueli na Davida? Vona va te ngalo: Va le Naiote le Rama.

²³ I loya kona le Naiote wa le Rama. Zalezo a Moya wa Nungungulu wu lota hehla ka yena. Ni laha a nga wa famba pfhumbeni gakwe, i lo profeta kala a chikela le Naiote le Rama.

²⁴ Zonake i lo susa a tinguwo takwe, yenawu i lo profeta mahlweni ka Samueli, a tshama siku gontlhe ni wusiku gontlhe na a etlele lahasi, na a hi ximbyiri. Hikwalaho vaku ngalo: Kasi yenawu Saule i lomu xikari ka vaprofeti ke?