Yowani 9 - Musamu wu Mubwe

Yisu miibeeloso inzimana hi imbutala-ngu

¹ Bu Yisu haakavyoho mu nzila, nde amoni inzimana hi imbutala-ngu.

² Bayihi ba nde baafuuli nde: «Rabi, mu hima baabuta muutu mo wunuuwu inzimana. Mu toni masumu ma nde mwakulu, vo ti mu ma taata na ma ngu a nde?»

³ Yisu afutili: «Huba nde, buuve ngu a nde na taata a nde a baasumihi ve. Ka nde ali inzimana hi imbutala-ngu, mana mavanga ma Nzambi mamonehele mu nde.

⁴ Bisu a benu lafwana ukuhasa mavanga ma wu atsindaha me, bu busi bukini bwakya. Bu busi buuyila, muutu ubwetwala usala ve.

⁵ Bu me kini mu tsi, me ndi liyalala la baatu boosi.»

⁶ Nde amana buuna uleele, nde atuuli maate mu toto. Na nde avangi libonzi mu maate ma nde. Titswene, nde akili lo mu miisu ma inzimana.

⁷ Na nde ni uleele: «Yene yaswaha mbalanga hu idiinga hya Silowa.» Silowa, mbinduli ni ti, «muutu wu baatsindaha». Nde ayeni, ayaswaha mbalanga, na bu hayafutaha, miisu ma nde maadibumi.

⁸ Ba baaba ŋa pedu a nde na ba baakamono nde mu uvondo baatu mbongo, baakaleele: «Wunuuwu, a ni muutu wu akatsahala ŋa toto na ubaavondo mbongo ve?»

⁹ Bamosi baakaleele: «Ni nde.» Bakima baakaleele: «Naana, a nde ve! Ka wunuuwu na ikeboso hya nde.» Ka nde mwakulu akaleele: «A ni me hwa me!»

¹⁰ Buuna, bo baabwefuula nde: «Ka buni miisu ma we mamiidibuma?»

¹¹ Nde afutili: «Muutu nga nduhi a Yisu vangi libonzi, kili me lo mu miisu, na leeli: “Yene yaswaha mbalanga a we hu idiinga hya Silowa.” Bu me nzatswaha mbalanga, miisu ma me ni ŋa madibumi!»

¹² Bo ni ufuula nde: «Ka muutu mowuuna huni a li?» Nde afutili: «Me a hanzabi ve.»

¹³ Bo baabiti wu aba inzimana huli Bafarisi.

¹⁴ Kahu aba ilumbu hya saba, ŋa Yisu havangi libonzi na hadibuli nde miisu.

¹⁵ Ni buuna, Bafarisi kaka bafuuli nde buni miisu ma nde maadibumi. Na nde ayabisi bo: «Nde akili me libonzi mu miisu. Bu me anzatswaha mbalanga, miisu ma me ni udibuma.»

¹⁶ Bafarisi bamosi baakaleele: «Muutu mo wu miivanga bunuubu, utwala uba wa Nzambi ve. Mu toni ati, nde a hubaakinza mukele a ilumbu hya saba ve.» Bakima baakaleele: «Buni muutu nga masumu hutwala usa biliimbu bya kimuhili biniibi? Ni mubuuna, kabuhili ya monihili ŋa hati la bo.»

¹⁷ Bafarisi baabwefuula inzimana: «Ka we buni li mu uleele mu nde wu midibula miisu ma we?» Nde afutili: «Nde Mumbihuli ali.»

¹⁸ Ka, batumi ba Bayudaayo a baasiidi imiinu ve ti muutu mo wunuuwu aba inzimana, na nde aka mu umono. Ni mubuuna, bo baatsihi ngu na taata a nde.

¹⁹ Bo baafuuli bo: «Nde wunuuwu mwana a benu, wu benu lili mu uleele ti nde inzimana baabuuti? Ka buni loloyi, nde aka mu umono?»

²⁰ Ngu na taata a nde baafutili: «Bisu liyaabi ti nde mwana a bisu ali, na ti bisu laabuti nde inzimana.

²¹ Ka mu uyaaba buni nde aka mu umono loloyi, bisu a liyaabi ve. Buuve mu ayaba na adibula nde miisu, bisu a liyaabi kaka ve. Fuulaani nde mwakulu! Nde amiibuuha mu uyabisa benu mambu ma mayiili nde.»

²² Bo baaleeli buuna mu toni ati bo baaba na boomo bu batumi ba Bayudaayo. Batumi ba Bayudaayo baayuhisini mu ubinga mu nzo lisambulu yi Bayudaayo, pasi muutu wu usilasa ti Yisu ni Kristo.

²³ Ni mubuuna, ngu na taata a nde baaleeli: «Nde amiibuuha, fuulaani nde mwakulu!»

²⁴ Bafarisi baabwetsiha muutu wu aba inzimana, tsiha la moole na baaleeli nde: «Yuusa Nzambi mu uleele imbuli. Bisu liyaabi ti bahala moliina, nga masumu ali.»

²⁵ Nde afutili bo: «Tso nde li nga masumu, me anzaabi hwa me ve. Li me nzaabi nduli dyambu limosi: me mbeedi inzimana, loloyi me ka mu umono.»

²⁶ Bo baafuuli nde: «Hima nde asiidi we? Buni nde adibuli we miisu?»

²⁷ Nde afutili: «Me mbeedi amiindeele benu lo, na benu aliyuhi ve. Muhima benu litondi ubweyuha musamu mowuuna? Benu kaka bayihi ba nde litondi uba?»

²⁸ Bo baatuhi nde na baaleeli: «Muyihi a nde ni we! Bisu bayihi ba Moose.

²⁹ Bisu liyaabi ti Nzambi ayambili na Moose. Ka nde wunuuwu, bisu a liyaabi nde huni hamata ve.»

³⁰ Bahala mo ni ufutala bo: «La kimuhili ni liniili: Benu a liyaabi nde huni hamata ve, ka nde miidibula me miisu.

³¹ Bisu liyaabi ti Nzambi a hubaayuhala banga masumu ve. Ka nde ubaasiingala pasi muutu wu ubaakiinza nde na wu ubaasa litondo la nde.

³² Bisu a laamayuha ve ti muutu amiidibula miisu ma inzimana hi imbutala-ngu.

³³ Ka tso muutu mo wunuuwu a hamata huli Nzambi ve, nde a hakiitwala usa dyambu la buuna ve.»

³⁴ Bo baafutili nde: «Bu baabuta we, we li nga masumu umata hu mutswe te hu miilu, na we tondi ulongese bisu?» Buuna bo baabingi nde mu nzo a Nzambi.

³⁵ Yisu ayuha ti bo baabingi nde mu nzo a Nzambi, nde ayabwana nde na aleeli: «We li mu usa imiinu mu Mwana a Muutu?»

³⁶ Nde afutili: «Pfumu, Mwana a Muutu na ali, mana me tsiila nde imiinu?»

³⁷ Yisu aleeli nde: «We miimono nde. Wu li mu utoyo na we, ni nde.»

³⁸ Nde aleeli: «Pfumu, me ndi mu utsiila we imiinu.» Na nde akongimini ŋa busu bwa Yisu.

³⁹ Titswene, Yisu aleeli nde: «Me miinza mu tsi moyiniyi, mana binzimana bimono, na ba bali mu umono, bakituha binzimana. Tsuundusu a me ni yiina.»

⁴⁰ Mwana kabu li Bafarisi ba baaba ŋa pedu a nde, ba baayuhi mambu momaana, ni ufuula Yisu: «Bisu kaka binzimana lili?»

⁴¹ Yisu afutili bo: «Tso benu libeedi binzimana, benu a likiiba na masumu ve. Ka benu lili mu uleele: “Bisu lili mu umono.” Ni mu buuna, benu luukwilala banga masumu.»