Yowani 7 - Musamu wu Mubwe

Baana ba ngu a Yisu a bali mu usa nde imiinu ve

¹ Humbisa a maana, Yisu akatangili itanzi hya Ngalili. Ka nde a hakatondo udyenge mu itanzi hya Yude ve. Mu toni ati, lituma li Bayudaayo, laakasaha uduba nde.

² Ka mukungi Bayudaayo wu bitudu aba aka bebele.

³ Na baana ba ngu a Yisu baaleeli nde: «Mata ŋaniŋa, na yene hu tsi a Yude, mana bayihi ba we kaka bamono mavanga ma we li mu usa.

⁴ A hu li na muutu wu ubaasa mavanga mu tswehi ve, tso nde tondi uyabahana. Bu we li mu usa mavanga ma manene, nyaha we yabahana huli baatu boosi.»

⁵ Ka baana ba ngu a nde bo mwakulu, a baakasa imiinu mu nde ve.

⁶ Yisu aleeli bo: «Tangu a me a yamato kini ve, ka uto ti mu benu, pasi tangu yili yimbwe.

⁷ Baatu ba tsi utwala ubelele benu ve. Ka bo baabelele me. Mu toni ati, me umbaata imbangi ti mavanga ma bo mali mamabi.

⁸ Benu, yenaani hwa benu hu mukungi. Me a unzyene hu mukungi mowuuna ve, mu toni ati, ya me tangu kini a yatodi ve.»

⁹ Bu nde hamani uleele bo maana, nde asaali hwa nde hu Ngalili.

Yisu miiyene hu mukungi bitudu

¹⁰ Ka bu baana ba ngu a nde baayeni hu mukungi, nde kaka ayeni huuna hwavele uyabisa baatu, na uvelemonehele ŋa kungi la baatu.

¹¹ Mu tangu mukungi mowuuna, batumi ba Bayudaayo baakasaha nde na baakafuula: «Nde huni ali?»

¹² Na mutso makonge ma baatu, hwaba na wadi-wadi mu nduhi a nde. Bamosi baakaleele: «Nde muutu nga mavanga mamabwe.» Bakima ti: «Naana! Nde baatu ubaasoho.»

¹³ Ka muutu tso mumosi a hakatoyo mu nde payalala ve, mu toni a boomo bu Bayudaayo.

Yisu li mu ulongese mu nzo a Nzambi

¹⁴ Mukungi aba aka hahati, Yisu ayeni hu nzo a Nzambi na nde abandihi ulongese.

¹⁵ Bayudaayo baakimuhi na baakalelesene: «Nde buni hayaaba mambu ma baasonehe ma Ngidi maniima, nde wu aveleyiha muhanda?»

¹⁶ Yisu afutili bo: «Ndongisili yi me ndi mu upa, a yili yi me ambaha ve. Ka yo yili ya Nzambi wu atsindaha me.

¹⁷ Tso muutu tondi ukuhasa litondo la Nzambi, nde utsikaha tso ndongisili a me yili mu umata huli Nzambi, buve ti yo yili mu umata mu matsimi ma me mwakulu.

¹⁸ Muutu wu ubaatoyo mu nde mwakulu, ubaasaha ndulu muyusu a nde. Ka pasi nde wu ubaasaha muyusu a nde wuuna wu atsindaha nde, ubaaleele imbuli. A hu li na upfuta mu nde tso hoole ve.

¹⁹ Moose aviidi benu Mikele. Ka muutu tso mumosi mu benu a hali mu ukinza myo ve. Mu hima benu lili mu usaha uduba me?»

²⁰ Konge a baatu yaafutili bunuubu: «We na tengo! Na li mu usaha uduba we?»

²¹ Yisu afutili: «Mu ipadi ndulu himosi hi me miitsa, benu boosi limiikimuha!

²² Tsimaani a ti: Moose atuma benu mu ubaakete baana ba bahala. Ka, a Moose avoli kesili moyiina ve. Kesili moyiina yaamata huli bakaaha ba bisu ba tsomi. Benu lili mu ukete baatu mu ilumbu hya saba.

²³ Benu lili mu usa buuna mu ukiinza Mikele mya Moose. Mu ki toni benu lili mu ukwiila me kesi, ŋa me miimbeloso muutu wu mutindala mu ilumbu hya saba?

²⁴ Nyahaani usilasa misamu mu monihili a mu misu. Ka baasilasaani misamu bu hwafwana.»

²⁵ Bisu Yeruselemi bakima baakaleele: «Nde wu, me ni wu bali mu usaha uduba?

²⁶ Monwaani: nde li mu utoyo ŋa miisu ba baatu, na baatu a bali mu uleele nde pasi dyambu ve! Buni! Bakuutu ba bisu bamiisilasa ti nde ni Kristo?

²⁷ Mu ilumbu hi Kristo huuya, muutu tso mumosi a huyaaba hu nde amiimata ve. Ka nde wunuuwu, bisu liyaabi huni nde amiimata.»

²⁸ Yisu akalongese mu litandala la nzo a Nzambi. Nde asyenuli ndaha na uleele: «Mu mbuli benu liyaabi na me ndi, na huni me miimata? Me a hanza mu lituma la me mwakulu ve. Ka wu atsindaha me wu akuha ali. Benu a liyaabi nde ve.

²⁹ Me, me nzaabi nde, mu toni ati me miimata huli nde, na ni nde atsindaha me.»

³⁰ Buuna, bo baasahi ukaanga nde. Ka muutu tso mumosi a hatwali ubembe nde ve, bu tangu a nde yaba kini a yatoodi ve.

³¹ Ka, babalahi ŋa hati la konge a baatu, baasiili nde imiinu na baakaleele: «Ŋa Kristo huuya, nde usa bilimbu bya kimuhili bi byalutahala bi nde wunuwu ali mu usa?»

Bafarisi bamiitsindaha baatu mu ukanga Yisu

³² Bafarisi baayuhi ma baatu baakaŋono mu toni a Yisu. Bakuutu ba banganga ba Nzambi na Bafarisi baatsindihi bakeedi mu uyakanga nde.

³³ Yisu ni uleele: «Me kini na benu mu mwana a tangu hoole, titswene me tsa nzyene huli wu atsindaha me.

³⁴ Benu sa lisaha me, na benu a luusoolo me ve. Na huuna hu me umba, benu a luutwala uyene ve.»

³⁵ Bayudaayo baalelisini: «Nde huni ali mu dwe, mana bisu luuvelesoolo nde? Nde ka huli Bayudaayo ba bubaatsahala ŋa hati li Bangeleke nde uyene, buve Bangeleke huuyalongese?

³⁶ Mambu ma nde amiipalisa maniima: “Benu sa lisaha me, na benu a luusoolo me ve” na “Huuna hu me umba, benu a luutwala uyene ve”. Hima mo mamoole matondi uleele?»

Yisu ni mamba ma monyi

³⁷ Ilumbu hya tsukusu mukungi, ilumbu hi hyafulala tsongo, Yisu atelimi, na asyenuli ndaha: «Tso muutu li na peyu a mamba, aya huli me, na anywa.

³⁸ Pasi muutu wu li mu usiila me imiinu, “banzali ba mamba ma monyi sa bapala mu mutima a nde”, we bu Libuku la Ngidi lili mu uleele.»

³⁹ Yisu haleeli buuna, mu toni a Livupu la Nzambi li boosi ba baasiidi imiinu mu nde, baafwana uyaka. Mu tangu moyiina, Nzambi aba kini a haviidi Livupu ve, mu toni ati Yisu aba kini a hayaki muyusu ve.

⁴⁰ Bu baatu ba ŋa hati la konge baayuhi mambu momaana, bamosi baakaleele: «Nde wunuuwu, mbuli ni mumbihuli mo!»

⁴¹ Bakima baakaleele: «Nde ni Kristo!» Na bakima kaka baakafuula: «Kristo utwala upala mu itanzi hya Ngalili?

⁴² Mabuuku ma Ngidi mali mu uleele ti Kristo uba wu imbisa hya pfumu Davidi na nde upala mu Beteleemi, bula bwa Davidi.»

⁴³ Na baatu baakabuhi mu toni a Yisu.

⁴⁴ Bamosi baakatondo ti bakanga nde, ka muutu tso mumosi a habembi nde ve.

Bakuutu bamiibisa usa imiinu mu Yisu

⁴⁵ Bakeedi baafutihi huli bakuutu ba banganga ba Nzambi na ba Bafarisi na baafuuli bo: «Mu hima benu livelibehe nde?»

⁴⁶ Bakeedi baafutili: «A hu li na muutu wu amiitoyo we bahala moliina ve.»

⁴⁷ Bafarisi baakaali bo: «Benu kaka limiisinga ubwa mu soho mo liniili?

⁴⁸ Hu li na mumosi mu bakuutu, buve mumosi mu Bafarisi, wu siili nde imiinu?

⁴⁹ Ka baatu mobaniba ba baaveleyaba Mikele mya Moose, ba baasinga bali!»

⁵⁰ Nikodemo aba mumosi mu Bafarisi ba baaba ŋaana. Nde wuuna wu ayamono Yisu hutsomi. Nde aleeli bo:

⁵¹ «Mu mikele mya bisu a benu, utwala utsundasa muutu hwavele umayuha nde, na umayaaba ma nde hasa ve.»

⁵² Bo baafutili nde bunuubu: «We kaka musi Ngalili we li? Kengese Ma baasonehe na we sa mono ti mumbihuli tso mumosi a hupala mu Ngalili ve.» [

⁵³ Titswene, muutu-muutu ayeni hu nzo a nde.