Yowani 6 - Musamu wu Mubwe

Yisu miibuungala konge a baatu

¹ Titswene, Yisu ayeni hu simu lina la dyanga la Ngalili, li babaateele kaka dyanga la Tiberiyade.

² Konge a baatu yinene yaakaduukala nde, mu toni ati yo yaakamono bipadi bi nde hakasa mu ubeeloso babeedu.

³ Yisu avaati isyelo, na nde atsahili ŋaana na bayihi ba nde.

⁴ Mukungi a Paake wu Bayudaayo aba aka bebele.

⁵ Yisu asiimbula miisu, ni umono konge a baatu yi nene yi yaakaya huli nde. Yisu ni uleele Filipo: «Huni bisu a benu lusuumbani mapa, mana baatu mobaniiba boosi babaha byudya?»

⁶ Nde haleeli buuna mu ukete imiinu hya Filipo, mu toni ati Yisu aba amiikwayaaba ma nde husa.

⁷ Filipo ni ufutala nde: «Tso likiisalila makama moole (200) ma makuta mu usuumba mapa, a makiikuha mu ukabila huli pasi muutu tso mwa itini ve.»

⁸ Mukima mu bayihi ba nde, nga nduhi a Andele, mwana a ngu a Simoni Peetelo, ni uleele Yisu bunuubu:

⁹ «Ŋaniŋa hu li na mufudu mbahala wu li na mapa mataanu na batswi boole. Ka mwa bisiha mobiina utwala ubungala musiiku a baatu mobaniba ve.»

¹⁰ Yisu ni uleele: «Tsahisaani bo.» Bu hwaba na biimbu bibilahi ŋa mbuha moyiina, baatu baatsahili mu toto. Litangu la baatu aba laato bebele na biveeve bitaanu (5000) bi babahala.

¹¹ Yisu avoli mapa, afutili matondo huli Nzambi, na akabi mo huli ba baaba ŋaana. Nde aviidi bo kaka batswi mu iteesi hi bo baatondi.

¹² Bu bo baaywati, nde aleeli huli bayihi ba nde: «Tolwaani bitsudu bi bimiisaala, mana pasi isiha a hibungana.»

¹³ Bo baatoli byo, na baaluusi maponzi kuumi na moole, ma bitsudu bi mapa bi byasaalili mu mapa mataanu ma baatu baadiidi.

¹⁴ Bu baatu baamoni iliimbu hya kimuhili hi Yisu hasiidi, bo baakaleele: «Mbuli nde ni Mumbihuli wu akiifwana uya mu tsi!»

¹⁵ Yisu ayaabi ti baatu baakiyavolo nde mu mifudi na ubyalisa nde mutumi. Nde abwevyasuha na ayeni nde siha hu yulu isyelo.

Yisu li mu uyene ŋa yulu a mamba

¹⁶ Tsitsaha bu yaatoodi, bayihi ba Yisu baakulimini nate ŋa muvanga a dyanga.

¹⁷ Bo baanami ŋa yulu a luungu mu uyene hu Kapernahumi, hu simu lina la dyanga. Aba hutso butsuhu, na Yisu aba kini a habiisili bo ve.

¹⁸ Ifula hi mifudi hyakanyingasa mamba ma dyanga.

¹⁹ Bayihi baakayene mu luungu na bu bo baatoodi lala, bo baatalili Yisu mu uyene mu miilu ŋa yulu a mamba, na uyaasusaha hu pedu a luungu. Bayihi baamoni boomo na baatsuli likamba.

²⁰ Ka Yisu aleeli bo: «Wunuwu me, a liba na boomo ve!»

²¹ Bo baakiisaha ukotese nde mu luungu, ka mu mawasa, luungu laatoodi simu lina, hutsyelo yi bo baaba mudwe.

Yisu ni lipa la monyi

²² Ilumbu hi hyaduukili, konge a baatu yi yaasaali hu simu lina la dyanga, yaamoni ti aba ŋaana ndulu luungu limosi. Baatu baayaabi ti Yisu a hakoti mu luungu moliina na bayihi ba nde ve. Ka bo siha baayeni.

²³ Bunuubu, maluungu makima ma maamati hu Tiberiyade, maayato bebele na mbuha yi bo baadiidi mapa, humbisa hu Yisu afutili matondo huli Nzambi.

²⁴ Bu konge a baatu yaamoni ti tso Yisu, tso bayihi ba nde, a baabedi ŋaana ve, bo baakoti bo mwakulu mutso maluungu momaana, na baayeni hu Kapernahumi mu uyasaha Yisu.

²⁵ Bo baasooli nde hu simu lina la dyanga na baaleeli nde: «Rabi, ki tangu we amiiyato huni?»

²⁶ Yisu ni ufutala bo: «Mu mbuli mu mbuli me ndi mu undeele benu, benu lili mu usaha me, a bu benu limiimono biliimbu bya kimuhili ve. Ka mu toni ati benu limiidya mapa na limiiywata.

²⁷ A lisala mu toni a byudya bi bibaabungana ve. Ka salaani mu toni a byudya bi bibaava baatu monyi wu bilima na bilima. Ni byudya bi Mwana a Muutu huva benu, mu toni ati Taata Nzambi amiikuma nde iliimbu, mu umwese ti nde amiisilasa lituma la nde.»

²⁸ Bo ni ufuula nde: «Hima bisu lafwana usa mu ukuhasa mavanga ma Nzambi atondi?»

²⁹ Yisu afutili bo: «Mavanga ma Nzambi ali mu utondo ti benu likuhasa, ni mu usa imiinu mu wuuna wu nde hatsindaha.»

³⁰ Bo ni uleele nde: «Ki iliimbu hya kimuhili we umwese bisu, mana bisu lisiila we imiinu? Ki vanga we umwese?

³¹ Bakaaha ba bisu baadiidi maane mu kumu we bu baasonehe: “Nde aliisili bo mu mapa ma maamati hu yulu.”»

³² Yisu aleeli bo: «Mu mbuli, mu mbuli me ndi mu undeele benu, a Moose aviidi benu mapa ma maamati hu yulu ve. Ka ni Taata a me ubaava benu mapa ma mbuli ma yulu.

³³ Mu toni ati lipa la Nzambi ni li libaakulamana umata hu yulu, na li libaava baatu ba tsi monyi.»

³⁴ Bo baaleeli nde: «Pfumu, baava bisu lipa moliina tangu yoosi.»

³⁵ Yisu ni uleele: «Me, me ndi lipa la monyi. Pasi muutu wu uya huli me, a hukaakwa nzala ve. Na wu usiila me imiinu, a hukaamono peyu ve.

³⁶ Me andeele benu ti, benu limiimono me, ka tso bu benu limiimono me, benu a lili mu usa imiinu ve.

³⁷ Boosi ba Taata huva me, sa baya huli me. Na pasi nde wu uya huli me, me a unyasula nde ve.

³⁸ Mu toni ati, tso me akulamana umata hu yulu, a mu uvanga litondo la me ve, ka mu kuhasa litondo la wu atsindaha me.

³⁹ Na litondo la wu atsindaha me ni liniili: ti me pelenyambasana tso muutu mumosi mu boosi ba nde haviidi me, ka ni ti me tsuula bo ŋa hati la babaakwa mu ilumbu hya tsyelele.

⁴⁰ Eye, litondo la Taata a me ni liniili: woosi wu umono Mwana a nde, na usiila nde imiinu, ubaha monyi wu bilima na bilima. Na me utsuula nde mu ilumbu hya tsyelele.»

⁴¹ Bayudaayo baakaŋono mu nde, mu toni a bu nde haleeli ti: «Me ni lipa li laakulamana umata hu yulu.»

⁴² Bo baakaleele: «Wunuuwu a ni Yisu mwana a Yosefi ve? Bisu laayaaba bubwe-bubwe taata na ngu a nde. Ka buni nde ali mu uleele ti: “Me akulamana umata hu yulu”?»

⁴³ Yisu afutili bo: «Nyahaani uŋono.

⁴⁴ Muutu tso mumosi utwala uya huli me ve, tso Taata wu atsindaha me a habehi nde ve. Me tsa tsuula muutu mowuuna ŋa hati la babaakwa, mu ilumbu hya tsyelele.

⁴⁵ Mimbihuli myasonehe bunuubu: “Nzambi sa alongese baatu boosi.” Pasi nde wu uyuhala Taata na uyaka ndongisili a nde, li mu uya huli me.

⁴⁶ Buuna a hu li mu umwese ve ti, hu li na muutu wu amono Taata. Ka ndulu nde wuuna wu amata huli Nzambi, amono Taata.

⁴⁷ Mu mbuli, mu mbuli, me ndeele benu lo, wuuna wu usiila nde imiinu, miibaha monyi wu bilima na bilima.

⁴⁸ Me, me ndi lipa la monyi.

⁴⁹ Bakaaha ba benu baadiidi maane mu kumu, ka bo baakwidi.

⁵⁰ Ka liniili ni lipa li lili mu ukulamana umata hu yulu. Pasi muutu wu udya lo, a hukwa ve.

⁵¹ Me, me ndi lipa la monyi li laakulamana umata hu yulu. Tso muutu diidi lipa moliina, nde sa abaha monyi wu bilima na bilima. Lipa li me upa, ni musunya a me. Me ndi mu upa nde, mana baatu ba tsi babaha monyi.»

⁵² Bayudaayo baakatsotsosono na mifudi na ubaaleele: «Buni muutu mowunuuwu hutwala uva bisu musunya a nde mu udya?»

⁵³ Yisu ni uleele bo: «Mu mbuli mu mbuli me ndi mu undeele benu, tso benu a lidiidi musunya a Mwana a Muutu ve, na tso benu a linywidi makila ma nde ve, benu a luubaha monyi ve.

⁵⁴ Pasi muutu wu udya musunya a me na unywa makila ma me, li na monyi. Na me tsa tsuula nde mu ilumbu hya tsyelele.

⁵⁵ Mu toni ati, musunya a me li byudya bi bibaaywatisa, na makila ma me mali byunywa bi bibaamana peyu.

⁵⁶ Pasi muutu wu udya musunya a me na unywa makila ma me, li mu ukwilala itwadi na me, na me ukwilala mu nde.

⁵⁷ We bu Taata wu atsindaha me ali monyi, me ndi monyi mu toni a Taata. Bumosi kaka, muutu wu udya musunya a me sa aba monyi mu toni a me.

⁵⁸ Liniili ni lipa li laakulamana umata hu yulu. Lo a lili we ma bakaaha ba benu ba baadiidi ve. Mu toni ati, humbisa udya mapa momaana, bo baakwidi. Ka muutu wu udya lipa mo liniili, sa aba monyi nzyeni.»

⁵⁹ Yisu haleeli mambu mo maana, ŋa nde hakalongese mu nzo lisambulu yi Bayudaayo hu Kapernahumi.

Bayihi bamiitimba Yisu

⁶⁰ Babalahi mu bayihi ba nde bu baamani uyuha nde, baaleeli: «Dyambu mo liniili lilutiili bunono. Muutu utwala usiinga lo ve.»

⁶¹ Bu Yisu hayaabi ti bayihi ba nde baakaŋono mu toni a dyambu mo liina, nde afuuli bo: «Dyambu mo liniili lili limiikwamisa benu?

⁶² Ka buni buuba, tso benu limoni Mwana a Muutu mu ubwekuma hu nde haba tsomi?

⁶³ Ni Livupu la Nzambi libaava monyi. Musunya a hali na tsongo ve. Mambu ma me ndeeli benu mali mu umata mu Livupu, na mali ma uva monyi huli baatu.

⁶⁴ Ka ŋa hati la benu, hu li na ba baavelesa imiinu.» Mu mbuli, Yisu aba ayaaba umata hu mbandu, baana ba baavelesa imiinu mu nde, na wu akiyeholo nde.

⁶⁵ Na nde abweleele: «Ni mu buuna me ndi mu undeele benu, muutu utwala uya huli me ve, tso Taata a haviidi nde muswa ve.»

⁶⁶ Umata tangu moyiina, bayihi ba nde babalahi baatiimbi nde, na a baakabweyene na nde ve.

⁶⁷ Ni mu buuna, Yisu haleeli huli kumi na bayihi boole ba nde: «Benu kaka a litondi uyene ve?»

⁶⁸ Simoni Peetelo ni ufutala nde: «Pfumu, bisu ka huli na luuyene? We ni nga mambu ma mubaava monyi wu bilima na bilima.

⁶⁹ Bisu lili mu usa imiinu, na bisu liyaabi ti we ni Kristo, wa Ngidi wu Nzambi hatsindaha!»

⁷⁰ Yisu afutili bo bunuubu: «Me, me ni wu asoolo benu, kuumi na boole. Ka mumosi mu benu muutu wu Mukuyi ali!»

⁷¹ Nde hakaleele buuna mu toni a Yuda, mwana a Simoni Isikariyoti. Mu toni ati, nde ni wu aba amiikuta usumbasa Yisu. Nde wu aba hwande mumosi mu kuumi na bayihi boole ba Yisu.