Yowani 4 - Musamu wu Mubwe

Yisu na mukasu wa Samariya

¹ Yisu ayaabi ti Bafarisi baayuhi ti nde akabaha, na utondehe bayihi ufulala Yowani.

² Imbuli ni ti, Yisu nde mwakulu a hakatondehe baatu ve. Ka ni bayihi ba nde baakatondehe.

³ Titswene, nde asiisi tsi a Yude na afutihi hu Ngalili.

⁴ Mu uyene hu tsi Ngalili, hwafwani huli nde mu ukese mu tsi a Samariya.

⁵ Nde atoodi ŋa bula bumosi bu bwaba bebele na tsi a Samariya, bwa nduhi a Sikari. Bula mobuuna bwaba ŋa pedu a tsyehe yi Yakobi haviidi huli mwana a nde Yosefi.

⁶ Huuna, hwaba na iyuna hya mamba hya Yakobi. Bu Yisu haba hamiikolo mu toni mudyenge, nde ayatsahala ŋa muvanga a iyuna mo. Aba bebele na mwangulu.

⁷ Mutangu moyiina, mukaasu mumosi wa Samariya ayidi mu utehe mamba. Yisu ni uleele nde: «Va me mamba ma unywa.»

⁸ Bayihi ba nde aba baamiiyene hu musyenge mu uyasuumba byudya.

⁹ Mukaasu wa Samariya ni uleele nde: «Buni we wu li Muyudaayo, we uvondo mamba ma unywa huli me, me wu li musi Samariya?» Nde haleeli buuna, mu toni ati Bayudaayo a bubaayuhasana na bisu Samariya ve.

¹⁰ Yisu ni ufutala nde: «Kini we ayaaba bungodu bwa Nzambi, na tso we kiyaaba na li mu uleele we: “Va me mamba ma unywa”, kini we ni wu kiivondo mamba ma unywa, na nde kiiva we mamba ma monyi.»

¹¹ Mukaasu ni ukaala: «Pfumu, we ti a hali na itehili ve, titswene iyuna hyadongo. Hwavele itehili, we mamba mo ma monyi ka buni kiibaha?

¹² We akulala kaaha a bisu Yakobi, wu aviidi bisu iyuna mohinihi? Ni iyuna hi Yakobi hanywidi mamba nde mwakulu na baana ba nde, na biboodi bya nde.»

¹³ Yisu afutili nde: «Pasi nde wuuna wu unywa mamba mo maaniima, sa abwebaha peyu.

¹⁴ Ka muutu wu unywa mamba ma me upa nde, a hubwebaha peyu ve. Mamba ma me upa nde, sa makituha mutswe a nzali mu nde. Ni mutswe a nzali wu ukaapalisa mamba na mifudi, te mu monyi wu bilima na bilima.»

¹⁵ Mukaasu ni uleele nde: «Pfumu, va me mamba momaana, mana me pelembwembaha peyu a mamba, na me pelembwenzatehe mamba ŋa.»

¹⁶ Yisu ti: «Yene, yateele mulumi a we na we yaafutaha ŋa.»

¹⁷ Mukaasu ni ufutala nde: «Me a handi na mulumi ve.» Yisu ti: «Ni mbuli, bu we miileele ti me a handi na mulumi ve.

¹⁸ Mu toni ati, we abahi balumi bataanu, na wu we li na nde loloyi, a hali mulumi a we ve. Hiina ni imbuli we miileele.»

¹⁹ Mukaasu mo afutili: «Pfumu, me ndi mu umono ti we mumbihuli a Nzambi we li.

²⁰ Bakaaha ba bisu baakuundi ŋa yulu isyelo mohinihi, ka benu Bayudaayo libaasitasa ti mbuha yi baafwana ukuunda, ni hu Yeruselemi.»

²¹ Yisu aleeli nde: «Maama, siila me imiinu, tangu sa yito, yi benu lukaakunda Taata Nzambi pasi mbuha, tso hu Yeruselemi, tso ŋa yulu isyelo mohinihi.

²² Benu bisu Samariya, benu a liyaabi na benu lili mu ukuunda ve. Ka bisu Bayudaayo, bisu liyaabi na bisu lili mu ukuunda. Mu toni ati, liyobolo ubaamata huli Bayudaayo.

²³ Ka tangu sa yito, na yo yaamiito, yi bakuundi ba mbuli buukakuunda Taata mu mutima woosi na mu imbuli hyosi. Mu toni ati, ni bakuundi ba pila yiina Taata ali mu usaha.

²⁴ Nzambi ni Livupu, hufwani ti boosi ba buukuunda nde, babaakuunda nde mu mutima na mu imbuli.»

²⁵ Mukaasu ni uleele nde: «Me nzaabi ti Masiya wu bali mu uteele Kristo, mu uya ali. Ŋa nde huya, nde sa ayabisa bisu mambu moosi.»

²⁶ Yisu aleeli nde: «Me ni nde wuuna, me wu ndi mu utoyo na we.»

²⁷ Ŋa mbisa, bayihi ba nde baayafutaha. Bo baakimuhi bu nde hakatoyo na mukaasu mumosi. Ka tso mumosi mu bo a hafuuli nde ve ti: «We na nde hima?» Buve: « Mu hima we li mu utoyo na nde?»

²⁸ Na bu mukaasu hasiisi lisanga la nde, nde ayeni hu musyenge na ayayabisa huli baatu:

²⁹ «Yamonwani bahala li limiiyaabisa me moosi ma me apaanga. Peleve nde ni Kristo hwande!»

³⁰ Bo baapali hutso musyenge na baayabwana Yisu.

³¹ Mu tangu moyiina, bayihi baakaleele nde: «Rabi, we afwana udya!»

³² Ka nde afutili bo: «Me na byudya bi benu laaveleyaaba.»

³³ Bayihi baakalelesene: «Aa! Kahu na muutu wu behili nde byudya?»

³⁴ Yisu afutili bo: «Bya me byudya ni mu ukuhasa litondo la Taata wu atsindaha me, na umana isalu hi nde hava me.»

³⁵ «Benu a lili mu uleele ve ti: “Batsungi bamiisaala bana, na sa bakukaha muhunu”? Ka me, me ndeele benu: syenolwaani miisu, na kengesaani matsyehe bubwe. Mbutu yimiyele na tangu yimiito yi ukoolo yo!

³⁶ Wu li mu ukuukaha muhunu ubaabaha pfuta a nde, na nde ubaakoolo mbutu, ni baatu ba buubaha monyi wu bilima na bilima. Buuna, wu li mu ukuna na wu li mu ukuukaha, bali mu kinya bo baboole.

³⁷ Ni mu toni moyiina, mbuli kuma yili mu uleele: “Mumosi ubaakuna, na mukima ubaakukaha.”

³⁸ Me atsindaha benu mu uyakuukaha hutso a tsyehe yi benu laavelesala. Ni tsyehe yi bakima baasala, ka benu laabaha kaluha mu isalu hya bo.»

³⁹ Bisu Samariya babalahi ba bula mo mobuuna, baasiidi imiinu mu Yisu mu toni imbangi hi mukaasu hatiidi: «Nde miiyaabisa me moosi ma me apaanga.»

⁴⁰ Ni mubuuna, bisu Samariya baayidi huli nde, bo baayayiini nde mu utsahala na bo. Na nde atsahili huuna bilumbu byole.

⁴¹ Litangu la baatu ba baasiidi imiinu mu mikuma mi Yisu hakaleele, laafulili bulahi.

⁴² Na bo baakaleele huli mukaasu: «A hisaali ndulu mu toni imbangi hya we bisu limiisa imiinu ve. Ka bisu mwakulu limiiyuha nde, na bisu limiiyaaba ti mbuli, nde ni Muyobili a tsi.»

Yisu miibeeloso mwana a mukuutu hu Ngalili

⁴³ Humbisa bilumbu mo byole biina, Yisu apali mu bula mobuuna, mu uyene hu Ngalili.

⁴⁴ Ni mbuli, nde aleeli mu nde mwakulu ti: «Mumbihuli a hubaayaka likinzu mu tsi a nde mwakulu ve.»

⁴⁵ Ka ŋa nde hatoodi hu Ngalili, bisu Ngalili baayaki nde bubwe, mu toni ati bo kaka baayeni hu mukungi a Paake, hu Yeruselemi. Bo baamoni moosi ma nde havangi hu mukungi mowuuna.

⁴⁶ Nde afutihi hu musyenge a Kana hu itanzi hya Ngalili, hu nde hakitusi mamba mu malamu. Hwaba hu Kapernahumi, mukuutu masadaadu, wu akasala na pfumu, wu mwana a nde haba na ubeele.

⁴⁷ Mukuutu masadaadu ayuhi ti Yisu miimata hu itanzi hya Yude, mu uyene hu Ngalili. Nde ayamono nde na ayayini nde, mu uyabeeloso mwana a nde wu aba aka ŋa pedu lipfu, hu Kapernahumi.

⁴⁸ Yisu aleeli nde: « Tangu yoosi, benu ubaasaha umamono biliimbu bya kimuhili na bipadi, mu usiila me imiinu.»

⁴⁹ Mukuutu masadaadu aleeli nde: «Pfumu, yanga mawasa huli me, teehele mwana a me akwa.»

⁵⁰ Yisu afutili: «Yene, mwana a we uba monyi.» Na bahala mo laasiidi imiinu mu ma Yisu haleeli nde, na nde ayeni.

⁵¹ Bu nde haba mu ufutaha, basalili ba nde baayabwana nde mu nzila na baayabisi nde: «Mwana a we monyi a li.»

⁵² Nde afuuli bo mu ki ngunga mwana a nde amoni nyutu bubwe. Na bo baaleeli nde: «Matsiha, mu ngunga ya tsomi ya humbisa a mwangulu, baahu laamata mu nde.»

⁵³ Taata ayibwili ti, ni mu ngunga moyiina Yisu haleeli nde: «Mwana a we uba monyi.» Mu tangu moyiina, nde asiidi imiinu mu Yisu, nde na nzo a nde yoosi.

⁵⁴ Hiina aba ni iliimbu hya byole hi Yisu hasiidi hu Ngalili. Nde hasiidi hyo, ŋa nde hamati hu itanzi hya Yude.