Yowani 20 - Musamu wu Mubwe

Tsuuhili a Yisu

¹ Mu ilumbu hya Saba ŋa tsumba a ngwali, Mariya musi Magadala ayeni hu ngila. Nde amoni ti manya la ŋa kotili a ngila baamiimasa.

² Nde ayeni tiinu mu uyabiisala Simoni Peetelo na muyihi wu Yisu haba hatondo. Nde aleeli bo: «Baamiimaasa nyutu a Pfumu mu ngila, na bisu a liyaabi huni baamiiyasusa yo ve.»

³ Peetelo na muyihi wuna baayeni hu ngila.

⁴ Bo baayeni tiinu bo ba boole. Ka muyihi wuna a lutihili Petelo tiinu, na atswamini uto hu ngila.

⁵ Nde abandimi mu utala na amoni birende bya tsanda a lino bi byaba baasuusa ŋaana, ka nde a hakoti hu hati ve.

⁶ Simoni Peetelo wu akaduukala nde ayato. Nde akoti hutso a ngila, nde amoni birende bya tsanda a lino byaba ŋaana,

⁷ na tsanda yi baafungili mutswe a Yisu. Tsanda moyiniyi a yaabeedi mbuha mosi na birende ve. Ka baaba baafuta yo ŋa muvanga, ŋa mbuha kima.

⁸ Titswene, muyihi wuna, wu atswamini uto hu ngila, akoti nde kaka. Nde amoni na asiidi imiinu.

⁹ Mu tangu moyiina, bayihi baabeedi kini a baatsikihi Libuuku la Ngidi ve. Lo lili mu uleele ti, Yisu aba afwana usuuha mu babaakwa.

¹⁰ Na bayihi ba boole baafutihi hu nzo a bo.

Yisu miimonehele huli Mariya musi Magadala

¹¹ Mu tangu moyiina, Mariya aba hu mbadi ŋa kotili a ngila, na nde aba mu ulila. Bu nde haaba mu ulila, nde abandimi mu utala hutso a ngila.

¹² Nde amoni bapofi boole balwata bikutu bi bifuuka, baatsahala ŋa mbuha yi baaba baasuusa nyutu a Yisu. Pofi mumosi hu tsyelo mutswe, wuna hu miilu.

¹³ Bapofi baafuuli nde: «Maama, mu hima we li mu ulila?» Nde afutili bo: «Mu toni ati baamiimasa Pfumu a me, na me a hanzaabi huni baayasuusa nyutu a nde ve.»

¹⁴ Bu nde hakaleele buuna, nde akinguhi, na nde amoni Yisu mutele, hwavele uyaaba ti ni Yisu.

¹⁵ Yisu afuuli nde: «Maama, mu hima we li mu ulila? We na li mu usaha?» Bu nde hakatsima ti muutu wu, aba musali a wooto, mukaasu aleeli nde: «Pfumu, tso ni we biti nde, leele me huni we suusi nde, na me nzapolo nde.»

¹⁶ Yisu ni uleele nde: «Mariya!» Nde akinguhi na aleeli nde mu Ibeleho: «Rabuni!» Mbindulili ni ti: «Mulongisi!»

¹⁷ Yisu aleeli nde: «A habembe me! Mu toni ati me kini a hapaata huli Taata a me ve. Ka yene huli baana ba ngu a me, na leele bo ti, “Me aka mu ukumasa huli Taata a me, wu li kaka Taata a benu. Me aka mu ukumasa huli Nzambi a me, wu li kaka Nzambi a benu.”»

¹⁸ Mariya musi Magadala ayayaabisa huli bayihi: «Me miimono Pfumu!» Na nde ayabisi bo mambu ma Yisu haleeli nde.

Yisu miimonehele huli bayihi

¹⁹ Tsitsaha a ilumbu mohiina, ilumbu hi limiingu, bayihi baaba baakukama mutso a nzo. Bo baaba badibuha minywa mya nzo mu batsaafi, bu bo baaba na boomo bu bakuutu ba Bayudaayo. Yisu ayidi, ayateleme ŋa hati la bo, na aleeli: «Nyaha hyenze hiba na benu!»

²⁰ Bu nde hamani uleele buuna, nde amwesi bo myoho mya nde na libanzi la nde. Bayihi baaba mu kinya bu baamoni Pfumu.

²¹ Yisu abweleele bo: «Nyaha hyenze hiba na benu! We bu Taata a me hatsindaha me, me kaka miitsindaha benu.»

²² Titswene nde afuli mupu ŋa yulu a bo na aleeli: «Yakaani Livupu la Ngidi.

²³ Boosi ba benu luunyahula masumu, buuyaka nyahulili masumu. Na boosi ba benu luuvelenyahula masumu, buukanga masumu ma bo.»

Yisu miimonehele huli Tomasi

²⁴ Tomasi, nga kumbu «Vasa», mumosi mu bayihi kumi na boole, a haba na bo ŋa Yisu hayidi ve.

²⁵ Bayihi bakima baayabisi Tomasi: «Bisu limiimono Pfumu.» Ka nde aleeli bo: «Me apfwana umono bikidi bya tsooso mu myoho mya nde, na usuusa mulembo a me ŋa mbuha yi baakomini nde tsooso. Me apfwana kaka usuusa kaka la me mu ikidi hi libanzi la nde. Tso a buuna ve, me a hutsa imiinu ve.»

²⁶ Bilumbu tsambu bivyoho, bayihi baabwekukama mutso a nzo, na Tomasi kaka abeedi ŋaana. Minywa mya nzo myaba baadibuha mu batsaafi. Masulubete, Yisu ayidi, ayateleme ŋa hati la bo na aleeli: « Nyaha hyenze hiba na benu!»

²⁷ Titswene, nde aleeli Tomasi: «Suusa mulembo a we ŋaniŋa na mono makaka ma me. Yasusaha na suusa kaka la we mu libanzi la me. Maasa paha na ba muutu nga imiinu!»

²⁸ Tomasi afutili nde: «Pfumu a me na Nzambi a me!»

²⁹ Yisu aleeli nde: «Bu we miimono me, we miisa imiinu mu me? Kinya yili na bo baana ba baavelemono, ka bali mu usa imiinu!»

³⁰ Yisu abwesa ŋa busu bu bayihi ba nde, biliimbu bya kimuhili bikima bibilahi, bi baavelesonehe mutso libuuku molinili.

³¹ Ka mambu ma baasonehe hutso libuuku, baasonehe mo mana benu lisa imiinu ti Yisu ni Kristo. Nde ni Mwana a Nzambi. Na bu benu luusa imiinu, benu luubaha monyi mu nduhi a nde.