Yowani 2 - Musamu wu Mubwe

Makwele hu musyenge a Kana

¹ Bilumbu bitatu bivyoho, hwaba na makwele hu musyenge a Kana, hu itanzi hya Ngalili. Ngu a Yisu aba ŋaana.

² Baatsihi kaka Yisu na bayihi ba nde hu makwele momaana.

³ Bu malamu maafwidi, ngu a Yisu aleeli nde bunuubu: «Bo a basaali na malamu ve.»

⁴ Yisu afutili nde: «Mukaasu, ki lo ŋa hati la we na me? Tangu a me kini a yaatoodi ve.»

⁵ Ngu a Yisu aleeli huli basalili: «Vangaani moosi ma nde hutuma benu.»

⁶ Hwaba ŋaana na masanga masamunu ma manene, ma Bayudaayo baakasalila mu tsyemili. We bu hwaba bipfu bya bo. Pasi lisanga laaba na iteesi bebele kama (100) li bikidama.

⁷ Bunuubu, Yisu aleeli bo: «Lusaani masanga momanima mu mamba.» Na bo baaluusi mo.

⁸ Yisu aleeli bo: «Ni tehaani mamba momaniima, na bitaani mo huli mukuutu mukungi.» Na bo baabitili nde mo.

⁹ Bu mukuutu mukungi habiimbi mamba ma maakituhi malamu, nde a hakayaaba huni malamu momaana maamati ve. Ka basalili ba baatehi mamba aba bayaaba. Nde ateeli mukweli,

¹⁰ na nde aleeli nde: «Pasi muutu ubamaatehele baatu malamu ma tsohele, titswene ŋa baatu bamiikolo, nde tehili bo malamu ma myenge. Ka we swehi malamu ma mabwe nate bunuubu!»

¹¹ Hiina ni iliimbu hya kimwili hya tsomi hi Yisu hasiidi. Aba hu musyenge a Kana hu Ngalili. Nde amwesi muyusu a nde, na bayihi ba nde baasiidi nde imiinu.

¹² Titswene, nde ayeni hu musyenge a Kapernahumi, na ngu a nde, na baana ba ngu a nde na bayihi ba nde. Na bo baavyosi huuna ndulu mwa bilumbu.

Yisu miibinga banga mumbungu mu nzo a Nzambi

¹³ Mukungi a Paake yi Bayudaayo aba aka bebele, na Yisu ayeni hu Yeruselemi.

¹⁴ Mu litandala la nzo a Nzambi, nde abiisi basuumbisi ba bangombe, ba mandombo na ba mabembe. Nde amoni kaka baatu ba bubaasa sanzi a mboongo, baaba batsahala ŋa busu bwa metse ma bo.

¹⁵ Bu nde havaangi ikooti mu mikudu, nde abingi bo boosi mu litandala la nzo a Nzambi, napa mandombo na bangombe ba bo. Nde atsali mbongo a banga masanzi, nde atakuli metse ma baakasalila,

¹⁶ na nde aleeli huli basuumbisi ba mabembe: «Masaani bi byosi ŋa mbuha moyiniiyi. A likitusa nzo a Taata a me saandu ve!»

¹⁷ Bayihi ba nde baayibwili monyi mu mambu ma baasonehe ma Ngidi: «Litondo li me ndi na lo mu toni a nzo a we o Nzambi, lili mu me we mbahu yi yili mu ukudasa me.»

¹⁸ Bayudaayo baafuuli nde: «Ki iliimbu hya kimwili we mwesi bisu, mu ubaha muswa wu usa manima?»

¹⁹ Yisu afutili bo bunuubu: «Tsalaani nzo a ngidi moyiniyi. Mu bilumbu bitatu, me umbwetelemese yo.»

²⁰ Bayudaayo baakaali nde bunuubu: «Mu utuunga nzo moyiniyi, baasiidi maku mana ma bilima, bilima bisamunu. Na we ti mu bilumbu bitatu we ubwetelemese yo?»

²¹ Ka nzo a ngidi yi nde hakaleele, aba ni nyutu a nde mwakulu.

²² Ni mubuuna, ŋa nde husuuha mu babaakwa, bayihi ba nde bu uyibwala monyi ti nde aleeli buuna. Na bo bu usa imiinu mu Libuuku la Ngidi, na mu mambu ma Yisu haleeli.

²³ Ŋa Yisu haba hu Yeruselemi, hu mukungi a Paake, baatu babalahi baasiidi imiinu mu nduhi a nde, mu toni a bu bo baamoni biliimbu bya kimuhili bi nde hakasa.

²⁴ Ka Yisu a hakasa hiitu mu bo ve, mu toni ati nde aba ayaaba bo boosi.

²⁵ Nde a habeedi na nzala ti muutu ayabisa nde pasi dyambu li litala muutu ve, mu toni ati nde aba ayaaba ma mali mu mutima a muutu.