Yowani 18 - Musamu wu Mubwe

Masadaadu mamiikanga Yisu

¹ Bu nde hamani uleele buuna, Yisu na bayihi ba nde baayeni na baasabuhi hu simu lina la mbenge a Sederoni. Huuna hwaba na ngundu miti mosi hu Yisu hakoti na bayihi ba nde.

² Yuda, wu akuti mu usumbasa Yisu, aba ayaaba mbuha moyiina. Mu toni ati, Yisu na bayihi ba nde baaba na ipfu hi ubaapfutana huuna.

³ Ni mubuuna, Yuda habiti kabu li balwani, na bakeelisi, ba bakuutu ba banganga ba Nzambi na Bafarisi baatsindihi, na ayeni na bo hu ngundu miti. Bo baaba na bilwanili, na miinda, na minyangi.

⁴ Bu Yisu haba hayaaba moosi ma maakayiila nde, nde ayidi na aleeli bo: «Na benu lili mu usaha?»

⁵ Bo bafutili: «Yisu, musi Nazareti.» Yisu ni uleele bo: «Me ndyowu!» Yuda wu akasumbasa nde ni ŋaana haba na bo.

⁶ Ŋa Yisu haleeli bo ti: «Me ndyowu», bo baafutihi mambimbisa, na baabwiidi ŋa toto.

⁷ Yisu abwefuula bo: «Na benu lili mu usaha?» Bo baafutili: «Yisu musi Nazareti.»

⁸ Yisu afutili bo: «Me ndeeli benu ti “me ndyowu.” Tso ni me benu lili mu usaha, nyahaani bana bayene.»

⁹ Aba mu toni ukuhasa mikuma mi nde haleeli: «Me a hanyambasana muutu tso mumosi mu ba we ava me ve.»

¹⁰ Simoni Peetelo wu aba na sabila apalisi nde, na ateti musalili a mukuutu banganga ba Nzambi, na akesi nde tswi la mbahala. Nduhi musalili mowuuna aba Malakusi.

¹¹ Ka Yisu ni uleele Peetelo: «Futala sabila a we hutso isupu hya nde. We li mu utsima ti me a hunywa mbuungu yi mapasi, yi Taata hamiivangimasa mu me ve?»

¹² Kabu li balwani na mukuutu a lo, na bakeedi ba Bayudaayo, baakangi Yisu na baahadi nde mikudu mu myoho.

¹³ Bo baamabita nde huli Ane, wu aba buko bwa Kayifa. Kayifa aba mukuutu banganga ba Nzambi mu ilima mohiina.

¹⁴ Ka Kayifa ni wu aviidi ndongi moyiniyi huli bakuutu ba Bayudaayo: «Hu li bubwe ti muutu mumosi kwidi ŋa mbuha a buli.»

Peetelo miitunala Yisu

¹⁵ Simoni Peetelo na muyihi mukima baakaduukala Yisu. Muyihi mukima wuuna, aba ayabaana na mukuutu banganga ba Nzambi wa tsomi. Ni mubuuna, nde hakoti nzila mosi na Yisu hutso litandala la nzo mukuutu mo.

¹⁶ Ka Peetelo asaali humbadi litandala, bebele na ikotili. Muyihi wu aba ayabaana na mukuutu mo, apali na atoyi na mukaasu wu akakeelese ikotili. Titswene, nde atumisi ukotese Peetelo.

¹⁷ Buuna, Mukaasu wu aba keedi ikotili afuuli Peetelo: «We kaka a hali mumosi mu bayihi ba bahala molinili ve?» Nde aleeli: «Naana, a me ve!»

¹⁸ Basalili na bakeedi ba baaba ŋaana, baaduuki mbahu mu makala, yi bo baakayoto mu toni a piyu. Peetelo kaka aba na bo na akayoto mbaahu.

¹⁹ Mukuutu banganga ba Nzambi wa tsomi afuuli Yisu mu bayihi ba nde, na mu ndongisili a nde.

²⁰ Yisu afutili nde: «Me akatoyo payalala huli baatu boosi. Me akandongese tangu yoosi mu manzo ma lisambulu li Bayudaayo, na mu nzo a Nzambi hu Bayudaayo boosi bubaapfutana. Me a handeele pasi dyambu mu tswehi ve.

²¹ Muhima we li mu uva me hyuhu mohiina? Fuula boosi ba baayuha ma me anzaabisa bo. Bo bayaabi moosi ma me andeele.»

²² Yisu amana uleele buuna, mumosi mu bakeedi ba baaba ŋaana, ateti nde lipali na aleeli: «Buuna ni bu hwafwana mu ufutala mukuutu banganga ba Nzambi?»

²³ Yisu afutili nde: «Tso me miitoyo bubi, mwese ti ma me miindeele a mafwana ve. Na tso me miitoyo bubwe, muhima we miitete me?»

²⁴ Na Ana atsindihi nde wu bahada mikudu, huli Kayifa mukuutu banganga ba Nzambi.

²⁵ Simoni Peetelo aba ŋa litandala ŋaana mu uyoto mbahu. Baafuuli nde bunuubu: «We kaka, we a hali mumosi mu bayihi ba nde ve?» Nde atuni na aleeli: «A me ve.»

²⁶ Mumosi mu basalili ba mukuutu, ikuta hya wu Peetelo hakesi tswi, aleeli: «Me a hamoni we na nde hutso a ngundu miti ve?»

²⁷ Peetelo abwetunala nde. Na mu mawasa, tsusu akohili.

Yisu bamiibita ŋa busu bwa Pilato

²⁸ Bamata hu nzo a Kayifa, bo baabiti Yisu hu nzo mutumi ŋa hati a ngwali. Ba baabiti nde, a baakoti mu nzo ve, mu uvelesumaha na mu toni udya Paake.

²⁹ Ni mubuuna, mutumi Pilaato hasusihi hupedu a bo humbadi. Nde afuuli bo: «Mu ki dyambu benu lili mu ukese bahala molinili?»

³⁰ Bo baafutili nde: «Tso nde a hali muvangi a mambu mamabi ve, bisu a likiibehele we nde ve.»

³¹ Ŋa yulu a ŋaana, Pilaato aleeli bo: «Benu mwakulu, volwani nde na tsundasaani nde we bu hu li Mikele mya benu.» Bayudaayo baafutili nde: «Bisu a lili na muswa mu uduba muutu ve.»

³² Aba mu ukuhasa ma Yisu haleeli, bu nde halahi mu ki pila lipfu nde hukwila.

³³ Pilaato akoti mu nzo a nde, ateeli Yisu na afuuli nde: «We ni mutumi Bayudaayo?»

³⁴ Yisu afutili: «We mu we mwakulu leeli lo, vo ti bu bakima baaleeli we lo mu toni a me?»

³⁵ Pilaato ni ufutala nde: «Me kaka Muyudaayo ndi? Baatu ba tsi a we, na bakuutu ba banganga ba Nzambi bamiiyasumbasa we huli me. We ki dyambu asa?»

³⁶ Yisu ni ufutala: «Ipfumu hya me a hili hya tsi moyiniyi ve. Tso ipfumu hya me hikiiba hya tsi moyiniyi, kini basalili ba me bamiikalana me, mana bavelevahula me huli bakuutu ba Bayudaayo. Ka a buuna ve, ipfumu hya me a hili hya tsi moyiniyi ve.»

³⁷ Pilaato aleeli nde: «We mutumi we li?» Yisu afutili: «Ni we li mu uleele ti me “mutumi” ndi. Ka baabuta me, na ni me anza ŋa tsi mu utiila imbangi imbuli. Muutu wu abambana na imbuli, ubaayuha ma me ndi mu undeele.»

³⁸ Pilaato afuuli nde: «Imbuli ni hima?» Pilaato amana uleele buuna, nde ayeni huli Bayudaayo na nde aleeli bo: «Me a handi mu umono dyambu tso limosi li ukotese nde ikondaayi ve.

Yisu kondaayi lipfu

³⁹ Ka benu na ipfu hya ti, pasi mukungi a Paake me ukaanyahula benu kondaayi mumosi. Benu litondi ti me nyahula benu mutumi Bayudaayo?»

⁴⁰ Na bo baabwefulaha: «Naana, a nde ve! Nyahula bisu Barabasi!» Kaahu Barabasi aba mutaani.