Yowani 17 - Musamu wu Mubwe

Yisu li mu usambila mu bayihi ba nde

¹ Nde amana utoyo buuna, Yisu asimbuli miisu hu yulu na aleeli: «Taata, tangu yimiito. Yusa Mwana a we, mana Mwana a we kaka ayusa we!

² We aviidi nde lituma ŋa yulu a baatu boosi, mana nde ava monyi wu bilima na bilima huli boosi ba we ava nde.

³ Ka monyi wu bilima na bilima ni uyaaba we Nzambi, wu li Nzambi ndulu mosi wa mbuli, na uyaaba wu we atsindihi, Yisu Kristo.

⁴ Me minzuusa we ŋa toto, mu toni ati, me miimana isalu hi we atuma me usa.

⁵ Bunuubu, Taata, yusa me ŋa busu bwa we. Yusa me mu biyusili bi me amba na byo ŋa pedu a we, tswamina pangili a toto.

⁶ Me anzaabisi nduhi a we huli baatu ba we apalisi mu tsi, ba we aviidi me. We abahi bo, ka we ava me bo, na bo baasingili mikuma mya we.

⁷ Bunuubu, bo bamiitsikaha ti byosi bi we ava me, huli we byamata.

⁸ Mu toni ati, me apa bo mambu ma we ava me. Bo baayaka mo, bo baayaba ti mu mbuli me mu we apala. Na bo baasa imiinu ti we ni wu atsindaha me.

⁹ Ni mu toni a bo, me ndi mu utsambila we. Me a handi mu utsambila mu baatu ba tsi ve, ka mu ba we ava me, bu bo bali ba we abaha.

¹⁰ Baatu boosi ba me ndi na bo, bali ba we. Na boosi ba we bali ba me. Na muyusu a me li mu umonehele mu bo.

¹¹ Mwana tangu hoole, me a humbwemba mu tsi ve, me upfutaha huli we Taata. Ka uto ti bo, bo bali ba tsi. We wu li wa ngidi, keelese bo itwadi na we, we wu li itwadi na me. Mana bo baba muutu mumosi, we bu we na me lili muutu mumosi.

¹² Ŋa me mbeedi na bo, me akeelisi itwadi hya bo na we, we wu li itwadi na me. Me akalana bo, na tso muutu mumosi mu bo a hanyambana ve, vengo muutu mumosi wu baanenge mu unyambana, mana ma baasonehe mu Mabuuku ma Ngidi matswiha.

¹³ Na bunuubu, me ka mu unza huli we, na me ndi mu unzabisa mambu momanima bu me kini ŋa tsi. Me ndi mu unzabisa mo, mana bo baba na kinya yi yili na me, ni kinya yi yasupahana.

¹⁴ Me apa bo mikuma mya we, na baatu ba tsi na piinga mu bo. Mu toni ati, bo a bali ba tsi ve, we bu me apele wa tsi moyiniyi.

¹⁵ Me a handi mu upondo huli we mu umaasa bo mu tsi ve, ka mu ukeelese bo ŋa busu bu mubungi.

¹⁶ Bo a bali ba tsi ve, we bu me apele wa tsi.»

¹⁷ «Mambu ma we ni imbuli, tsyemese bo mu imbuli hya we.

¹⁸ We bu we atsindihi me mu tsi, me kaka miitsindaha bo mu tsi.

¹⁹ Na me, me ndi mu utsyeme me mwakulu mu bo, mana bo kaka baba ba baatsyeme mu imbuli.

²⁰ Me a handi mu utsambila we ndulu mu bo ve, ka napa mu ba buusiila me imiinu mu ma bo buuleele mu me.

²¹ Me ndi mu utsambila, mana boosi baba we muutu mumosi. Taata, nyaha bo baba itwadi mu we na me, we bu we li itwadi na me, na me ndi itwadi na we. Nyaha bo baba muutu mumosi, mana baatu ba tsi basa imiinu ti ni we atsindaha me.

²² Na me miipa bo muyusu wu we aviidi me, mana bo baba muutu mumosi, we bu we na me lili muutu mumosi.

²³ Me ndi monyi mu bo, na we li monyi mu me. Buuna, bo buuba muutu mumosi we bu hwafwana, mana baatu ba tsi bayaaba ti we atsindaha me, na ti we atondo bayihi ba me we bu we atondo me.»

²⁴ «Taata, me tondi ti baatu ba we ava me, baba na me ŋa me umba. Me tondi ti bo bamono muyusu a me. Ni muyusu wu we ava me, mu toni ati, we atondo me tswamina pangili a tsi.

²⁵ Taata Nga Butsiitsa, baatu ba tsi a bayaaba we ve. Ka me, me anzaaba we, na bayihi ba me bamiisilasa ti we ni wu atsindaha me.

²⁶ Me anzaabisa bo nduhi a we, na me tsa mbwenzaabisa bo yo, mana litondo li we atondo me liba mu bo, na me mba me mwakulu mu bo.»