Yowani 15 - Musamu wu Mubwe

Yisu ni muti a viinye wa mbuli

¹ «Me, me ni muti a viinye wa mbuli na Taata a me ni musali a ngundu.

² Pasi itabi hi hyakangama mu me na hi hyavele na mbutu, Taata ubaatsakula hyo. Na pasi itabi hi hili na mbutu, nde ubaatsyemese hyo, mana hyo hibwefulala ubuta mbutu.

³ Ka benu, benu laamiitsyeme mu toni a mikuma ma me anzaabisa benu.

⁴ Kangamaani mu me, we bu me akangama mu benu. Itabi hi muti a viinye utwala ubuta mbutu mu hyo mwakulu ve, tso hyo a hyakangama na muti a viinye ve. Ni bumosi kaka, benu utwala ubuta mbutu, tso benu a laakangama mu me ve.

⁵ Me ni muti a viinye, benu lili bitabi. Muutu wu akangama mu me, na wu me akangama mu nde, ubaabuta mbutu yindahi, mu toni ati me upele, benu utwala usa pasi isiha ve.

⁶ Ka muutu avelekangama mu me, sa babwaha nde hu mbadi we itabi hi muti, na humbisa hyo hibaakanya. Bu bamiimana utolo bitabi bi byakanya, bubaabwaha byo hu mbahu na byo bibaanyenge.

⁷ Tso benu likwilili mu me, na mambu ma me makwilili mu benu, vondwaani pasi hi benu litondi, benu sa libaha hyo.

⁸ Ŋa benu luubuta mbutu yindahi, na ŋa benu luumonehele bayihi ba me, ni ŋaana muyusu a Taata a me humonehele.»

⁹ «We bu Taata hatondo me, me kaka atondo benu. Kwilalaani mutso litondo la me.

¹⁰ Bu me atsiingili matumili ma Taata a me, me ndi mu ukwilala hutso litondo la nde. Bumosi kaka, benu lisiingala matumili ma me, benu sa likwilala hutso litondo la me.»

¹¹ «Me miindeele benu mambu momaana, mana kinya a me yiba mu benu, na kinya a benu yiba yi yaasupahana.

¹² Mukele a me ni wunuuwu: tondosonwani we bu me atondo benu.

¹³ Litondo li laalutala, ni ukwa mu toni bambaahi.

¹⁴ Benu lili bambaahi ba me, tso benu lili mu usa ma me ndi mu utuma benu.

¹⁵ Me a handi mu umbweteele benu basalili ve. Mu toni ati musalili a hubaayaaba ma pfumu a nde ubaasa ve. Ka me ndi mu uteele benu bambahi, mu toni a ti me unzabisa benu moosi ma me anziha huli Taata a me.

¹⁶ A benu laasoolo me ve, ka me ni wu asoolo benu. Me miipa benu tumili moyiniyi: yenaani, butaani mbutu yi yukwilala. Buuna, pasi hi benu luuvondo huli Taata mu nduhi a me, nde sa ava benu hyo.

¹⁷ Dyambu li me ndi mu utuma benu, ni utondosono.»

Baatu ba tsi baabelele bayihi ba Yisu

¹⁸ «Tso baatu ba tsi baabelele benu, yaabaani ti bo baatswamini ubelele me.

¹⁹ Tso benu laakiba baatu ba tsi moyiniyi, tsi yakiitondo bi bili mu yo. Ka benu a lili baatu ba tsi ve. Me atsoolo benu ŋa hati la baatu ba tsi, ni mu toni moyiina baatu ba tsi baabelele benu.

²⁰ Yibwalaani monyi mu mikuma mi me andeeli benu: “Musalili a hubaalutala pfumu a nde ve.” Tso baatsuti me, bo sa batsuta benu kaka. Tso baakeelisi mikuma mya me, bo sa bakeelese mikuma mya benu kaka.

²¹ Ka bo busiila benu mavanga mamabi maana moosi mu toni a me. Mu toni ati, bo a baayaba wu atsindaha me ve.

²² Tso me a hanzidi ve, na tso me a handongisi bo ve, bo a baakibaha masumu ve. Ka bunuubu, bo utwala utuna masumu ma bo ve.

²³ Muutu wu li iboho na me, nde li kaka iboho na Taata a me.

²⁴ Tso me a hatsiidi bipadi ŋa hati la bo ve, bipadi bi muutu mukima havelesa, bo a baakiibaha masumu ve. Ka bunuubu, bo baamiimono byo, na bo baamiibelele me na Taata a me.

²⁵ Dyambu molinili limiivangama, mana ma baasonehe mu Mikele mya bo, matswiha: “Bo baabelili me hwavele a toni.”»

²⁶ «Me utsindaha benu Mukaliini wu umata huli Taata. Ni Livupu li luumata huli Taata, li luumwese imbuli. Ŋa nde huya, nde utiila me imbangi.

²⁷ Benu kaka, sa litiila me imbangi, mu toni ati benu lili na me umata mbandu.»