Yowani 14 - Musamu wu Mubwe

Yisu ni nzila yi yibaabita huli Taata

¹ Yisu aleeli bo: «A liba mitima helini-helini ve. Saani imiinu mu Nzambi, saani kaka imiinu mu me.

² Mambuha mali ma maasalila mu nzo a Taata a me. Me tsa nzyene mu ayavangila benu mambuha. Tso a buuna ve, me a hakinzabisa benu lo ve.

³ Na tso me nzyeni hu uyavangila benu mbuha, me tsanzapfutaha. Me tsapolo benu, mana hu me umba, benu kaka liba huuna.

⁴ Na hu me ndi mu unzyene, benu liyaabi nzila.»

⁵ Tomasi aleeli nde: «Pfumu, bisu a liyaabi hu we li mu uyene ve. Buni bisu luuyaaba nzila?»

⁶ Yisu afutili nde: «Me ni nzila, imbuli na monyi. Muutu tso mumosi a huya huli Taata hwavele uvyohele mu me ve.

⁷ Tso benu liyaabi me, benu likiiyaaba kaka Taata a me. Na bunuubu, benu limiiyaaba nde na limiimono nde.»

⁸ Filipo aleeli nde: «Pfumu, mwese bisu Taata, na buuna bukuhi mu bisu.»

⁹ Yisu aleeli nde: «Me ndi na benu umata beleve. We a hayaaba me ve, Filipo? Woosi wu miimono me, miimono Taata. Buni we utwala uleele: “Mwese bisu Taata”?

¹⁰ We afwana usa imiinu ti me ndi mu Taata, na ti Taata li mu me. Mambu ma me ndi mu undeele, a mali mu umata huli me ve. Ka Taata wu li mu me, ni wu li mu ukuhasa mavanga ma nde.

¹¹ Saani me imiinu, ŋa me ndi mu undeele ti: me ndi mu Taata, na Taata li mu me. Tso a buuna ve, saani imiinu mu toni mavanga ma me ndi mu utsa.»

¹² «Mu mbuli, mu mbuli me ndi mu undeele benu, woosi wu usa imiinu mu me, nde kaka sa akuhasa mavanga ma me ndi mu utsa. Na nde sa akuhasa ma maalutala bunene, mu toni ati me ndi mu unzyene huli Taata.

¹³ Na byosi bi benu luuvondo mu nduhi a me, me tsa paanga byo, mana muyusu Taata amonehele mu Mwana.

¹⁴ Tso benu livondi pasi isiha mu nduhi a me, me tsa paanga hyo.»

Yisu miisa lahi li utsindaha Livupu la Ngidi

¹⁵ «Tso benu latondo me, benu luusingala matumili ma me.

¹⁶ Me tsa pondo Taata mu uva benu mukaliini mukima, wu ukumbasa na uba na benu mu bilima na bilima.

¹⁷ Mukaliini ni Livupu li imbuli. Livupu li baatu ba tsi buuveletwala uyaka. Mu toni ati, bo utwala umono tso uyaba lo ve. Ka uto ti benu, benu liyabi lo. Mu toni ati lo lili ŋa hati la benu, na lo sa likwilala mu benu.

¹⁸ Me a hutsiisa benu we bitsaana ve, ka me tsa nza huli benu.

¹⁹ Mu mwana a tangu hoole, baatu ba tsi a bubwemono me ve. Ka benu, benu sa limono me. Mu toni ati me ndi monyi, na benu kaka sa liba monyi.

²⁰ Mu ilumbu mohiina, benu sa liyaba ti me ndi mu Taata a me. Benu lili mu me, na me ndi mu benu.

²¹ Muutu wu li mu uyaka matumili ma me, na wu li mu usiingala mo, ni nde wuuna wu atondo me. Muutu wu atondo me, Taata a me sa atondo nde. Me kaka tsa tondo nde, na me tsa monehele na nde.»

²² Yuda, a Yuda Isikariyoti ve, afuuli Yisu: «Mu hima we umonehele ndulu na bisu na uvelemonehele na baatu boosi?»

²³ Yisu afutili nde bunuubu: «Tso muutu tondi me, nde akeelese mikuma mya me, na Taata a me sa atondo nde. Bisu sa liya huli nde, na bisu sa livanga nzo a bisu huli nde.

²⁴ Muutu wu aveletondo me, a hubaasiingala mikuma mya me ve. Na mikuma mi benu lili mu uyuha a mili mu umata huli me ve. Ka myo mili mu umata huli Taata wu atsindaha me.»

²⁵ «Me miinzabisa benu mo bu me kini na benu.

²⁶ Ka mukaliini, Livupu la Ngidi li Taata hutsindaha mu nduhi a me, luulongese benu mu bisiha byosi. Lo luusa ti benu liyibwala monyi, mu moosi ma me andeele benu.»

²⁷ «Me ndi mu utsiisa benu hyenze. Ni hyenze hya me, me ndi mu upa benu. Me a handi mu upa benu hyo, we bu baatu ba tsi bubaava ve. Nyaha mitima mya benu mivelehelene, na a liba na boomo ve.

²⁸ Benu limiiyuha me mu uleele bu: “Me ka dwe, ka me tsa nzapfutaha huli benu.” Tso benu laatondo me, baani mu kinya bu benu limiiyuha ti me aka mu unzyene huli Taata. Mu toni ati, Taata akulala me.

²⁹ Me miinzaabisa benu misamu mominimi mu tangu moyiniyi, tswamina myo mu uvangama, mana bu myo myuvangama, benu lisiila me imiinu.

³⁰ Me a hatsaali na tangu yi ndahi yi ubwetoyo na benu ve. Mu toni ati, pfumu a toto aka mu uya. Nde a hali na matwala ŋa yulu a me ve.

³¹ Ka baatu ba tsi bafwana mu uyaba ti me atondo Taata, na ti me ndi mu ukuhasa we bu Taata hatuma me. Telemaani, limataani ŋaniŋa!»