Yowani 13 - Musamu wu Mubwe

Yisu li mu uswaha miilu mi bayihi ba nde

¹ Tswamina mukungi a Paake, Yisu ayaabi ti tangu a nde yi usiisa tsi moyiniyi, mu uyene huli Taata aba yaamiito. Nde aba atondo ba nde ba baaba mu tsi. Nde aba afula utondo bo nate hu tsukusu.

² Bu Yisu na bayihi ba nde baakadya ilambu hya tsitsaha, Mukuyi aba amiikotele mutima a Yuda, mwana a Simoni Isikariyoti, mu usumbasa Yisu.

³ Yisu ayaabi ti Taata aviidi byosi mu lituma la myoho mya nde, na ti huli Nzambi nde hamati. Ka nde yaabi kaka ti nde ufutaha huli Nzambi.

⁴ Nde ateleme ŋa metse, amaasi muroopo a nde, na avoli ilembe hya tsanda hi nde hapoti mu luungu la nde.

⁵ Titswene, nde ayitili mamba ŋa ikombe, na abandihi uswaha miilu mi bayihi ba nde na ukombolo myo mu ilembe.

⁶ Yisu ato ŋa busu bwa Simoni Peetelo, Peetelo aleeli nde: «We wu li Pfumu, we swaha miilu mya me?»

⁷ Yisu afutili nde: « We a hali mu utsikaha ma me ndi mu utsa ve. Ka we sa bangula mo hu busu.»

⁸ Peetelo aleeli nde: «Naana, we a huswaha miilu mya me ve.» Yisu afutili nde: «Me upeletswaha miilu mya we, we a huba itwadi na me ve.»

⁹ Simoni Peetelo aleeli nde: «Bunuubu Pfumu, a haswaha ndulu miilu, ka swaha napa myoho na mutswe.»

¹⁰ Yisu abwleele: «Muutu wu miiyobo mamba a hali na nzala ubweyobo nyutu yoosi ve. Peleve uswaha miilu, mu toni ati nde li wu atsyeme woosi. Benu lili ba laatsyeme, ka a benu boosi ve.»

¹¹ Yisu aba ayaaba ti Yuda usumbasa nde. Ni mubuuna nde haleeli ti: «Benu lili ba laatsyeme, ka a benu boosi ve.»

¹² Bu nde hamani uswaha bo miilu, Yisu abwevolo muroopo a nde, abwefutaha ŋa metse, na aleeli bo: «Benu limiitsikaha ma me miitsiila benu?

¹³ Benu libaateele me “Mulongisi” na “Pfumu”, na benu lili na mbiinga, mu toni ati buuna ni bu me ndi.

¹⁴ Ni mubuuna, tso me wu ndi Pfumu na Mulongisi a benu, me miitswaha benu miilu, benu kaka lafwana uswahasana miilu.

¹⁵ Me miimwese benu ifwani, mana benu kaka lisa we bu me tsiidi mu benu.

¹⁶ Eye, me ndeele benu, ni mbuli: musalili a hubaalutala pfumu a nde ve. Na bumosi kaka, ilumbi a hyalutala wu miitsindaha nde ve.

¹⁷ Bunuubu, benu limiiyaaba lo, benu sa liba mu kinya tso benu lisalili lo.»

¹⁸ «Me a handi mu undeele mu benu boosi ve. Me nzaabi ba me atsoolo. Ka hwafwana ti ma basonehe mu Mabuuku ma Ngidi matswiha: “Wu akakabasana lipa na me, amiikiinguhala me.”

¹⁹ Me mbandiha uleele benu lo, bu dyambu kini a laavangimi ve, mana ŋa lo luuvagama, benu lisa imiinu ti “me, me ndi”.

²⁰ Eye, me ndeele benu lo, ni mbuli: Pasi muutu wu uyaka wu me utsindaha, ni me nde ayaki; na pasi muutu wu uyaka me, yaki kaka wu atsindaha me.»

Yisu li mu uyaabisa ti Yuda usumbasa nde

²¹ Ŋa yulu a mambu mo maana, Yisu amoni lingebe lililahi, na ayabisi payalala: «Eye, me ndeele benu, ni mbuli, mumosi mu benu sa asumbasa me.»

²² Bayihi baatalisini, hwavele uyaaba mu na nde hakaleele maana.

²³ Mumosi mu bayihi, wu Yisu haba hatondo, aba atsahala ŋa pedu a Yisu.

²⁴ Simoni Peetelo avesi nde mu buyedi, mu ufuula Yisu, mu na nde hakatoyo.

²⁵ Buuna, muyihi mowuuna abandimi ŋa tulu a Yisu na afuuli nde: «Pfumu, na wuuna?»

²⁶ Yisu afutili: «Me tsa tuba itini hi lipa hutso a byudya. Wu me upa hyo, ni nde wuuna.» Na Yisu avoli itini hi lipa, atubi hyo hutso a byudya, na aviidi hyo Yuda, mwana a Simoni Isikariyoti.

²⁷ Bu Yuda havoli itini hi lipa, Satana akoti mu nde. Yisu aleeli nde: «Mambu ma we li na mo mu uvanga, vanga mo mawasa!»

²⁸ Muutu tso mumosi mu ba baaba ŋa metse, a hatsikihi mu hima nde hakaleele nde buuna ve.

²⁹ Bu Yuda haba ikanga-koome hya mbongo, babalahi baatsimi ti Yisu nde hakatuma mu uyasuumba bi bo baakisalila mu mukungi, buve mu uyakabila mbongo huli biyaha.

³⁰ Yuda avoli itini hi lipa, na apali mu mawasa. Aba aka butsuhu.

Yisu miiva mukele wu munyatihi

³¹ Bu Yuda hapali, Yisu aleeli: «Bunuubu muyusu a Mwana a Muutu miimonehele, na muyusu a Nzambi li mu umonehele mu nde.

³² [Na tso muyusu a Nzambi li mu umonehele mu Mwana,] Nzambi mu nde mwakulu kaka, sa ayusa Mwana a nde. Nde sa atswihasa lo mu mawasa.

³³ Baana ba me, me ndi na benu ndulu mu mwana a tangu hoole, humbisa benu luuyehele usaha me. Ka me ndi mu undeele benu ma me andeeli huli bakuutu ba Bayudaayo: benu a luutwala uyene hu me ndi mu unzyene ve.

³⁴ Me miipa benu mukele wu munyatihi: tondosonwani. Benu lafwana utondosono, we bu me atondi benu.

³⁵ Tso benu libaatondosono, buuna boosi sa bayaaba ti benu lili bayihi ba me.»

Yisu li mu uyaabisa ti Peetelo sa atunala nde

³⁶ Simoni Peetelo afuuli nde: «Pfumu, we huni li mu uyene?» Yisu afutili nde: «We a hutwala uduukala me hu me ndi mu unzyene ve. Ka we sa duukala me mu matangu ma hubusu.»

³⁷ Peetelo aleeli nde: «Pfumu, mu hima me upelendukala we mawasa ma? Me wu apangama ndi, mu ukwa mu toni a we!»

³⁸ Yisu afutili nde: «We amiivangama mu ukwa mu toni a me? Ka nyaha me ndeele we, mu mbuli: tswamina tsusu akohele, we sa utunala me tunala tatu.»