Yowani 12 - Musamu wu Mubwe

Mariya miipuupala nyafi mu miilu mya Yisu

¹ Bilumbu bisamunu, tswamina Paake yito, Yisu ayeni hu Betanya. Ni huuna hwaba Lazaro, muutu wu nde hasuuli mu babaakwa.

² Baaviidi Yisu byudya bi Malata hakakaba. Lazaro aba mumosi mu ba baaba ŋa metse na nde.

³ Mariya avoli itutu hya nyafi ya talu yindahi ya nduhi a «nare», nde apuupili yo mu miilu mya Yisu na akombili nde miilu mu nanga a nde. Nzo yaluuli mu tsulu a nyafi moyiina.

⁴ Mumosi mu bayihi ba nde, nga nduhi a Yuda Isikaryoti, wu aba na matsimi ma uyeholo Yisu, aleeli:

⁵ «Muhima bavelisuumbasa nyafi moyiniyi mu maku matatu (300) ma makuta ma mbongo na uva mo huli biyaha?»

⁶ Nde a haleeli buuna mu toni a kwili lingebe mu biyaha ve, ka mu toni ati nde aba muyibi. Bu nde hakakanga koome yi itwadi, nde akayiba mbongo yi baakasuusa muuna.

⁷ Ka Yisu aleeli nde: «Nyaha nde tsina! Nde asiidi buuna, mu uvangimasa ilumbu hya ndihili a me.

⁸ Benu sa libaaba na biyaha tangu yoosi. Ka me, benu a luuba na me tangu yoosi ve.»

⁹ Konge yinene yi Bayudaayo yaayuhi ti Yisu aba hu Betanya. Bo a baayeni huuna mu umono ndulu Yisu ve, ka mu umono kaka Lazaro, wu nde hasuuli mu babaakwa.

¹⁰ Buuna, bakuutu ba banganga ba Nzambi baavoli kesili mu uduba kaka Lazaro.

¹¹ Bo baasahi uduba nde mu toni ati, babalahi baasiisi bo, bu Bayudaayo baasiidi imiinu mu Yisu, mu toni a Lazaro.

Kotili a Yisu hu Yeruselemi

¹² Ilumbu hi hyaduukili, konge a baatu yinene yi yaayidi mu mukungi a Paake, yaayuhi ti Yisu akaya hu Yeruselemi.

¹³ Bo baavoli bihele, baapali mu musyenge mu uyabwana nde na baakafulaha: «Osana! Nzambi asyeme nde wu li mu uya mu nduhi a Pfumu! Nyaha Nzambi asyeme mutumi Isereli.»

¹⁴ Yisu amoni buuru mumosi, nde atsahili ŋa yulu a nde. We bu ma baasonehe ma Ngidi mali mu uyabisa:

¹⁵ «A ba na boomo ve, we nuumba a Syoni! Mono mutumi a we li mu uya, atsahala ŋa yulu a mwana a buuru.»

¹⁶ Hu mbaandihili, bayihi ba nde a baatsikihi ma maakavyoho ve. Ka humbisa a hu Yisu hasyenuhi mu muyusu, bo baayibuhili monyi ti mambu momaana aba baasonehe mu nde. Bo baayibuhili kaka monyi mu mambu ma maavyohi mu ilumbu mohiina.

¹⁷ Baatu boosi ba baaba ŋa Yisu hateeli Lazaro mu upala mu ngila, na usuula nde mu babaakwa, baakatiila nde imbangi mu ma bo baamoni.

¹⁸ Ni mubuuna konge a baatu yaayabwana nde, mu toni ati bo baayuhi ti nde asiidi iliimbu hya kimuhili mohiina.

¹⁹ Bafarisi baalelisini: «Bisu lili mu umono ti, bisu a benu a laatwala ve. Monwaani buni baatu boosi bali mu uduukala nde!»

Bangeleke bakima baatondi ubwana Yisu

²⁰ Hwaba na Bangeleke ŋa hati la baatu ba baakumisi hu Yeruselemi, mu ukunda Nzambi mu ilumbu hi mukungi a Paake.

²¹ Bo baayasusaha ŋa pedu a Filipo musi Betesayida, hu Ngalili na baafuuli nde: «Pfumu, bisu litondi umono Yisu.»

²² Filipo ayatoosele huli Andele, titswene Andele na Filipo baayayabisa Yisu.

²³ Yisu afutili bo: «Ngunga yimiito yi baafwana uyuusa Mwana a Muutu.

²⁴ Mu mbuli, mu mbuli, me ndi mu undeele benu: tso libutu li libaava lipa a libwidi ŋa toto na ukwa ve, lo utwala ubuta ve. Ka tso lo likwidi, lo sa libuta mbutu yindahi.

²⁵ Pasi muutu wu ubaatondo idiingu hya nde, ubaanyambasano hyo. Ka nde wuuna wu ubaabisa ukangama mu idiingu hya ŋa toto, sa abaha monyi wu bilima na bilima.

²⁶ Tso muutu tondi usalila me, nyaha nde aduukala me. Ni mubuuna, ŋa me ndi, musalili a me sa aba na me, na Taata a me sa ayusa nde.»

Yisu li mu utoyo mu lipfu la nde

²⁷ «Buunubu, muvumu a me li na mangongo. Ka ki lo me undeele? Me ndeele ti: “Taata yobolo me mu ngunga mapasi yiniyi”? Naana! Me ti ni mu ukuhasa iteesi hya ngunga moyiniyi me anza.

²⁸ Taata, yusa nduhi a we!» Na ndaha yaayuhini hu mayulu: «Me amiinzuusa yo, na me tsa mbwenzuusa yo.»

²⁹ Baatu ba baaba ŋaana, ba baayuhi ndaha moyiina, baakaleele: «Wuuna bedi nzyedi.» Bakima baakaleele: «Pofi miitoyo na nde.»

³⁰ Yisu aleeli: «A mu toni a me, ndaha moyiniyi yiyuhini ve. Ka mu toni a benu.

³¹ Yiniyi ka ni tangu yi Nzambi hutsudasa baatu ba tsi moyiniyi. Nde ubinga hu mbadi pfumu wu mubi wa tsi moyiniyi.

³² Na me, ŋa Nzambi husyenolo me ŋa yulu a toto, me umbehe baatu boosi huli me.»

³³ Nde hakaleele buuna, mu uyaabisa kwili yi nde haakikwa.

³⁴ Baatu baafutili nde: «Bisu laayiha mu libuuku li Mikele ti Kristo ukwilala bilima na bilima. Ka we buni we li mu uleele ti: “Mwana a Muutu bafwana usyenolo nde”? Mwana a Muutu mo ka na?»

³⁵ Yisu aleeli bo: «Liyalala likini mwana tangu hoole ŋa hati la benu. Hwadaani mu uyene, bu liyalala likini ŋa hati la benu, mana piipidi a yikimusa benu. Ka muutu wu ubaayene hutso a piipidi, a hubaayaaba huni nde ubaayene ve.

³⁶ Bu benu likini na liyalala, saani imiinu mu liyalala, mana benu likituha baana ba liyalala. Yisu aleele buuna, nde ayasweme lala na bo.»

Kamini mutima Bayudaayo

³⁷ Tso bu nde hasiidi bilimbu bya kimuhili bibilahi ŋa busu bwa bo, bo a baasiili nde imiinu ve.

³⁸ Buuna, ma mumbihuli Esaya haleeli maavangimi: «Pfumu, na asiidi imiinu mu ibila hi bisu laatiidi? Huli na Pfumu hamwesi matwala ma hoho hwa nde?»

³⁹ Bo a baatwali usa imiinu ve, mu toni ati mumbihuli Esaya abweleele:

⁴⁰ «Nzambi adibuhi miisu ma bo, nde aviidi bo kamini mutima, mana bo bavelemono mu miisu ma bo, mana baveletsikaha mu mitima mya bo, mana bavelekingula buyedi na uyafutaha huli me, kini me umbeeloso bo.»

⁴¹ Maana ni mambu ma Esaya haleeli ŋa nde hamoni muyusu a Yisu, wu nde ali mu usangula.

⁴² Tso buuna, babalahi ŋa hati li bakuutu ba Bayudaayo baasiidi imiinu mu Yisu. Ka mu toni Bafarisi, bo a baakasangula mo payalala ve, mana a babingasa bo mu nzo lisambulu yi Bayudaayo.

⁴³ Mu toni ati bo baakatondo muyusu wu ubaamata huli baatu, ka a wu ubaamata huli Nzambi ve.

Yisu miiyafuhasa baatu ba tsi

⁴⁴ Yisu aleeli mu mifudi: «Muutu wu li mu usiila me imiinu, a hubasiila hyo ndulu mu me ve, ka napa mu wuuna wu atsindaha me.

⁴⁵ Na muutu wu miimono me, miimono napa wu atsindaha me.

⁴⁶ Me anza mu tsi we liyalala. Pasi muutu wu usiila me imiinu, a hafwana ukwilala mu piipidi ve.

⁴⁷ Tso muutu li mu uyuha mambu ma me, ka velisalila mo, me a handi mu utsuundasa nde ve. Mu toni ati, me a hanza mu utsuundasa baatu ba tsi ve, ka mu uyobolo bo.

⁴⁸ Muutu wu ubaanyanza me na uvelesiinga mambu ma me, amiibaha wu utsundasa nde. Ni mikuma mi me andeele myutsundasa nde, mu ilumbu hya tsyelele.

⁴⁹ Mu toni ati mambu ma me nzabisi benu, a mali ma me mwakulu ve. Ka nde mwakulu Taata wu atsindaha me, atuma me mambu ma me apfwana uleele na ulongese.

⁵⁰ Na me nzaabi ti tumili a Taata yibaabita baatu hu monyi wu bilima na bilima. Ni mu buuna, mambu moosi ma me ndi mu undeele, me ndi mu undeele mo we bu Taata haleele me.»