Yowani 10 - Musamu wu Mubwe

Yisu mukelisi mameme wu mubwe

¹ «Mu mbuli, mu mbuli me ndi mu undeele benu, muutu wu ukoto mu mumbu mameme, hwavele uvyohele ŋa ikotili, ka nde alendoho mumbu, nde wuuna li mwibi na mutsali.

² Ka muutu wu li mu uvyohele mu ikotili, nde li mukelisi mameme.

³ Keedi a mumbu ubaadibula ikotili mana mukelisi mameme akoto. Mameme mubaayuha ndaha a nde. Nde ubaateele mameme, pasi lo mu nduhi a lo, na nde ubaabita mo hu mbadi.

⁴ Bu nde amipalisa mameme ma nde moosi, nde ubaayene ŋa busu bwa mo. Mameme mubaaduukala nde mu toni ati, mo maayaaba ndaha a nde.

⁵ Mo a muuduukala mwenyi tso hoole ve. Ka mo sa mabata nde lala, mu toni ati mo a maayaaba ndaha a byenyi ve.»

⁶ Yisu atiidi bo kuma moyiina, ka bo a baatsikihi ma nde haakaleele bo ve.

⁷ Yisu abweleele bo: «Mu mbuli mu mbuli me ndi mu undeele benu, me ni ikotili hya mumbu mameme.

⁸ Boosi ba baateehili me, bali biibi na batsali. Ka mameme a maayuhili bo ve.

⁹ Me ni ikotili. Tso muutu vyohili mu me, nde sa afuuha. Nde sa akoto na upala na bunyanga, na nde sa abaha byudya.

¹⁰ Mwibi ubaaya ndulu mu uyiba, mu uduba na mu utsala. Ka me anza, mana mameme mabaha monyi, monyi wu afulala.

¹¹ Me, me ndi mukelisi mameme wu mubwe. Mukelisi mameme ubaayeholo monyi a nde mu mameme ma nde.

¹² Muutu wu ubaasala ndulu mu ubaha mbongo, a hali mukelisi mameme wa mbuli ve. Bu mameme maavele ma nde, nde ubaatiimba mo na ubaabata bu nde amiimono minzi. Na minzi ubaakanga mameme, na utsala mo.

¹³ Muutu mo wunuwu ubaasala ndulu mu ubaha mbongo, ka a mu ukeelese mameme ve. Mu toni ati, nde a hali na tsaadi a mo ve.

¹⁴ Me, me ndi mukelisi mameme wu mubwe. Me anzaaba mameme ma me, na ma me kaka maayaaba me.

¹⁵ We bu Taata hayaaba me, me kaka anzaaba Taata. Na me umbaanzyeholo monyi a me mu mameme ma me.

¹⁶ Me ndi na mameme makima ma maavele mutso a mumbu mo wunuwu. Me apfwana ubita kaka mo. Mo sa mayuha ndaha a me, na sa maba ndulu konge mameme mosi, mukeelisi kaka mumosi.

¹⁷ Ni buuna, Taata hatondo me. Ka tso Taata hatondo me, mu toni ati, me umbaanzyeholo monyi a me, mana me mbwembaha nde wu munyatihi.

¹⁸ A hu li na muutu wu umaasa me nde ve. Ka me umbaanzyeholo nde mu litondo la me mwakulu. Me ndi na matwala ma uva monyi, na me ndi na matwala ma ubwevolo nde. Buuna ni bu Taata a me hatuma me.»

¹⁹ Kabuhili yabwemonehele ŋa hati li Bayudaayo, mu toni a mikuma mo miina.

²⁰ Babalahi ŋa hati la bo baakaleele: «Nde na livupu la tengo ali. Nde na ladi. Mu hima benu libaayuhala nde?»

²¹ Bakima baakafutala: «Mambu momanima a mali ma nga livupu la tengo ve. Nga livupu la tengo utwala udibula miisu ma binzimana?»

Bayudaayo bamiinyasula Yisu

²² Baakavyoso mukungi a tsyemili a nzo a Nzambi hu Yeruselemi. Aba mu tangu a mutubu.

²³ Yisu akataangila mu lipombo la Salomooni, hu litandala la nzo a Nzambi.

²⁴ Bayudaayo baayadiinga nde na baaleeli nde: «Nate ki tangu we usiisa bisu hutso idiba? Tso mbuli we ni Kristo, yaabisa bisu payalala.»

²⁵ Yisu afutili bo: «Me amiindeele benu lo, na benu a lili mu usiila me imiinu ve. Mavanga ma me ndi mu utsa mu nduhi a Taata a me, mali mu utiila me imbangi.

²⁶ Ka benu a lili mu usa imiinu ve, mu toni ati benu a lili mameme ma me ve.

²⁷ Mameme ma me mubaayuha ndaha a me. Me nzaabi mo, na mo mali mu uduukala me.

²⁸ Me ndi mu unzyeholo mo monyi wu bilima na bilima: mo a muukwa ve. A hu li na muutu wu utwala upatula mo ŋa kaka la me ve.

²⁹ Taata a me wu ava me mameme, aluutala boosi mu bunene. A hu li na muutu wu utwala upatula pasi hyo ŋa kaka la Taata ve.

³⁰ Bisu a Taata lili muutu mumosi.»

³¹ Bayudaayo baabwetolo mamanya mu ulanga nde.

³² Yisu abweleele bo: «Me amwese benu mavanga mamabwe, mu matwala ma Taata. Benu mu ki vanga li libwe benu litondi uduba me mu mamanya?»

³³ Bayudaayo baafutili nde: «A mu toni a vanga li libwe bisu luuduba we ve. Ka mu toni a bu we li mu usafula bungidi bwa Nzambi. Na we wu li ndulu muutu, we li mu ubilumana ti we Nzambi!»

³⁴ Yisu afutili bo: «Mu Mikele mya benu a baasonehe ve ti: “Me ndeeli, benu lili banzambi”?

³⁵ Hutso Mabuuku ma Ngidi, Nzambi li mu uteele baatu ba baayaki mikuma mya nde: “banzambi”. Ka muutu tso mumosi, utwala ufwinzala ma baasonehe ma Ngidi ve.

³⁶ Na me, Taata asoolo me na nde atsindaha me mu tsi. Ni mu buuna, me ndeeli ti: “Me ndi Mwana Nzambi.” Ka buni benu lili mu uleele ti me ndi mu utsafula Nzambi?

³⁷ Tso me a handi mu utsa mavanga ma Taata a me ve, a laasiila me imiinu!

³⁸ Ka tso me ndi me utsa mo, tso bu benu luvelesiila me imiinu, saani imiinu mu mavanga momanima. Yaabaani na tsikahaani ti, Taata li mu me na me ndi mu Taata.»

³⁹ Bo baabwesaha ukaanga nde, ka nde apatuhi ŋa myoho mya bo.

⁴⁰ Yisu abweyene hu simu liina la Yolodani, ŋa mbuha yi Yowani habaandihi utondehe na nde atsahili huuna.

⁴¹ Baatu babalahi baayidi huli nde, na baakaleele: «Yowani a hasiidi iliimbu hya kimuhili tso imosi ve. Ka moosi ma nde haleeli mu bahala molinili, maaba ma mbuli.»

⁴² Na huuna, babalahi baasiidi imiinu mu Yisu.