Yaki 1 - Musamu wu Mubwe

Mabwehe

¹ Me Yaki, musalili a Nzambi na wa Pfumu Yisu Kristo, ndi mu upa bwehe huli bibandu kumi na byole, bi byatsamuha mu matsi moosi.

Monwani kinya mu pasi lobese

² Baana bangu a me, monwani kinya mu pasi lobese lili uyila benu,

³ bu liyabi ti lobese li imiinu hya benu, libaabuta mukonono.

⁴ Ka mukonono a benu afwana usupana mu ukuhasa vanga la nde, mana benu liba ba baakula, ba baakuha, na livelekiima pasi isiha.

⁵ Ni mu buuna, tso muutu mumosi mu benu veli na dyele, nde avondo lo huli Nzambi, wu uva nde lo. Mu tonyi ati, Nzambi ubaava huli baatu boosi mu mutima wu mubwe, hwavele masyembo.

⁶ Ka nde avondo lo mu imiinu, hwavele matsika. Mu tonyi ati, wu ubasa matsika, li we po mubu, yi ifula hibaanyngasa na utsyete.

⁷ Muutu wa pila yina, utwala usa matsimi ma uyaka pasi isiha huli Pfumu ve.

⁸ Nde «mbambi malimi moole», muutu nga matsika.

Iyaha na isina

⁹ Mwana a ngu wu li iyaha abaamono kinya mu tonyi ati, Nzambi li mu usyenolo nde.

¹⁰ Na mwana a ngu nga busina abaamono kinya mu tonyi ati, Nzambi ukulamasa nde. Ka muutu nga busina uvyoho we ifulu hya bwadi.

¹¹ Bu nyangu hubaapala, mbaahu a lwanga, yibaakanyisa bwadi. Ifulu hibaanengele, hibaabwa, na yoli-yoli a hyo yibaadimbala. Ni bumosi kaka huli isina, nde udimbala ŋa hati li mavanga ma nde.

Ubingala malobese

¹² Kinya huli muutu wu ubaakunda lobese. Humbisa ubingala lo, nde ubaha mutata a monyi, wu Nzambi hasiidi lahi huli ba baatondo nde.

¹³ Pasi muutu, a haleele ŋa lobese li miiyila nde ti: «Ni Nzambi miilobese me!» Mu tonyi ati, bubi utwala ulobese Nzambi ve. Na Nzambi nde mwakulu a habaalobese muutu ve.

¹⁴ Ka pasi muutu ubaabwa mu lobese, ŋa linyungi la nde mwakulu libaaduta na libaasoho nde.

¹⁵ Titswene, ŋa linyungi limiiyele, lo libaabuta lisumu. Na lisumu liyele, libaabuta lipfu.

¹⁶ A lipfuta benu mwakulu ve, baana ba ngu a me ba litondo.

¹⁷ Bungodu bu bungeele bwosi, na bu bwakuha, bubaamata hu yulu huli Nzambi, muvangi mayalala ma yulu. Na huli nde, tsobili yo ve, nde a habaasobo ve, we bu inzinza hibaatanyuha na ukukama.

¹⁸ Nzambi aviidi bisu monyi. Nde aviidi bisu monyi mu litondo la nde, na mu likumbasa la mambu ma nde ma mbuli, mana bisu liba we mbutu ya tsomi mu byosi bi nde havanga.

Uyuha na usalila mambu ma Nzambi

¹⁹ Yabaani lo, bambaahi ba me ba litondo. Pasi muutu atehe matswi, aba na limama mu utoyo, limama mu udasuha.

²⁰ Mu tonyi ati, kesi a muutu a yibaakuhasa litondo la Nzambi ve.

²¹ Ni mu buuna, timbaani mbindu yoosi na mavanga moosi mamabi. Yakaani hutso a kulimini, mambu ma Nzambi ma baakuni mu benu, ma mu utwala ufuuhasa benu.

²² Basalilaani we bu mambu ma Nzambi mali mu uleele benu. A liba ndulu bayuhi ve. Benu livelesalila mo, benu lu upfuta benu mwakulu.

²³ Muutu wu ubaayuha mambu ma Nzambi hwavele usalila mo, li we muutu wu li mu utala hiinzi hya nde mu limwenu.

²⁴ Humbisa umono hiinzi hya nde, nde ubaayene, na ubaavusana mu mawasa buni abeedi.

²⁵ Ka muutu wu ubakengese mu mikele mya tsiki, mikele mi bunyanga, ubaakwilala mu myo. Nde a habaasuka ndulu mu uyuha ve, na a habaavusana myo ve, ka nde ubaasalila myo. Muutu wa pila yiina, umono kinya mu bisalili bya nde.

²⁶ Tso muutu li mu umonehele we musambili wa mbuli, hwavele ukuta limi la nde, nde li mu upfuta nde mwakulu, inzambi hya nde hya mu pu.

²⁷ Inzambi hi hyatsyeme na hi hyavele na tsumiili, ŋa busu bwa wu li Nzambi na Taata, ni mu ubaakumbasa bitsana na bakwili mutso minyongi mya bo. Inzambi hi hyatsyeme, ni mu uvelesumaha mu mambu mamabi ma tsi moyiniyi.