Tiite 3 - Musamu wu Mubwe

Kaluha yi Musamu wu Mubwe mu idiingu hya pasi ilumbu

¹ Yibwala libundu monyi, ti lo lafwana uyuhala na usiingala bakuutu na lituma la tsi. Lo lafwana uvangama mu ubaavanga moosi mamabwe.

² Bo muutu utuha ve, mitsotso ve. Ka bo bafwana uba baatu ba hyenze na bababwe, banga bulembo ŋa busu bwa baatu boosi.

³ Mu tonyi ati, bisu ka hu mbandu, laaba biyahudi, banga kene ŋa busu bwa Nzambi na ba baadunga. Bisu aba baviha ba linyungi na makinya ma toto moosi. Idiingu hya bisu aba hutso bukanyi na linyungi. Bisu laakabelele bana na laakabelesene bisu mo na bisu mo.

⁴ Ka Nzambi Mufuhisi a bisu, mu tangu yi yafwana, amwesi bubwe bwa nde, na buni nde hafula utondo muutu.

⁵ Nzambi hafuuhisi bisu, a mu tonyi ati bisu laavanga mambu mamabwe ve. Naana! Nde hafuuhisi bisu, mu bunene bwa kwili lingebe a nde mu bisu. Nde hafuuhisi bisu, mu tangu yi Livupu la Ngidi laaswahi bisu na laavidi bisu buta li linyatihi.

⁶ Nzambi apuhili bisu Livupu moliina mu iteesi hi hyafulala, mu nzila a Yisu Kristo Mufuhisi a bisu.

⁷ Nde hasidi buuna, mana bu buuteele bisu «ba bamiibinga» mu kolo-kolo a nde, bisu likituha babahi ba hiitu hya monyi wu bilima na bilima.

⁸ Mo mali mambu ma mbuli. Na me tondi ti we kwilala mu usilasa misamu mominimi, mana ba buusa hiitu mu Nzambi, bahwada mu ubaavanga mamabwe. Mono ma mali mamabwe, na ma tsongo huli baatu.

Mbiili a bisu ŋa busu bwa banga burandu

⁹ Ka baapeke usobosono hu munywa hu hwavele na lisunga, mu manduhi ma bakaaha ba benu. Kaapeke paha na midiingu mu musamu Mikele mya Moose. Mu tonyi ati mbiili moyiina, a yili ya tsalu na lisunga ve.

¹⁰ Wu ubehe burandu ŋa hati li libundu, kebese nde kebese la tsomi, titswene la moole. Bu nde avelisiinga, we afwana umasa nde mu libundu.

¹¹ Mu tonyi ati, muutu wa pila yina, amiidimbala nzila. Bu nde ali mu ukwilala mu masumu, nde li mu usyembe nyutu a nde mwakulu.

Mandongi ma tsyelele

¹² Me tsa tsindaha we Aritemisi na Tisike. Bu bo buuyato, a hatamba mu uyabiisala me hu musyenge a Nikopolisi, mu tonyi ati, ni huuna me upyoso mangala.

¹³ Ba na bukuhu mu uva likumbasa huli Zenasi, ngeele mikele, na Apoloosi mu byosi bi bo bali na byo nzala mu mudyenge. Sa buuna, mana bo a bakima mu pasi isiha.

¹⁴ Baatu ba bisu ka bafwana uhwada mu uva linyutu mu uvanga mamabwe, mana bo bakumbasa ba bali na nzala likumbasa. Bo bavanga buuna, bo sa baba na tsongo.

Mabwehe ma tsyelele

¹⁵ Boosi ba bali itwadi na me, bamiiva we mabwehe. Va mabwehe huli ba baabambana na bisu mu imiinu. Nyaha hyese hya Nzambi, hiba na benu boosi.