Ngalaatiya 2 - Musamu wu Mubwe

¹ Titswene, humbisa bilima kuumi na bina, me ambwekumasa hu musyenge a Yeruselemi, bisu a Baranabasi. Me ambiti kaka Tiite.

² Me anzyeni huuna mu nzabisili yi Livupu. Me anzaabisi bo Musamu wu Mubwe, wu me umbandongese ŋa hati la ba baavele Bayudaayo. Me ambahi imoho hya ŋa muvanga, na ba baakomo hutso libundu. Titswene, me a hantondi ve ti isalu hi me atsidi hu tsomi, na hi me ndi mu utsa loloyi, hiba hya mupu.

³ Mono buni bo baavelituma mu ukete Tiite, wu aba na me, na wu aba Ngeleke.

⁴ Bwavangimi buuna, mu toni a banga muwala ŋa hati la baana ba ngu, ba baayasohono na bisu na ubaakete bisu. Bo baakakete bisu, mu bunyanga bu laaba na bwo mu Yisu Kristo. Tsimi a bo, aba yi ufutala bisu hutso buviha.

⁵ Ka bisu a laayuhili bo tso tangu mosi ve, a laakulimini ka ŋa busu bwa bo ve, mana imbuli hi Musamu wu Mubwe hikwilala ŋa hati la benu.

⁶ Ka mu ba baakamonehele we baatu ba baakomo, bupfumu bwa bo a bwaba na tsalu ŋa busu bwa me ve. Mu toni ati, Nzambi a hubaatondo burandu ve! Baatu mobaana a baakwihi me pasi hyo, hwavele litondo la me ve.

⁷ Ka bo baamoni ti Nzambi aviidi me mupfuna wu uyabisa Musamu wu Mubwe huli ba baavelekete. Ni bumosi kaka, huli Peetelo, nde avidi mupfuna wu uyabisa Musamu wu Mubwe huli ba baakete.

⁸ Nzambi wu ateeli Peetelo mu uba ilumbi hya nde huli buli la ba baakete, ateeli kaka me, mana me mba ilumbi hya nde huli bangoyi.

⁹ Yaki, Peetelo na Yowani ba baaba makunzi ma libundu, baasilisi ti Nzambi, mu hyese hya nde, aviidi me mupfuna wu uyabisa Musamu wu Mubwe huli bangoyi. Na bo baayasiimba bisu a Baranabasi, mu umwese ti bisu a bo laayuhisini mu uba likoongo. Ni mu buuna, bisu a bo laakesi mu itwadi, ti bisu liyakuhasa isalu ŋa hati li bangoyi, mana bo bayasala ŋa hati la buli la ba baakete.

¹⁰ Bo baavondi bisu dyambu limosi: bisu lafwana ubaayibwala banga a puumbu monyi. Me akuhisi maana ma bo baavondi bisu, na bukuhu boosi.

Pahuli li mu usyembe Peetelo hu Antyokya

¹¹ Ka tangu yi Peetelo hayidi hu musyenge a Antyokya, me atsyembi nde ŋa misu ma baatu, mu toni ati nde avangi mamabi. Mono ma nde havangi.

¹² Tswamina baatu ba kabu la Yaki mu uya, nde aba mu udya itwadi na baana ba ngu ba baavele Bayudaayo. Ka, humbisa hu bo baayato, nde avyasuhi na nde ayatsahala ŋa muvanga, mu toni ati, nde aba na boomo bwa kabu la baatu mobaana, ba baakete.

¹³ Bayudaayo bakima ba musyenge mowuuna, baasidi we Peetelo. Baranabasi nde mwakulu kaka, akoti hutso a ndyatili a bo yi muwala.

¹⁴ Me amoni ti ndyatili a bo a yaaba yi yasungama we bu Musamu wu Mubwe ali mu uvondo ve. Buuna, me anzabisi Peetelo ŋa busu bwa baatu boosi ti: «Mbiili a we wu li Muyudaayo, yili we mbiili bangoyi, ka a we bu hwafwana na mikele mi Bayudaayo ve. Uba ti ni buuna, buni we ukwamisa ba baavele Bayudaayo, mu udyata we bu hwafwana huli Bayudaayo?»

Bayudaayo na bangoyi sa bayoboho mu imiinu

¹⁵ Bisu a benu lili Bayudaayo ba imbutala-ngu. Bisu a lili ba mabuli ma ba baasumaha ve.

¹⁶ Bisu liyaabi ti Nzambi ni wu ubaasa ti muutu aba wu akuha mu imiinu hya nde mu Yisu Kristo. Ka a bu nde ubaaduukala Mikele mya Moose ve. Mono buni bisu Bayudaayo kaka, laamiisa imiinu mu Yisu Kristo, mana bisu liba ba baakuha mu imiinu mu nde. Bisu a lili ba baakuha ŋa busu bwa Nzambi, mu kuhisili Mikele mominimi ve. Muutu tso mumosi utwala umonehele wu akuha ŋa busu bwa Nzambi, bu nde ubaakuhasa Mikele ve.

¹⁷ Ka bisu lili mu usaha uba ba baakuha mu bungodu bu laabaha mu Kristo. Ni mu uleele ti, bisu a lili mu uduukala Mikele mya bisu ve. Ka a mu uleele ti Kristo li mu ubita bisu mu usa masumu ve. Naana, a huli buuna ve!

¹⁸ Ni mu buuna, tso me ndi mu umbwepfutahala tuungili Mikele yi me atsali, me ndi mu umbwekituha iyahudi.

¹⁹ Mu ma maatala Mikele, me ndi we wu amiikwa na me a hatsaali hutsina lituma li bisiha mobiina ve. Buuna ni bu hwafwana, mana me mbaha monyi mu Nzambi. Baamikomene me ŋa muti a Kuruwa, itwadi na Kristo.

²⁰ Ni mu buuna, a me ndi monyi ve, ka ni Kristo li monyi mu me. Idiingu hya me ŋa toto, ni mu imiinu mu Mwana a Nzambi me ndi mu ukuhasa hyo. Nde wu atondi me, ayehuli monyi a nde mu toni a me.

²¹ Me a handi mu ubisa hyese hya Nzambi ve. Tso muutu li wu akuha ŋa busu bwa Nzambi mu nzila Mikele, buuna Kristo mu pu hakwidi.