Mavanga 5 - Musamu wu Mubwe

Mapfuta ma Ananya na Safila

¹ Ka hwaba na muutu mumosi, nduhi a nde Ananya. Nde ayuhisini na mukadi a nde Safila, mu usumbasa toto a bo.

² Nde aswehi kabu la mbongo lina humbisa uyuhasana na mukadi a nde, na nde ayava ibadi hina huli bilumbi.

³ Peetelo aleeli nde: «Ananya, muhima Satana hamiituma we mu uvanga buuna? We miipfuta Livupu la Ngidi na uswehe ibadi hya mbongo a toto.

⁴ Tswamina we sumbasa toto a we, we aba uswehe yo mu we mwakulu. Napa humbisa usumbasa yo, we aba bunyanga mu usalila mbongo moyina mu lituma la we. Buni we bahi tsimi a pila yiniyi mu mutima a we? We a pfuti baatu ve, ka Nzambi we pfuti.»

⁵ Bu Ananya hayuhi mambu momaana, nde abwidi na akwidi. Na boosi babaayuhi musamu mowunuwu, baamoni boomo bu bwafulala.

⁶ Mu tangu moyiina, pfudu mbahala yaayidi, yaapoti mvumbi a nde lileeso, na yaayadiiha yo.

⁷ Humbisa mangunga we matatu, mukadi a Ananya ayakoto, hwavele uyaba ma maavyohi.

⁸ Peetelo afuuli nde: «Leele me, mu mbuli ni mu lifunu molinili benu lisumbisi toto?» Nde afutili: «Eye, ni mu lifunu moliina.»

⁹ Buuna Peetelo aleeli nde: «Buni benu liyuhisini mu uyehele Livupu la Pfumu? Tala! Ba bamiiyadiiha mulumi a we ŋa munywa a nzo baaka, na bo bu ubita we kaka.»

¹⁰ Mawasa-mawasa, Safila abwidi ŋa miilu mya Peetelo na akwidi. Pfudu mbahala yaakoti, yaabiisi nde wu akwa. Yo yaabiti nde kaka hu uyadiiha ŋa pedu mulumi a nde.

¹¹ Libundu loosi na boosi ba baayuhi musamu mowunuwu, baamoni boomo bu bwafulala.

Bilumbi byakasa bimangu bibilahi

¹² Bilumbi byakasa bilimbu na bimangu bibilahi bya kimwili, ŋa hati la baatu. Basambili boosi mu itwadi, baakatsonzomo ŋa mbongi yi baakateele «Mapombo ma Soolomo».

¹³ Muutu wu avele a hiitu tso mumosi, a hakayehele ukoto mu konge a bo ve. Tso bu baatu boosi baakayusa bo.

¹⁴ Babahala na bakasu babalahi baakasa hiitu mu Pfumu. Baatu mobaana baapfunisi litangu la banga a hiitu.

¹⁵ Baatu baakabehe babeedu mu manzila na baakalasa bo ŋa yulu mataangi na bipooyi. Mana bu Peetelo huvyoho, inzinza hya nde ifuha tso mumosi mu bo.

¹⁶ Makonge ma baatu baakamata ka hu misyenge mya bebele na Yeruselemi. Bo baakabehe babeedu, na baatu ba mavupu mamabi maakakwamisa, na boosi baakabeloho.

Baamiikwamisa bilumbi

¹⁷ Ni mu buuna, mukuutu banganga ba Nzambi, na boosi ba baaba na nde, kabu loosi li Basaduki, laluuli mu nyengi bilumbi.

¹⁸ Bo baatumi mu ukanga bilumbi na baabwahi bo mu kondaayi yinene.

¹⁹ Ka ŋa butsuhu, pofi a Pfumu adibuli bidibuhu bya kondaayi, nde apalisi bilumbi. Na nde aleeli bo:

²⁰ «Yenaani hu nzo a Nzambi. Ni huuna benu lu uyabisa baatu, mambu moosi ma maatala monyi wu munyatihi.»

²¹ Bilumbi byasiingi, byo byayeni hu nzo a Nzambi tsumba a ngwali, na byabandihi ulongese baatu. Mukuutu banganga ba Nzambi, na boosi ba baakasala na nde, baateeli bakuutu ba Isereli mu utsonzomo mu pfuundu yinene. Na baatumisi masadaadu, mu uyavolo bilumbi hu nzo a kondaayi.

²² Mu tangu yi masadaadu mayato hu nzo a kondaayi, mo a maabiisi bilumbi ve. Masadaadu maafutihi hu pfuundu, maayava ikumbu mohinihi:

²³ «Bisu liyabiisa nzo a kondaayi baadibuha bubwe, na bakeedi ba yo, mu mambuha ma bo ŋa busu bu minywanzo. Ka bu bisu lidibuli bidibuhu, bisu a limoni muutu hu hati ve.»

²⁴ Mu uyuha ikumbu mohinihi, mutumi masadaadu wa nzo a Nzambi na bakuutu ba banganga ba Nzambi, matsimi maasuki. Na baakafulasana ti: «Dyambu molinili, buni livyohi?»

²⁵ Titswene muutu mumosi ayayaabisa bo: «Yuhaani! Baatu ba benu laabwaha mu kondaayi, babanaa mu litandala la nzo a Nzambi mu ulongese baatu.»

²⁶ Buuna mutumi masadaadu ayeni na bakeedi ba nde, mu usaha ubwebehe bilumbi. Ka bo a baayeni na lwanisa ve, mu toni ati bo baaba na boomo ti baatu balanga bo mamanya.

²⁷ Bu bo baabehi bilumbi, mu utsundasa byo ŋa busu bwa pfuundu, mukuutu banganga ba Nzambi akava byo byuhu.

²⁸ Nde aleeli bo: «Bisu laasa benu mukele mu mifudi mu ubwevelelongese mu nduhi a muutu mowuuna. Ka benu ki lo livangi? Benu limiitsala ndongisili a benu mu musyenge a Yeruselemi woosi, na benu litondi ususa pfuta lipfu la nde ŋa yulu a bisu!»

²⁹ Buuna Peetelo na bilumbi bikima baafutili bo: «Hwafwana mu usiingala Nzambi, ka a baatu ve.

³⁰ Nzambi bakaaha ba bisu amiisuula Yisu mowunuwu, wu benu laadubi mu ukomene ŋa muti a kuruwa.

³¹ Nzambi asyenuli nde mu matwala ma nde, abyalisi nde we Pfumu na Muyobili. Nzambi hasiidi buuna, mana bisu Isereli basobo mbiili a bo, na bayaka nyahulili masumu ma bo.

³² Bisu lili bambangi ba misamu momiina, bisu na Livupu la Ngidi, li Nzambi havidi ba bali mu usiingala nde.»

³³ Baatu ba pfuundu banzonzi badasuhi mu mifudi, bu bo baayuhi mambu momaana, na bo baakatondo uduba bilumbi.

³⁴ Ka hwaba ŋa hati la bo, mufarisi mumosi nduhi a nde Ngamalyeli. Nde aba mulongisi mikele, wu baatu boosi baakakiinza. Nde atelimi ŋa hati la pfuundu banzonzi, na atumi mu upalisa bilumbi mu mwana tangu.

³⁵ Titswene nde aleeli huli boosi: «Kebaani! Benu bisu Isereli, mu ma benu luvangila baatu mobaniba.

³⁶ Hwavyohi mwana a tangu yindahi, muutu mumosi nduhi Tedaasi, akamonehele ti nde muutu wu munene. Baatu bebele na makama mana (400), baakaduukala nde. Ka bu baadubi nde, baatu boosi ba baakasa hiitu mu nde, baatsamuhi na buli la nde laanyambini.

³⁷ Ŋa mbisa a nde, mu tangu yi usonehe litangu la baatu ba mutsi, hwabwepala Yuda musi Ngalili. Nde kaka abwetelemese baatu babalahi, mu uduukala nde. Nde kaka baadubi, na boosi ba baakasa hiitu mu nde, baatsali bo.

³⁸ Bunuubu, me ndeele benu: Nyahani utsundana mu baatu mobaniba, nyahulaani bo bayene. Ka umono ti, matsimi ma bo na mavanga ma bo mali ma imuutu, mo mu udimbala mu nzila.

³⁹ Ka tso mbuli mo mamati huli Nzambi, benu a lutwala utsala mo ve. A liyehele ulwanisa Nzambi ve!» Baatu ba pfuundu banzonzi, baasilisi matsimi ma Ngamalyeli.

⁴⁰ Bo baateeli bilumbi, baatumi masadaadu mu utete bilumbi bikooti, na baaviidi byo mukele mu ubweveletoyo mu nduhi a Yisu. Titswene, bo baanyahuli byo.

⁴¹ Bilumbi byapali mu nzo a pfuundu banzonzi na kinya yoosi, mu umono ti bo baakwasi iteesi hi ubiingala munyongi mu nduhi a Yisu.

⁴² Na pasi ilumbu, mu nzo a Nzambi na mu manzo ma bo, bo baakahwada mu ubaalongese na ubaayabisa Musamu wu Mubwe ti Yisu ni Masiya.