Mavanga 4 - Musamu wu Mubwe

Peetelo na Yowani ŋa busu bwa pfuundu banzonzi

¹ Bu Peetelo na Yowani baaba kini mu uyambila na baatu, banganga ba Nzambi, na mukuutu bakeedi ba nzo a Nzambi, na Basaduki baayidi.

² Bo baaluuli mu kesi yindahi mu umono bilumbi bibyole mu ubaalongese baatu. Byo byakayabisa ti mu Yisu, babaakwa utwala usuha mu lipfu.

³ Ni mu buuna, bu busi bwaba bwakalala, baakangi na baabwahi byo mu kondaayi te ŋa ngwali.

⁴ Ka, ŋa hati la ba baayuhi mambu ma Nzambi, babalahi baasiidi hiitu mu Yisu. Buuna, litangu la baatu latodi bebele a biveeve bitanu (5000).

⁵ Mu ilumbu hi hyaduukili, bapfumu ba Bayudaayo, itwadi na bakuutu ba bo, na milongisi mi Mikele, baakukimi hu musyenge a Yeruselemi.

⁶ Hwaba huuna: Ane mukuutu banganga ba Nzambi, Kayife, Yowani, Alezande, na baatu boosi ba ibandu hya nde.

⁷ Bo baabiti bilumbi ŋa busu bwa bo, na bafuuli byo: «Mu ki matwala, buve mu nduhi a na benu limiibeloso muutu mowunuwu?»

⁸ Buuna Peetelo, bu haluuli mu Livupu la Ngidi aleeli bo: «Bapfumu na bakuutu ba Bayudaayo, yuhaani!

⁹ Loloyi bali mu uva bisu byuhu, mu toni libwe li bisu limiisa huli muutu wu beedi na miilu mi myavolo. Benu lili mu usaha utsikaha buni nde habeluhi.

¹⁰ Bisu litondi ti benu litsikaha dyambu molinili bubwe, benu boosi, napa baatu ba Isereli boosi. Tso bahala molinili, lili polo ŋa busu bwa benu, ni mu toni a nduhi a Yisu Kristo, musi Nazareti. Yisu wu benu laakomini ŋa muti, na wu Nzambi hasuuli ŋa hati la babaakwa.

¹¹ Yisu ni: “Manya li benu batungi laanyanzi, na li laakituhi manya la ngu ŋa itungu.”

¹² Liyobolo ndulu mu nde lili. Mu tsi yoosi, Nzambi a hava muutu mukima ve ŋa hati la baatu, wu ufuuhasa bisu a benu.»

¹³ Baatu ba pfuundu bakuutu baakimuhi hu ulahi, mu umono tsiki a Peetelo na Yowani. Bo baamoni ti bo baatu ba baakulamana, na ba baavele a nzaabili. Bo baayabi ti, bo baaba itwadi na Yisu.

¹⁴ Ka bu bo baakamono muutu wu abeluhi ateleme ŋa pedu a bo, bo a baabahi dyambu li ukaala ve.

¹⁵ Buuna, bo baatumi bo mu upala mu nzo, na baasaali mu ukese musamu ŋa hati la bo.

¹⁶ Bo baakalelesene: «Ipadi mo hya mbuli, bisu a benu hima lu usaani mu baatu mobaniba? Mu toni ati, baatu boosi ba Yeruselemi, baayabi bubwe ti ipadi mohinihi mbuli bo baasiidi hyo, na bisu a benu utwala utuna hyove.

¹⁷ A hu uli bubwe ve ti dyambu molinili lisinzatsamuha ŋa hati la baatu. Lilihaani bo na bukanyi bwosi, bo mu ubweveletoyo mu nduhi a Yisu huli pasi muutu.»

¹⁸ Bo baabweteele Peetelo na Yowani, na baakali bo mu mifudi mu utangula na mu ulongese baatu nduhi a Yisu.

¹⁹ Ka Peetelo na Yowani baakaali bo: «Monwani benu mwakulu, tso hwafwana ŋa busu bwa Nzambi mu usiingala benu na uvelesiingala Nzambi.

²⁰ Ka bisu, bisu utwala ubisa mu uyambila mu mambu ma bisu laamono na laayuha ve.»

²¹ Baatu ba pfuundu banzonzi baakanini bo, titswene baanyahuli bo. Bo a baabahi toni yi usyembe Peetelo na Yowani ve, mu toni ati, baatu boosi baakayusa Nzambi mu mambu ma maavangimi.

²² Bahala mo li laabeeluhi mu ipadi, aba amiivyoso maku mana ma bilima.

Lisambulu la banga hiitu

²³ Bu baanyahuli bo, Peetelo na Yowani baayeni huli bambaahi ba bo. Baayabisi bo ma bakuutu ba banganga ba Nzambi na bakuutu ba bibandu baaleeli bo.

²⁴ Bu bo baamani uyuha bo, bo boosi baabaandihi usambila Nzambi na uleele: «Pfumu, we ni wu avangi mayulu, toto, mubu na byosi bibili muuna.

²⁵ We ni wu aleele mu Livupu la Ngidi li laatoyi mu munywa a kaaha a bisu Davidi, musalili a we ti: “Muhima mabuli ma matsi ma bumwenyi maaminyangumana? Na matsi maamikuta mapfuundu ma mupu!

²⁶ Batumi ba toto baamivangama mu mudingu na bakuutu baamipfutana mu ulwanisa Pfumu na Masiya wu nde hasoolo.”

²⁷ Ni mbuli: Eloode na Ponse Pilaato baamipfutana mutso musyenge mowunuwu. Bo baamipfutana itwadi na baatu ba matsi ma bumwenyi, na bisu Isereli, mu ubelele musalili a we wa ngidi, Yisu. Nde wuuna wu we asoolo Masiya.

²⁸ Bo baavangi maana moosi, we bu we atondi na akeesi mo mu hati a tsomi, mu matwala ma we.

²⁹ Pfumu, mu tangu yiniyi, mono bu bo bali mu umwese bisu pasi, na va basalili ba we mifudi mi uyalongese mambu ma we na hiitu hyosi.

³⁰ Mwese matwala ma we, mana babeedu babeeloho. Nyaha bilimbu na bimaangu bivangama mu nduhi a Yisu, musalili a we wa ngidi.»

³¹ Bu bo baakasambila, mbuha yi bo baaba baakukama yanyingimi. Bo boosi baaluuli mu Livupu la Ngidi, na bo baakayabisa mambu ma Nzambi na hiitu hyosi.

Banga hiitu baakakabasana busina bwa bo

³² Konge a banga a hiitu, yaba na matsimi mamosi, na mutima mumosi. A hwaba na muutu wu akaleele ti busina bwa nde, bwa nde siha ve. Ka byosi bi bo baaba na byo, aba bi itwadi.

³³ Na mifudi mimilahi, bilumbi byakata imbangi mu toni a tsuuhili a Pfumu Yisu. Nzambi akava bo boosi hyese hi ilahi.

^34-35 A hwaba na mumosi wu akakiima isiha ve. Mu toni ati, ba baaba na mangundu buve manzo, baakasumbasa na baakava mbongo a fwanda huli bilumbi. Titswene bilumbi byakakaba mbongo huli muutu-muutu we bu hwaba manzala ma nde.

³⁶ Hwaba na muutu mumosi nduhi Yosefi, wu baabuti hu iliiŋa hya Kipere, wu ibandu hya Levi. Bilumbi byakateele nde Baranabasi, mbindulili a nduhi ti: «wu ubaabombesele».

³⁷ Nde asumbisi tsyehe yi nde haba na yo, abehi mbongo, na aviidi yo huli bilumbi.