Mavanga 26 - Musamu wu Mubwe

Pahuli akali nyutu a nde ŋa busu bwa pfumu Agilipa

¹ Agilipa aleeli Pahuli: «We na muswa mu ukala nyutu a we.» Buuna Pahuli alabi hoho, na abaandihi ukala nyutu a nde. Na aleeli:

² «Me ndi na kinya, pfumu Agilipa, mu ukala nyutu a me loloyi, ŋa busu bwa we, mu moosi ma Bayudaayo bali mu ukese me.

³ Mu toni ati, we yaabi bukulu bu Bayudaayo boosi, na misamu myosi mi bo bubaakakana mu myo. Ni mu buuna, me pondi we mu uyuha me mu isuusi.»

⁴ «Bayudaayo boosi bayaabi mbiili a me, umata bufudu bwa me. Bo bayaabi ka ndyatili a me, umata hu me akakula mu bufudu bwa me, ŋa hati la buli la me na hu Yeruselemi.

⁵ Bo bayaabi me umata beleve. Tso batondi, bo utwala uta imbangi, ti me andyati we mufarisi mu kwasili mikele mya kabu li Bafarisi. Kabu li laafulala kwadili mu makabu ma Bayudaayo moosi: ni kabu li Bafarisi.

⁶ Bunuubu bali mu utsundasa me, mu toni ati me ndi mu utsingama na kwadili mu lahi li Nzambi hasiidi huli bakaaha ba bisu.

⁷ Bibandu kuumi byole (12) bya buli la bisu, bili mu usa hiitu mu umono tswihili a lahi moliina. Buuna, bibandu kuumi byole mobiina, bili mu usalila Nzambi na mukami nyangu na butsuhu. Ni mu toni a hiitu mohina, pfumu Agilipa, Bayudaayo bamiikese me.

⁸ Benu Bayudaayo ba laavele na imiinu mu matwala ma Nzambi, saani hiitu ti Nzambi ubaasuula babaakwa!

⁹ Me mwakulu atsimi ti, aba hwafwana mu ulwanisa buli la Yisu musi Nazareti, mu manzila moosi.

¹⁰ Ni mambu momaana me atsi ka hu Yeruselemi. Me anzaki lituma li bakuutu ba banganga ba Nzambi, na me akotisi mu kondaayi, babalahi mu ba baakasila Yisu hiitu. Na ŋa baakava kesili mu uduba bo, humbisa utsundasa bo, me akatsilasa.

¹¹ Tangu yoosi, ŋa me akanzyene mu manzo ma lisambulu ma Bayudaayo, me akatsyembe bo na mifudi myosi. Me akakwamisa bo mu utunala Nzambi. Mu bunono bwa kesi a me mu bo, me akambingasa bo nate mu misyenge mi bumwenyi.»

Pahuli ayabisi kiinguli buyedi a nde

¹² «Ni mu buuna, me anzyeni hu musyenge a Damaseko, mu lituma na isalu bi bakuutu ba banganga ba Nzambi baaviidi me.

¹³ Pfumu Agilipa, bu me amba mu nzila, tswamina mu uto mwangulu, me amoni liyalala li laamati hu yulu. Liyalala mo, laaluta nyangu umwedeme. Lo laayadiinga me na bambaahi ba me ba mudyenge.

¹⁴ Bisu boosi laabwidi ŋa toto. Na me anzuhi ndaha mosi yi yaakaleele me mu Ibeleho: “Sahuli, Sahuli, mu ki toni we li mu ukwamisa me? Ndulu mu mwana tangu hole, we li mu uruma ŋa busu bwa Nzambi, we ibulu ŋa busu bu likaanda la pfumu a hyo.”

¹⁵ Me apfuuli: “Pfumu, we na?” Na Pfumu afutili: “Me ni Yisu, wu we li mu ukwamisa.

¹⁶ Ka suuha na teleme. Me miinzamonehele na we, mana we ba musalili a me. We uba mbangi a me, mu uyayabisa bakima, buni we miibwana na me loloyi. We uyayabisa bo mambu moosi, ma me umbwemwese we.

¹⁷ Me unzobolo we ŋa busu bwa buli li Bayudaayo, na ŋa busu bu mabuli makima ma me utsindaha we huli mo.

¹⁸ Me ndi mu utsindaha we, mana we dibula bo miisu. Me ndi mu utsindaha we, mana we palisa bo mu piipidi, mu uvyoso bo mu liyalala. Me ndi mu utsindaha we, mana we palisa bo hu tsina matwala ma Satana, mu ususa bo hu tsina lituma la Nzambi. Bu bu usiila me hiitu, Nzambi unyahula masumu ma bo, na bo bu ubaha mbuha ŋa hati la ba Nzambi hamiisoolo.”»

Pahuli atoyi mu isalu hya nde

¹⁹ «Ni mu buuna, pfumu Agilipa, me a hambisa ukuhasa imono miisu hi hyamata hu yulu ve.

²⁰ Ka me anzaabisa Musamu wu Mubwe, tsomi huli bisu Damaseko, bisu Yeruselemi, ba itanzi hya Yuda yoosi na ba matsi makima. Me ateele bo mu usobo mbiili. Bo bakiinguha huli Nzambi, na umwese mu mavanga tsobiili moyina.

²¹ Ni mu buuna, Bayudaayo baayakanga me, bu me amba mu litandala la nzo a Nzambi na baasahi uduba me.

²² Ka Nzambi li mu ukeelese me nate loloyi. Na me ndi ŋa mu uta imbangi hya me huli baatu boosi, huba bangebe tso bakuutu. Me ndi mu undoongese pila mosi ma mimbihuli mya tangu yikulu na Moose, baayabisi, mi myafwana uvangama mu Kristo.

²³ Kristo umono pasi, na nde uba muutu watsomi mu usuuha ŋa hati la babaakwa. Nde uyayabisa Musamu wu Mubwe, wu uli we liyalala li lu uyalusa nzila a bisu, ni we nzila yi mabuli makima moosi.»

²⁴ Bu nde haba mu ukala nyutu a nde, mutumi Fesitusi aleeli na mifudi: «Pahuli, we ka ladi! Bu we amiisinzayiha, buyedi bwaka mu uyamisa we ladi!»

²⁵ Pahuli afutili nde bu: «Me a handi na ladi ve, we Fesitusi nga mifwende, mambu ma me ndi mu undeele, mali ma mbuli na ma tsiki.

²⁶ Pfumu Agilipa kaka asiinzayaba misamu mominimi, na me ndi mu unzabisa myo na ibahala hyosi ŋa busu bwa nde. Mu toni ati, me nzaabi ti nde a hadimbala pasi dyambu ve, mambu momanima maayabana huli boosi.

²⁷ Pfumu Agilipa, we li mu usa hiitu mu mambu ma mimbihuli myayaabisa? Me nzaabi ti we li mu usa mo hiitu.»

²⁸ Agilipa afutili huli Pahuli: «We li mu utsima ti we ukiingula matsimi ma me, mu mwana a tangu hoole moyi, mu usiingama mu Kristo a we?»

²⁹ Pahuli aleeli: «Tso mu mawasa ma, tso hu busu, me ndi mu utsaambila Nzambi, mana benu boosi ka lisiingama mu nde. Peyu a me ni ti, benu boosi ba lili mu uyuha me loloyi, likituha we me, hwavele mapanga momanima!»

³⁰ Pfumu Agilipa, mutumi Fesitusi, Belinisi na boosi ba baaba na bo, baatelimi.

³¹ Na bu bo baayeni, bo baakalelesene: «Bahala molinili a hasa pasi dyambu li lu uva nde lipfu, tso ukotese nde mu kondaayi ve.»

³² Na Agilipa aleeli Fesitusi: «Nde kiiba bunyanga, kini nde a hasaha umono Kayisaali ve.»