Mavanga 25 - Musamu wu Mubwe

Pahuli li mu ukala nyutu a nde ŋa busu bwa Fesitusi

¹ Bilumbu bitatu bi byaduuki nziili a nde hutso itanzi, pfumu Fesitusi amati musyenge a Sezare mu uyene hu musyenge a Yeruselemi.

² Bakuutu ba banganga ba Nzambi na bangeele ba Bayudaayo, baayakese Pahuli ŋa busu bwa pfumu mowunuwu. Bo baalembisini nde,

³ mu uvangila bo dyambu li lumwese bo kinya, mu ufutala Pahuli hu musyenge a Yeruselemi. Bo baasiidi buuna, mu toni ati bo baakuti pfuundu mu uduba nde mu nzila.

⁴ Ka Fesitusi afutili na aleeli: «Pahuli mu kondaayi ali hu musyenge a Sezare. Me mwakulu a utaamba mu dwe huuna ve.»

⁵ Nde abweleele li: «Nyaha bakuutu ŋa hati la benu bakulamana na me hu musyenge a Sezare. Na bo bayakese bahala molinili, tso nde avanga dyambu lilibi.»

⁶ Fesitusi avyosi ndulu bilumbu poombo buve kuumi na bo, titswene nde afutihi hu musyenge a Sezare. Mu ilumbu hi hyaduuki, nde ayeni hu nzo a tsundusu na nde atumi babehele nde Pahuli.

⁷ Bu Pahuli hayato, Bayudaayo ba baamati hu musyenge a Yeruselemi baayadiinga nde. Bo baakwihili nde matonyi mamalahi ma manono, hwavele utwala umwese bumbuli bwa mo.

⁸ Ka Pahuli akakala nyutu a nde. Na akaleele: «Me a hatsa lisumu tso limosi ve, tso ŋa busu bu mikele mi Bayudaayo, tso ŋa busu bwa nzo a Nzambi, tso ŋa busu bu lituma la pfumu a tsi, Kayisaali.»

⁹ Fesitusi wu akasaha bukaanga na Bayudaayo, afuuli Pahuli: «We siingi uyene batsundasa we, mu dyambu molinili ŋa busu bwa me, hu Yeruselemi?»

¹⁰ Pahuli afutili: «Me miiteleme ŋa busu bwa tsundusu yi yili hutso lituma la Kayisaali, ni ŋa baafwana utsundasa me. Me a hatsa dyambu lilibi huli Bayudaayo ve, we bu we mwakulu yaabi lo bubwe-bubwe.

¹¹ Tso me ndi na matonyi, buve tso me apaanga dyambu li bafwana uduba me, me a humbata lipfu ve. Ka tso baatu mobaniba bali mu ukwiha me matonyi ma upfuta, a huli na muutu wu uli na muswa mu uvahula me ŋa myoho mya bo ve. Me tondi ti lituma la Kayisaali, litsundasa me.»

¹² Buuna, Fesitusi bu hamani pfuundu na batsyengi ba nde, afutili: «We miitondo ti Kayisaali nde mwakulu nga tsi, atsundasa we. We sa yene ŋa busu bwa nde.»

Pahuli ŋa busu bwa pfumu Agilipa na Belinisi

¹³ Humbisa a mwa bilumbu, pfumu Agilipa na Belinisi kedi a nde, baayidi hu musyenge a Sezare mu uyasuula Fesitusi.

¹⁴ Bu bo baavyosi bilumbu bibilahi huuna, Fesitusi ayabisi huli mutumi musamu a Pahuli. Nde aleeli bu: «Me ndi ŋa na bahala limosi, li Felikisi hasiisa hutso a kondaayi.

¹⁵ Ŋa me anzyeni hu Yeruselemi, bakuutu ba banganga ba Nzambi, na bakuutu ba Bayudaayo, baayakese muutu mowunuwu. Na baayavondo me mu ukotese nde mu kondaayi.

¹⁶ Me anzaabisa bo ti bisu Looma a bali na ipfu hi uvahula pasi nde hu lipfu, hwavele nde umaakala nyutu a nde ŋa busu bu matonyi ma baakese nde ve.

¹⁷ Na bo baayidi ŋa na me. Mu mawasa, ilumbu hi hyaduuki, me atumi mu ubehele me bahala molinili na me apaangi dyambu.

¹⁸ Ba baayakese nde bu baayidi, me amoni ti matonyi ma bo baakesi nde, a maaba we bu me akatsima ve.

¹⁹ Toni ndulu ukaakana mu biyusili bya Nzambi a bo mwakulu. Bo baakakaakana ka mu toni a muutu mumosi wu bali mu uteele Yisu, wu akwa. Pahuli li mu usilasa ti, nde monyi ali.

²⁰ Aba pasi huli me, mu ukese musamu wa pila yina. Mono bu me apfuula nde tso nde tondi uyene hu musyenge a Yeruselemi, mana batsundasa nde huuna.

²¹ Ka Pahuli abisa buuna. Nde avondi ti bayavanga dyambu la nde ŋa busu bu lituma la nga tsi, Kayisaali. Buuna, me atuma bakeelese nde mu kondaayi, tswamina me tsindaha nde huli Kayisaali.»

²² Agilipa aleeli Fesitusi: «Me kaka tondi uyuha bahala molinili.» Fesitusi afutili: «Ngwali we uyuha nde.»

²³ Ilumbu hi hyaduuki, Agilipa na Belinisi baayidi mu konge na muyusu woosi, na baakoti mu nzo a tsundusu. Bo baakoti na bakuutu ba masadaadu na ba bubaatuma musyenge. Fesitusi atumi babehe Pahuli.

²⁴ Na Fesitusi aleeli: «Pfumu Agilipa na benu ba lili na bisu, benu lili mu umono bahala molinili. Buli li Bayudaayo loosi laayakese nde huli me, umata hu Yeruselemi nate huni. Bo bali mu ubafulaha mu mifudi, ti bafwana uduba nde.

²⁵ Me amono ti nde a habuka dyambu, li bafwana uduba nde mu love. Ka nde mwakulu, bu hatondi ti nga tsi Kayisaali avanga dyambu la nde, me moni ti hwafwana me mu utsindaha nde ŋa busu bwa nga tsi.

²⁶ Ka me a ndi na la tsiki mu usonehe huli nga tsi mu toni a Pahuli ve. Ni mu buuna, me tondi ti batsundasa nde ŋa busu bwa we, pfumu Agilipa. Me atsiidi buuna, mana me mbaha ma me utsonehe, humbisa a byuhu bya we.

²⁷ Mu toni ati, a hwafwana mu utsindaha ikondaayi hu Looma, hwavele uyabisa mu tsiki, matonyi ma kesili a nde ve.»