Mavanga 24 - Musamu wu Mubwe

Bayudaayo baakesi Pahuli hu lituma la Looma

¹ Bilumbu bitaanu bivyoho, mukuutu banganga ba Nzambi Ananya, akulimini hu musyenge a Sezare na mwa litangu li bakuutu, na muvoli milembe mumosi, nduhi Teletuluusi. Bo baayakese Pahuli ŋa busu bwa Felikisi wu aba mutumi.

^2-3 Baateeli Pahuli na Teletuluusi abaandihi ukese nde. Na nde aleeli bu: «Felikisi wu asinzakuha mu uyaka mifwende, mu toni a we, bisu lili hutso a kinya yi yakuha na mu toni lituma la we, tsoboono na hyenze bya yakoto mu bubwe bwa tsi a bisu Bayudaayo. Mu moosi ma bisu lili mu uyaka mu tangu yoosi na pasi tsyelo, lifutili we matondo mamalahi.

⁴ Ka me atondi uvolo we tangu yindahi ve. Buuna, me pondi huli we mu umwese litondo mu uyuha bisu mu mwana tangu hole.

⁵ Bisu limiimono ti bahala molinili, lili muutu wu afulala bubi, bu nde ali mukuutu a kabu la Nazareti. Nde li mu ukotese hyalasasa ŋa hati li Bayudaayo ba ŋa toto yoosi.

⁶ Nde asaha pa usumana bungidi bwa nzo a Nzambi. Mono buni bisu limiiyakaanga nde. [Bisu likiitsundasa nde we bu huli mikele mya bisu.

⁷ Ka mukuutu balwani Lisyasi bu ayidi, nde miiyapatula Pahuli ŋa myoho mya bisu, na mifudi myosi.

⁸ Mukuutu balwani Lisyasi, atumi ba baakatsundasa nde, mu uya ŋa busu bu lituma la we.] Tso we fuuli nde, we sa mono we mwakulu imbuli hya moosi ma bisu lili mu ukese nde.»

⁹ Bakuutu ba Bayudaayo baasilisi, na baleeli ti ni tsiitsa hwa nde.

Pahuli alwanili nyutu a nde

¹⁰ Mutumi avondi Pahuli mu utoyo. Na Pahuli aleeli: «Me nzaabi ti umata bilima bibilahi, we li mu usa buzonzi mu tsi moyiniyi na bukuhu bwosi. Ni mu buuna, me ukala nyutu a me na hiitu ŋa busu bwa we.

¹¹ We bu we utwala utsikaha lo we mwakulu, bilumbu kuumi byole a byavyoho ve, li me anzyeni hu Yeruselemi mu ukunda Nzambi.

¹² Pasi muutu a hamono me hutso a nzo a Nzambi mu usongo, buve mu utuumbasa baatu ve. Me a hapaanga buuna ve, tso hwaba hu nzo lisambulu yi Bayudaayo, tso pasi tsyelo hutso musyenge.

¹³ Baatu mobaniba a baatwala umwese, mu ki toni batondi utsundasa me ve.

¹⁴ Ka, me ndi mu utsiinga li ŋa busu bwa we. Me miikoto mu usalila Nzila a Yisu, yi bo bali mu umono we kabu li latahuha na mikele. Ka me ndi mu utsalila Nzambi bakaaha ba bisu. Na me ndi mu utsa hiitu mu moosi ma baasonehe mu tso Mikele na Mimbihuli.

¹⁵ Me ndi na hiitu mu Nzambi. Hiitu hi bo mwakulu bali na hyo, ti baatu bababwe we bababi sa basuuha humbisa lipfu.

¹⁶ Ni mu buuna, me ndi mu utsa mifudi mu uveleba na dyambu lilibi hutso mutima a me, ŋa busu bwa Nzambi, na ŋa busu bwa baatu.»

¹⁷ «Bilima bibilahi bu byavyohi, me anzapfutaha hu musyenge a Yeruselemi. Me anzapfutaha mu ubehe likumbasa la mbongo huli baatu ba tsi a me, na ubehe bungodu ŋa busu bwa Nzambi.

¹⁸ Mono ma me amba mu usa, ŋa bo baayabiisa me mu litandala la nzo a Nzambi. Me akoti mu utsyemese nyutu a me, a hwaba na tso konge a baatu mu paanga a me, tso kele ka ve.

¹⁹ Ka mwana kabu li Bayudaayo ba itaandzi hya Asiya, baaba ŋaana. Ni bo baana bakiiteleme ŋa busu bwa we, mu uyakese me, tso bo bali na li usyembe me.

²⁰ Buve, baatu moba baleele ŋaniŋa, ki dyambu lilibi li bo baamono mu me, ŋa bo baakatsundasa me ŋa busu bwa pfuundu bakuutu ba Bayudaayo.

²¹ Peleve bo baakaangila me piinga, mu toni a ma me anzaabisa na mifudi myosi, ŋa busu bwa bo. Me atelimi na me andeeli: “Bali mu utsundasa me loloyi ŋa busu bwa benu, mu toni ati, me ndi mu utsa hiitu mu tsuuhili a babaakwa!”»

²² Mutumi Felikisi, wu aba asinzatsikaha ndogisili ya nzila a Yisu, aswehisi mambu. Na aleeli huli bakesi ba Pahuli: «Ŋa mukuutu balwani Lisyasi hu uya, me tsa paanga musamu a benu.»

²³ Nde atumi mukuutu masadaadu mu ukeelese Pahuli, na uva nde mwa bunyanga. Nde aviidi muswa huli bambaahi ba nde mu uva nde likumbasa.

²⁴ Mwa bilumbu bu byavyohi, Mutumi Felikisi ayidi na mukadi a nde Durusiile, wu aba Muyudaayo. Nde atsindihi baatu mu ubehele nde Pahuli. Nde ayuhi ma Pahuli haba na mo, mu uyabisa mu tsiili a hiitu mu Yisu Kristo.

²⁵ Pahuli hakalongese bo, mu dyambu la mbiili yi yafwana ŋa busu bwa Nzambi, na buni hwafwana mu utuma nyutu, na mu dyambu la tsundusu a Nzambi yi yi uya. Humbisa uyuha maana, Felikisi abahi boomo na aleeli nde: «Maana mamiikuha loloyi. Ŋa me umbaha tangu, me tsambweteele we.»

²⁶ Nde aba na hiitu ti, Pahuli akiiva nde mbongo. Ni mu buuna, nde hakatsiha nde tangu yoosi mu ubaamoho na nde.

²⁷ Bilima byole bivyoho, Polosiyusi Fesitusi akisini ŋa mbuha a Felikisi. Nde asiisi Pahuli mu kondaayi, mu umwese kinya huli Bayudaayo.