Mavanga 23 - Musamu wu Mubwe

¹ Pahuli asungimini pfuundu Bayudaayo, na aleeli: «Baana ba ngu, me miitsalila Nzambi te ilumbu hya lolo, hwavele munyongo tso hoole.»

² Mukuutu banganga ba Nzambi Ananya, atumi ba baaba ŋa pedu a Pahuli, mu utete nde mu munywa.

³ Na Pahuli aleeli: «Nzambi sa asyembe we, we wa vilu-vilu! We li ŋa mu utsundasa me we bu huli mikele. Ka we miituma batete me hwavele uduukala mikele».

⁴ Ba baaba ŋa pedu a Pahuli baleeli nde: «We miituha mukuutu banganga ba Nzambi!»

⁵ Pahuli afutili: «Me a hakanzaba ve, baana ba ngu ti nde mukuutu banganga ba Nzambi ali. Mu toni ati mabaasonehe mali mu ulongese bu: “We lilibi uleele mu mukuutu ibandu hya we ve!”»

⁶ Pahuli aba ayaba ti pfuundu moyina aba kabu limosi li Basaduki, na lina li Bafarisi. Ni mu buuna, nde hafulihi ŋa busu bwa bo: «Bana ba ngu, me Mufarisi ndi, na me mwana Bafarisi. Mu toni a hiitu hya me mu tsuuhili a babaakwa, bali mu utsundasa me.»

⁷ Pahuli amana buuna uleele, kele yabwidi ŋa hati li Bafarisi na Basaduki, na burandu bwakoti ŋa hati li mukungi.

⁸ Kele yabwidi mu toni ati, bo mwakulu Basaduki, baakaleele ti tsuuhili a babaakwa a yili ve, tso bapofi, tso mavupu. Ka uto ti Bafarisi, bali mu usiila hiitu mu mina myosi.

⁹ Baakasinzafulaha. Bakuutu ba mikele, ba mu kabu li Bafarisi baatelimisi paha yinene na uleele: «Bisu a limoni dyambu tso limosi lilibi mu bahala molinili ve. Na yaabi? Peleve livupu, tso pofi mumosi yamonehele na nde?»

¹⁰ Paha yarangili, na mukuutu balwani abati boomo ti baatu mobaniba a bayatsaaka Pahuli. Ni mu buuna, nde hatumi masadaadu mu ukulamana hu tsina hu kuungi laaba, mana bo bamaasa Pahuli ŋa hati la bo, mu uyafutala nde hu bula bu masadaadu.

¹¹ Butsuhu bu bwaduukili, Pfumu ayamonehele na Pahuli na aleeli: «Hwada! Mu toni ati we miitiila me imbangi huni, hu Yeruselemi. Ni buuna, we afwana ka uta me imbangi hu musyenge a Looma.»

Pfuundu Bayudaayo mu uvangila Pahuli bubi

¹² Humbisa hu busi bwakiidi, kabu li Bayudaayo laakuti pfuundu mu uduba Pahuli. Bo baateeli mvwanga mu bo mwakulu mu uveledya na uvelenywa, tso bo a badubi Pahuli ve.

¹³ Ba baakuti pfuundu moyina, baaba ba labuha maku mana ma baatu.

¹⁴ Bo baayamono bakuutu ba banganga ba Nzambi, na bakuutu ba Bayudaayo, na baayaleele bo: «Bisu limiiteele mvwanga mu bisu mwakulu, mu uveledya na uvelenwya, nate bu lu uduba Pahuli.

¹⁵ Buuna, benu mu itwadi na pfuundu bakuutu ba Bayudaayo, vondwani mukuutu balwani abehele benu Pahuli. Salilaani buyedi bu uleele ti, benu litondi utsikaha musamu a nde bubwe-bubwe. Hu tsyelo a bisu, bisu laamiivangama mu uduba nde, tswamina nde mu uyato huni.»

¹⁶ Ka mwana a kedi a Pahuli mumosi, ayuhi pfuundu moyiina. Nde ayeni hu bula bu masadaadu, akoti, na ayayelese Pahuli.

¹⁷ Buuna Pahuli ateeli mumosi mu bakuutu ba masadaadu. Nde aleeli nde: «Bita mufudu mbahala mowunuwu, huli mukuutu balwani. Mu toni ati, nde na dyambu li uyabisa nde.»

¹⁸ Mukuutu masadaadu abiti nde huli mukuutu balwani na aleeli: «Ikondaayi Pahuli miteele me na milembesene me mu ubehele we mufudu mbahala mowunuwu. Nde na dyambu li uyabisa we.»

¹⁹ Mukuutu balwani avoli mufudu mbahala mu hoho, na ayeni na nde ŋa muvanga. Nde afuuli nde: «Ki dyambu we li na lo mu uyaabisa me?»

²⁰ Mufudu mbahala afutili: «Bakuutu ba Bayudaayo baamiiyuhasana, mu uvondo we mu ubita Pahuli ngwali, ŋa busu bwa pfuundu bakuutu ba bo. Bo bamiiveloho ti, pfuundu yoosi yitondi utsikaha dyambu la nde bubwe-bubwe.

²¹ Ka a hayuha ma bo! Mu toni ati, litangu li lavyoho maku mana (40) ma baatu ba ŋa hati la bo, baamiiswemenene nde. Bo baamiiteele mvwanga mu bo mwakulu mu uveledya na uvelenywa, tso bo a badubi Pahuli ve. Bo baamiivangama, ka ndulu mvutu a we bali mu ukeele.»

²² Mukuutu aleeli huli mwana a kedi a Pahuli, mu uveleyabisa pasi muutu ma nde hayatoosele nde. Titswene, nde aviidi nde muswa mu ufutaha.

Pahuli bamiitsindaha hu musyenge a Sezare

²³ Titswene mukuutu balwani ateeli boole mu bakuutu ba masadaadu. Nde aviidi bo tumili: «Tsonzehani makama moole (200) ma masadaadu, maku tsambu (70) ma ba baayaba unama babuuru, na makama moole (200) ma banga makongo. Vangamaani mu uyene hu musyenge a Sezare, tsitsaha moyi, mu nguunga yi matatu humbisa a busi uyila.

²⁴ Vangimasaani ka babuuru mu ubita Pahuli na utoose nde huli Mutumi Felikisi, mbeenze ve, muhahusunu ve.»

²⁵ Ni mu buuna, mukuutu balwani mo usonehe muhanda mowunuwu:

²⁶ «Mutumi Felikisi nga mifwende, yaka mabwehe ma mamati huli me Koloode Lisyasi, mukuutu balwani.

²⁷ Bayudaayo beedi baakaanga muutu wu me miitsindaha we wunuwu, na ukana uduba nde. Bu me anzuha ti nde musi Looma, mu mawasa, me anzyene na masadaadu ma me, mu uyayobolo nde.

²⁸ Bu me atsaha uyaba toni yi Bayudaayo baakese nde, me ambita nde ŋa busu bwa pfuundu bakuutu ba Bayudaayo.

²⁹ Me amono ti, bo bali mu ukese nde, mu toni a mamali mu utala mikele mya bo. Ka a huli na dyambu lilibi li nde havanga, li lutwala ubita nde mu kondaayi buve hu lipfu ve.

³⁰ Bu baayayibusa me, ti Bayudaayo aba baamiikutala nde pfuundu mu uduba nde, mawasa-mawasa, me ataasa mu utsindaha we nde. Na me andeele huli ba bali mu utsuta nde, mu uyakese nde ŋa busu bu lituma la we.»

³¹ Masadaadu makuhisi we bu baatumi mo. Bo baavoli Pahuli na baabiti nde butsuhu-butsuhu, hu musyenge a Antipati.

³² Ilumbu hi hyakaduuka, masadaadu ma maakayene na nde mu miilu, maafutihi hu bula bwa mo. Na baasiisi babaaba na babuuru, mu uhwada mu mudyenge na Pahuli.

³³ Bu baatoodi hu musyenge a Sezare, bo baaviidi muhanda mo huli mutumi, na baamwesi nde Pahuli.

³⁴ Mutumi ataanga muhanda mowuna, nde afuuli Pahuli, mu ki itanzi nde hamata. Bu nde hayabi ti Pahuli aba musi Silisiya,

³⁵ nde aleeli nde: «Me tsa pfuula we byuhu ŋa ba baayakese we bu uyato.» Na nde atumi mu ususa nde hutso ibanga hya Eloode.