Mavanga 22 - Musamu wu Mubwe

Ikumbu hya Pahuli huli bisu Yeruselemi mu ulwanila nyutu a nde

¹ Pahuli aleeli bo: «Baana ba ngu na bataata ba me, bunuubu yuhani ma me tondi uleele benu, mu toni ulwanila nyutu a me.»

² Bu bo baayuhi ti nde li mu utoyo mu ndaha Ibeleho, bo baasinzisa tsitsii. Na Pahuli aleeli:

³ «Me Muyudaayo ndi, wu baabuta hu musyenge a Tarese, mu itanzi hya Silisiya. Me ni ŋa Yeruselemi ŋa baabuuhasa. Mulongisi Ngamalieli ni wu ayihisi me mu uduukala bubwe-bubwe, mikele mi bakaaha ba bisu. Me ambeedi na lehemene mu Nzambi, we bu benu boosi lili mu usa loloyi.

⁴ Me akwamisi nate hu lipfu, boosi ba baakaduukala Nzila a Yisu. Me atumisi ukanga na ubwaha mu kondaayi, bakaasu na babahala.

⁵ Mukuutu banganga ba Nzambi na pfuundu bakuutu, utwala uta imbangi mu imbuli hya me. Me anzaki mihanda mya tumili mi baaviidi me, mu utoosele huli baana ba ngu ba musyenge a Damaseko. Me atoodi hu musyenge mowuna, mu uyakaanga buli la Yisu, na ubehe lo hu musyenge a Yeruselemi, mana lo liyaka tsyembili.»

Pahuli ayabisi Bayudaayo buni nde hasiingimi mu Yisu

⁶ «Bu me amba mu uyene hu musyenge a Damaseko, hupedu a mwangulu, liyalala li mifudi laamati hu yulu na laayadiinga me.

⁷ Masulubete, me ambwidi ŋa toto na me anzuhi ndaha mosi yaakaleele me: “Sahuli, Sahuli, mu hima we li mu unyongese me?”

⁸ Me akaali: “We na li, Pfumu?” Na nde aleeli me: “Me ni Yisu musi Nazareti wu we li mu unyongese.”

⁹ Ba baabeedi ŋaana na me, baamoni liyalala, ka bo a baayuhi ndaha ya wu akatoyo na me ve.

¹⁰ Buuna, me apfuuli nde: “Hima me apfwana usa Pfumu?” Na Pfumu aleeli me: “Teleme, yene hu musyenge a Damaseko, na huuna sa bayaabisa we moosi ma we afwana mu usa.”

¹¹ Bu liyalala laadimisi me miisu, badiha baakangi me mu hoho, na baabiti me hu musyenge a Damaseko.»

¹² «Hwaba huuna, na muutu mumosi nduhi Ananya, muutu wu akinza Nzambi na wu ubaaduukala mikele mya bisu. Nde wuna wu Bayudaayo boosi ba musyenge a Damaseko, bubaatila imbangi hi ibwe.

¹³ Nde ayasaha me. Bu hamoni me, ayasusaha huli me na aleeli: “Sahuli, mwana a ngu a me, nyaha miisu ma we mabwemono!” Masulubete, moniili a me yayafutaha na me amoni Ananya.

¹⁴ Nde abweleele: “Nzambi bakaaha ba bisu hamiteehele usoolo we, mana we tsikaha litondo la nde. Nde hamiteehele usoolo we, mana we mono Wuna wu Akuha, na uyuha ndaha a nde.

¹⁵ Ka we uba mbangi a nde ŋa busu bwa baatu boosi, mu toni uyabisa bo maambu moosi ma we miimono na uyuha.

¹⁶ Bunuubu, muhima ubwekeele? Teleme, yaka tondihili na sambila Pfumu a we, mana nde atsyemese we mu masumu ma we.”»

Pahuli ayabisi buni Nzambi hatsindihi nde mu matsi makima

¹⁷ «Me anzapfutaha hu Yeruselemi, na bu me amba mu usambila mu nzo a Nzambi, me akoti hutso a moniili yi livupu.

¹⁸ Me amoni Pfumu na nde aleeli me: “Mawasa, kula dwe, pala mu Yeruselemi! Mu toni ati, tungi la bula mobuuna sa lituna imbangi hya we mu me.”

¹⁹ Me apfutili: “Pfumu, bo bayabi bu hwafwana ti me akanzyene mu pasi nzo lisambulu yi Bayudaayo, mu ubwaha mu kondaayi babali mu usiila we hiitu.

²⁰ Titswene, ŋa baadubi Etyene, mbangi a we, me kaka ambeedi ŋaana. Me atsilisi babaakaduba nde, ni me mwakulu akwaadi mu ukeelese na bikutu byabo.”

²¹ Pfumu aleeli me: “Yene, na me tsa tsindaha we hu lala, huli ba baavele Bayudaayo.”»

Pahuli na mukuutu masadaadu ma Looma

²² Baatu baayuhi Pahuli nate bu nde hamani uleele mambu ma tsyelele ma. Bo baabwesyenolo mandaha ma bo na ubaafulaha: «Masilaani bisu muutu mowunuwu! Nde afwana ukwa! Nde a hafwana uba monyi ŋa toto moyi ve!»

²³ Bo baakafulaha na mifudi, baakaduula biyunga bya bo na ubaalanga mufundu hu yulu.

²⁴ Mukuutu masadaadu aviidi muswa, mu kotese Pahuli hutso a mumbu masadaadu. Batete nde bikooti, mana nde atoyo, na bayaba mu hima Bayudaayo baakayuma nde.

²⁵ Masadaadu maakakuta nde mikudu, mu utete nde bikooti. Pahuli aleeli huli mukuutu masadaadu wu aba ŋaana: «Benu lili na muswa mu utete musi Looma bikooti, wu baamaaveletsundasa?»

²⁶ Bu nde hayuhi buuna, mukuutu masadaadu ayayibusa mukuutu balwani: «We buni usa?» Nde aleeli: «Muutu mowunuwu musi Looma ali.»

²⁷ Mukuutu balwani ayamono Pahuli na aleeli nde: «Leele me, we musi Looma li?» Pahuli afutili: «Eeye.»

²⁸ Mukuutu balwani abweleele: «Me apfuta mbongo yindahi, mu ubaha biita la musi Looma.» Pahuli aleeli: «Ka me, me musi Looma wu imbutala-ngu.»

²⁹ Mu mawasa, ba baakiitete nde mana nde atoyo, baatahuhi na nde. Bu nde hayibwili monyi ti Pahuli musi Looma, mukuutu balwani abahi boomo, mu toni ati nde ahadi nde mu mapanga.

Pahuli ŋa busu bwa pfuundu bakuutu

³⁰ Mukuutu balwani asahi uyaaba mu tsiki, lilibi li nde havanga li Bayudaayo baakese nde. Ni mu buuna, ilumbu hi hyakaduuka, nde anyanguli nde mapanga. Na nde atsihi bakuutu ba banganga na pfuundu bakuutu ba Bayudaayo yoosi. Nde abiti Pahuli mana batsundasa nde ŋa busu bwa bo.