Mavanga 21 - Musamu wu Mubwe

Pahuli miiyene hu musyenge a Yeruselemi

¹ Humbisa ukabuha na bo, bisu laakoti mu likuumbi la nzali mu uyene hu tsyelo iliiŋa hya Koose. Ŋa ngwali, bisu laayato hu iliiŋa hya Lodesi. Limata ŋaana, bisu laayeni hu musyenge a Patala.

² Huuna, bisu laabiisi likuumbi li laakasabuha hu tsyelo a tsi a Fenesiya. Buuna, bisu laakoti mu lo na laayeni.

³ Bu laatoodi bebele mu utalila iliiŋa hya Kipere, bisu laakulimini hu baanda iliiŋa mohina, mu uyene hu tsyelo a tsi a Siriya. Bisu laatsikimi hu simu la kaasu li musyenge a Tiilo, hu baapalisi makatu mu likuumbi.

⁴ Huuna, bisu laabiisi banga hiitu, na laatsahili bilumbu tsaambu na bo. Hutso a nzaabili Livupu la Ngidi, bo baaleeli huli Pahuli mu uveleyene hu musyenge a Yeruselemi.

⁵ Ka bilumbu tsaambu bifwa, bu laabwevolo nzila, bo boosi baayavehese bisu, na bakadi ba bo, na baana ba bo, nate hu mbadi musyenge. Bu laatoodi ŋa simu li mubu, bisu laatsokimi, na laasambili Nzambi.

⁶ Titswene, bu laamani ulanisa bambaahi, bisu laakoti hutso likuumbi la nzali, bo baafutihi mu manzo ma bo.

⁷ Bisu laamani mudyenge a bisu ŋa yulu mubu, umata hu Tiilo nate hu musyenge a Tolemayise. Bisu laaviidi mabwehe huli baana ba ngu ba musyenge mowunuwu. Bisu laavyosi ilumbu imosi na bo.

⁸ Ilumbu hi hyaduuki, bisu laabwevolo nzila na laayato hu musyenge a Sezare. Huuna, bisu laayakoto mu nzo a Filipo, wu bubaateele «ilumbi hi Musamu wu Mubwe», na bisu laatsahili hubwa nde. Nde aba mumosi mu tsaambu li bakeelisi ba libundu, ba baasooli hu Yeruselemi.

⁹ Nde aba na banumba ba baaba baavelekwele, ba baakabihula.

¹⁰ Bisu laaba huuna bilumbu bibilahi, ŋa mumbihuli mumosi nga nduhi a Angabusi, wu amati hu tsi a Yuda, hayidi.

¹¹ Nde avoli mudi a luungu wa Pahuli, akuti miilu na myoho mya nde mwakulu, na aleeli: «Yuhani mamali mu uleele Livupu la Ngidi: “Bahala nga mudi mowunuwu, Bayudaayo sa bakuta nde mu ifwani mohi hu Yeruselemi, na sa bayeholo nde ŋa myoho mya byenyi.”»

¹² Bu laamani uyuha maana, bisu, na babaaba ŋaana, laayayini Pahuli mu uveleyene hu musyenge a Yeruselemi.

¹³ Ka Pahuli akaali: «Mu hima benu lili mu ulila na lili mu umwese me pasi mu mutima? Me ndi wu avangama, me Pahuli, ndulu a mu usa ti bakuta me ve. Ka napa mu ukwa hu musyenge a Yeruselemi, mu toni muyusu wu afwana mu Pfumu Yisu.»

¹⁴ Bu bisu laavelitwala usa ti nde asobo tsimi, bisu laanyahi, na bisu boosi laaleeli: «Nyaha litondo la Pfumu Nzambi livangama!»

¹⁵ Humbisa a mwa bilumbu mobiina, bisu laavangimi na laakumi hu musyenge a Yeruselemi.

¹⁶ Kabu li bayihi ba musyenge a Sezare, laayabiisala bisu. Bo baabiti bisu huli muutu wu avangimi mu uyaka bisu hubwa nde. Nduhi a nde Manasoni, musi iliiŋa hya Kipere, wu aba muyihi umata beleve.

Pahuli miiyamono Yaki

¹⁷ Bu bisu laayato hu musyenge a Yeruselemi, baana ba ngu baayaki bisu mu kinya.

¹⁸ Ilumbu hi hyaduuki, Pahuli ayeni na bisu huli Yaki. Bakuutu ba libundu boosi baayatsonzomo ŋaana.

¹⁹ Pahuli ayava bo mabwehe. Humbisa, nde ayabisi bo moosi ma Nzambi havangi ŋa hati la ba baavele Bayudaayo.

²⁰ Bu baamani uyuha nde, bo baayusi Nzambi. Titswene bo baaleeli huli Pahuli: «Mwana a ngu, we miimono buni biveeve bi Bayudaayo bamiikoto mu buli la Kristo. Bo boosi aba babaasinzakangama mu mikele mya Moose.

²¹ Ka, mono ma baaleele mu we: we li mu ulongese huli Bayudaayo, ba bali mu utsahala ŋa hati li bibandu bikima, mu utimba mikele mya Moose. Baaleele ti, we li mu ulongese bo mu ubwevelekete baana ba bo, na mu ubweveleduukala bukulu bu Bayudaayo.

²² Buni luusa? Mu toni ati, bo sa bayuha ti we miya.

²³ Ni mu buuna, sa ma bisu lu utuma we mu usa. Tala me, bisu lili na babahala bana ŋa hati la bisu, ba bamiisa mulabu mu Nzambi.

²⁴ Volo bo. Koto na bo, mu utsyemese manyutu ma bo. Futa mbongo, mana bakuula mitswe mya bo. Na baatu boosi sa bayaaba ti, moosi ma baaleele mu toni a we, mali ma upfuta. Na ti we ka ubaadyata hutso lituma li mikele mya Moose.

²⁵ Ka huli ba baavele Bayudaayo, ba baamiisingama mu Kristo, bisu laasonehele bo mu uyabisa makesili ma bisu. Bo a baafwana udya tso banyama ba baadubala bifwita ve, tso banyama ba baapinya ŋa mivodi, tso unywa makila, na bo baafwana usa mifudi mu uvelesa mayamba.»

²⁶ Buuna, mu ilumbu hi hyaduuki, Pahuli avoli babahala mobabana, bo babaandihi utsyemese nyutu a bo. Humbisa, nde akoti mu nzo a Nzambi, mu uyayabisa ki tangu bilumbu bya tsyemili a bo byufwa. Na ki tangu muutu-muutu mu bo, hu uva bungodu bu bwayelemene huli Nzambi.

Pahuli bamiikaanga mu nzo a Nzambi

²⁷ Bu bilumbu tsambu mo byaba hupedu ufwa, Bayudaayo bakima ba itanzi hya Asiya, baatalili Pahuli hutso litandala la nzo a Nzambi. Bo baatumbisi konge a baatu yoosi, na baakangi nde.

²⁸ Bo baakafulaha: «Bisu Isereli, yakumbasaani bisu! Monwani muutu mowunuwu li mu uva huli boosi, matsyelo moosi, ndongisili yi yavelebambana na buli la bisu, na mikele mya Moose, na nzo a Nzambi. Ŋaniŋa, nde miiyakotese te ba baavele Bayudaayo mu litandala la nzo a Nzambi, na usumana mbuha ya ngidi yi!»

²⁹ Bo baaleeli buuna, mu toni ati bo baamoni muutu mumosi, nduhi Tolofime musi Efeso, na Pahuli hutso musyenge. Muutu mowuuna aba musi musyenge a Efeso. Bo baakatsima ti, Pahuli akotisi Tolofime mu litandala la nzo a Nzambi.

³⁰ Buuna, kele yabwidi hutso musyenge woosi. Baatu baayidi mawasa-mawasa, mu matsyelo moosi. Bo baakangi Pahuli, na baadutihi nde mu upalisa nde mu litandala la nzo a Nzambi. Humbisa, bo baadibuhi bikotili bya mumbu a nzo a Nzambi.

³¹ Baatu mo baakasaha uduba Pahuli. Bo baayayabisa huli mukuutu balwani, ba tsi a Looma ba hu Yeruselemi, ti musyenge woosi aka hutso a hyalasasa.

³² Mu mawasa, mukuutu balwani akungi masadaadu, na batumi ba mo. Nde ayeni lititinu na bo hu tsyelo yi konge a baatu yaba. Bu bo baamoni mukuutu balwani na masadaadu, bo baanyahi utete Pahuli.

³³ Buuna, mukuutu balwani ayasusaha hupedu a Pahuli. Nde atumi ukanga Pahuli, na ukutala nde mapanga moole. Titswene nde afuuli nde, nde na haba, na nde hima hasiidi.

³⁴ Ka ŋa hati la konge, bamosi baakafulaha dyambu limosi. Bakima baakafulaha likima. Mu toni a hyalasasa, mukuutu balwani a hatwali ukanga tso limosi la tsiki ve. Nde atumi mu ubita Pahuli hutso a mumbu masadaadu.

³⁵ Bu Pahuli hatoodi ŋa ikaada hya mumbu, masadaadu maatsyeti nde, mu toni mafufu ma maaba na konge a baatu.

³⁶ Bu maambu mo manima maakavyoho, baatu boosi baakaduukala nde na ubaafulaha: «Dubaani nde!»

³⁷ Mu tangu yi baakiikotese nde hutso a mumbu, Pahuli aleeli huli mukuutu masadaadu: «Me utwala uleele we dyambu?» Mukuutu masadaadu afuuli nde: «We yaabi utsuha Ingereke?

³⁸ We a ni musi Ngipiti wu atumbisi baatu, na wu abiti biveeve bina bi badubi ba baatu hu bwaadi ve?»

³⁹ Pahuli afutili: «Me Muyudaayo ndi, wu baabuta hu musyenge a Talasi hu tsi a Silisiya, musi musyenge wu munene. Kolo-kolo a we, va me muswa mu utoyo huli kuungi la baatu.»

⁴⁰ Mukuutu balwani aviidi nde muswa. Pahuli, mutele ŋa yulu ikaada hya mumbu, avuhi hoho mu uyungasa kele. Na nde atsuhi huli bo mu ndaha Ibeleho.