Mavanga 18 - Musamu wu Mubwe

Pahuli hu Koliinto

¹ Humbisa a maana, Pahuli amati hu Atenesi na ayeni hu Koliinto.

² Huuna, nde abwani na Muyudaayo mumosi nga nduhi Akilasi. Muyudaayo mowunuwu, musi musyenge a Ponte. Mu bilumbu mobiina, nde amati hu tsi a Italiya na mukadi a nde Pilisile. Nde hamati huuna, mu toni ati Koloode, pfumu a Looma, avoli kesili ti Bayudaayo boosi, baafwana upala mu Looma. Pahuli ayeni huli Akilasi na Pilisile.

³ Nde hapfuutini na bo, bu bo boosi baaba tsalu mosi. Nde atsahili huli bo, na bo baakasala itwadi. Isalu hya bo aba utuunga hu manzo ma ngooto.

⁴ Pasi ilumbu hya saba, mu nzo lisambulu yi Bayudaayo, Pahuli akalongese mu usaha ukiingula matsimi ma Bayudaayo na Bangeleke.

⁵ Ka bu Silaasi na Timoteho baamati hu itanzi hya Masedonya, Pahuli asinzisalila tangu a nde, mu ubaalongese mambu ma Nzambi. Nde akasilasa huli Bayudaayo, ti Yisu ni Masiya.

⁶ Ka bu Bayudaayo baabisi ma nde, na bu baatuhi nde, Pahuli akubili mufundu bikutu bya nde, na aleeli bo: «Tso benu lidimbili, mbele ya benu mwakulu. Me a ukolo mapfuumba mu maana ve. Ka bunuubu, me tsa nzyene huli ba baavele Bayudaayo.»

⁷ Pahuli amati ŋa mbuha moyina, na nde ayeni hu nzo a bahala limosi nga nduhi Titiyusi Yusitusi. Bahala moliinili akasambila Nzambi, na nzo a nde aba yabaambana na yi lisambulu yi Bayudaayo.

⁸ Buuna Kilisiposi, mutumi a nzo lisambulu yi Bayudaayo, asiidi hiitu mu Pfumu na ikuta hya nde hyosi. Bisu Koliinto ka babalahi ba baakayuha mambu ma Pahuli, baasiidi hiitu mu Pfumu Yisu, na baayaki tondihili.

⁹ Ilumbu imosi ŋa butsuhu, Pfumu amonihili na Pahuli na aleeli nde: «A haba na boomo, baayambila, a hadibuha munywa.

¹⁰ Ka me ndi itwadi na we. Muutu utwala ukanga we, na uvangila we lilibi ve. Mu toni ati, me ndi na baatu babalahi mu musyenge mowunuwu.»

¹¹ Na Pahuli akwilili hu Koliinto ilima imosi na batsungi basamunu, mu ubaalongese baatu mambu ma Nzambi.

Pahuli bali mu utsundasa ŋa busu bwa pfumu a tsi Ngaliyoni

¹² Mu tangu yi Ngaliyoni haba mutumi itanzi hya Akayi, Bayudaayo ba baabelili Pahuli, baayuhisini mu itwadi mu ukanga nde. Na baabiti nde hu nzo a tsundusu.

¹³ Huuna, bo baakesi nde ti: «Muutu mowunuwu, li mu ukiingula matsimi ma baatu, mu ukunda Nzambi bu hwasoboono na mikele.»

¹⁴ Bu Pahuli hakibaandiha uyambila, Ngaliyoni aleeli huli Bayudaayo: «Benu Bayudaayo! Tso muutu mowunuwu avanga lilibi, buve aduba muutu, kini me kiinzuha benu mu isuusi we bu hwafwana.

¹⁵ Ka umono ti ndulu mu usobosono hu minywa mu mikuma, mu manduhi, buve mu toni mikele mya benu mwakulu, maana matali benu. Me mbisi uba nzonzi a maana.»

¹⁶ Humbisa, nde abingi bo mu nzo a tsundusu.

¹⁷ Buuna, bo boosi baakangi Sositeni, mukuutu a nzo lisambulu yi Bayudaayo. Bo baarambi nde kuba, ŋa busu bwa nzo a tsundusu. Ka Ngaliyoni a hanyongi tso hole ve.

Pahuli miifutaha hu musyenge a Antyokya mu tsi a Siriya

¹⁸ Ŋa mbisa a dyambu molina, Pahuli abwevyoso tangu yi yayelemene hu musyenge a Koliinto. Nde alanisi baana ba ngu, mana nde ayene hu tsi a Siriya itwadi na Pilisile na Akilasi. Titswene Pahuli atumi ukuula mutswe, mu toni ati nde asiidi lahi huli Nzambi. Nde akoti likuumbi hu ngulu makuumbi ya Sankeli, mu uyene hu tsi a Siriya.

¹⁹ Bu bo baayato hu musyenge a Efeso, Pahuli asiisi bambaahi ba nde ba mudyenge, Pilisile na Akilasi. Ni huuna, nde hakoti mu nzo lisambulu yi Bayudaayo, mu umoho na Bayudaayo.

²⁰ Bo baavondi nde mu uvyoso mwa bilumbu na bo. Ka nde abisi.

²¹ Pahuli asiisi bo na aleeli: «Me tsa nzapfutaha huli benu, tso Nzambi tondi.» Nde akoti likuumbi la nzali, na asiisi musyenge a Efeso.

²² Bu Pahuli hamati hu musyenge a Efeso, nde ayasutaha hu ngulu yi makuumbi mubaatsikama yi musyenge a Sezare. Nde akumisi hu musyenge a Yeruselemi mu uyava libundu suuhi. Titswene nde ayeni hu musyenge a Antyokya.

²³ Mwana a tangu hole, nde asiisi musyenge a Antyokya mu uyene hu bitanzi bya Ngalatiya na Filizi, mu ubaahwadisa imiinu hi bayihi boosi.

Pahuli ayafutaha hu misyenge mya Efeso na Koliinto

²⁴ Muyudaayo mumosi ayidi hu musyenge a Efeso, nduhi a nde Apoloosi, wu baabuti hu Alekizandi. Nde aba muutu wu ubaatoyo bubwe, na nga buyedi wu akangama mu ma baasonehe ma Ngidi.

²⁵ Nde aba ayiha misamu mi mya tala nzila a Pfumu. Bu haba ka na lehemene mu livupu, nde akayabisa na akalongese bu hwafwana, Musamu wu Mubwe wu atala Yisu. Ka nde aba ayaba ndulu tondihili yi Yowani hakalongese baatu.

²⁶ Nde abaandihi utoyo mu tsiki, mu nzo lisambulu yi Bayudaayo. Bu Pilisile na Akilasi baamani uyuha nde, bo baabiti nde hu nzo a bo, na bo baabinduli nde nzila a Nzambi we bu hwafwana.

²⁷ Bu nde haba na tadi yi uyene hu itanzi hya Akayi, baana ba ngu baahwadisi nde. Bo baasonihi muhanda huli bayihi ba huuna, mu uyaka nde bubwe. Bu nde hatoodi hu Akayi, nde abeedi na tsoongo mu ba baasiidi hiitu mu bubwe bwa Nzambi.

²⁸ Ka mu mifudi myosi, nde akatungalala Bayudaayo ŋa kuungi la baatu boosi, na nde akamwese mu ma baasonehe ma Ngidi, ti Yisu ni Masiya.