Mavanga 17 - Musamu wu Mubwe

Pahuli na Silaasi baayeni hu musyenge a Tesalonika

¹ Pahuli na Silaasi baavyohili mu misyenge mya Apfipolisi na Apoloniya, na baayato hu musyenge a Tesalonika, hu bo baamoni nzo lisambulu yi Bayudaayo.

² We bu huli ipfu hya nde, Pahuli ayeni huuna. Mu basaba batatu ba baalandisini, nde amohi na Bayudaayo mu ma baasonehe ma Ngidi.

³ Mu mambu ma nde hakabindula bo, nde akamwese, we bu mo mali. Masiya afwana umaamono pasi, na usuuha mu babaakwa. Nde akaleele bo: «Yisu mo wu me ndi mu unzaabisa benu wu, nde ni Masiya.»

⁴ Mwana a baatu bakima ŋa hati la bo, baasiidi hiitu mu mambu momaana, na baabambini na Pahuli na Silaasi. Buuna ni bu hwasiidi kabu lilinene la bisu Ngeleke ba baakayusa Nzambi, na bakaasu babalahi ba likinzu, baayapfuutana na bo.

⁵ Ka Bayudaayo bakima baamoni nyengi. Bo baakuukihi mwa biyahudi bi byaba mu manzila, na baatumi bo mu usa muyungisi na kele mutso musyenge woosi. Mu mawasa, bo baayapalila muutu mumosi nga nduhi a Yasoni hu nzo a nde, mu usaha Pahuli na Silaasi, mana babita bo ŋa kuungi la baatu.

⁶ Ka bu baavelimono bo, bo baakangi Yasoni na bambaahi ba nde bakima ba imiinu. Na baabiti bo ŋa busu bu banzonzi ba musyenge. Bo baakafulaha: «Baatu mobaniba baamiikotese muyungisi mu toto yoosi, ka bunuubu, bo bamiiyato nate huni!

⁷ Ka Yasoni ni wu miiyaka bo mu nzo a nde. Baatu mobaniba boosi a bali mu ukiinza mikele mya Pfumu Kayisaali ve. Bo bali mu uleele ti, huli na pfumu mukima nga nduhi Yisu.»

⁸ Maambu momaana maasyelisi konge a baatu mitima, napa banzonzi ba musyenge.

⁹ Ni mu buuna, bakuutu baakaambi bilangi huli Yasoni na bambaahi ba nde, mana banyahula bo.

Baayaki Pahuli na Silaasi hu musyenge a Beere

¹⁰ Bu busi bwayili, baana ba ngu baatsindihi Pahuli na Silaasi hu musyenge a Beere. Bu baayato huuna, bo baayakoto hu nzo lisambulu yi Bayudaayo.

¹¹ Bayudaayo ba hu Beere baaba na matsimi mamabwe ti, ba bali hu musyenge a Tesalonika, baayaki mambu ma Nzambi mu bunyanga bu mutima. Pasi ilumbu, bo baakataanga ma baasonehe ma Ngidi, mu utsikaha tso ma baakayabisa bo, mali ma mbuli.

¹² Buuna, babalahi mu bo baasiidi hiitu. Na ŋa hati li Bangeleke, bakaasu ba likinzu na babahala babalahi ka, baasiidi hiitu.

¹³ Ka Bayudaayo ba hu Tesalonika, baayuhi ti Pahuli aka mu ubwelongese mambu ma Nzambi hu Beere. Bo baayeni huuna, mu uyatuumbasa na usa kele ŋa hati la konge a baatu.

¹⁴ Buuna mu mawasa, baana ba ngu baabatisi Pahuli hu tsyelo mubu mu uvolo likuumbi. Ka Silaasi na Timoteho baasaali hu Beere.

¹⁵ Ba baakabita Pahuli, baayeni na nde nate hu musyenge a Atenesi. Titswene, mu tumili a Pahuli, bo baafutihi hu Beere, mana baleele Silaasi na Timoteho bayabiisala nde mu mawasa hu musyenge mowuna.

Pahuli li mu ulongese Musamu wu Mubwe hu Atenesi

¹⁶ Bu Pahuli hakakeele Silaasi na Timoteho hu Atenesi, nde aba na inganganyi mu umono buni bifwita bibilahi byaba mu musyenge mowuna mu pasi mbuha.

¹⁷ Nde akasobosono matsimi na Bayudaayo mu nzo lisambulu yi Bayudaayo, napa bakima ba baakakinza Nzambi. Pasi ilumbu, nde akamoho ka itwadi na ba baakaba mu mataandala ma mikuungi.

¹⁸ Ni huuna, biyedi banga kumbu Bayepikule na Basotoyise, baakayatoyo na nde. Bana baakafuula: «Litodo molinili hima lili mu uleele hya tsiki?» Baatu bakima ti: «Nde we wu li mulongisi a mambu ma binzanzambi bya byenyi». Bo baafutili buuna, mu toni ati, bo baakayuha Pahuli mu uyabisa tsangu yimbwe ya Yisu na ya tsuhili a nde mu babaakwa.

¹⁹ Buuna, bo baavoli Pahuli na ubita nde hu isyelo hya Ayelopaze hu banzonzi baakapfutana mu pfuundu a bo. Na baafuuli nde: «Bisu utwala uyaba pila a ndongisili yi nyatihi yi we li mu ulongese baatu?

²⁰ We li mu uyabisa mu matswi ma bisu misamu mi bisu laaveletsikaha, na bisu litondi uyaba mbindulili a myo.»

²¹ Bo baavondi mbindulili moyiina, mu toni ati, bisu musyenge a Atenesi boosi, na byenyi bi byayidi ŋa hati la bo, baakavyoso tangu a bo yoosi ndulu mu ubaatoyo. Bo baakavyoso tangu a bo mu ubaatsotso na ubaayuha mambu ma manyatihi.

Ikumbu hya Pahuli hu isyelo hya Ayelopaze

²² Pahuli atelimi ŋa hati la pfuundu banzonzi na aleeli: «Benu bisu Atenesi, me ndi mu umono mu moosi ti benu laakangama mu inzambi hya benu.

²³ Mu toni ati, me ataangila musyenge a benu, na me atsikaha bifwita bya benu. Mu hati bifwita mobiina, me atsoolo mwa ibanga imosi hya ndongisili, hi baasonehe bunuubu: “Huli nzambi wu baaveleyaba.” Wu benu libaakiinza hwavele uyaba, ni nde me miinzanzaabisa benu.

²⁴ Nzambi a Pungu wu avanga tsi, na byosi bi bili mu yo, nde ni wu li Pfumu a yulu na toto. Na nde a habatsahala mu bibanga bi baatunga mu myoho mya baatu ve.

²⁵ Nde a hali na nzala ati basalila nde mu myoho mya baatu ve, we nde wu li na nzala isiha. Mu toni ati, nde ni wu ubaava monyi huli boosi, muvumu na bina byosi.

²⁶ Ndulu mu muutu mumosi, nde avangi mabuli moosi, mana mo matsahala mu toto yoosi. Nde akese huli baatu matangu, na mandilu ma bitanzi ma bo baafwana ubaatsahala.

²⁷ Nzambi avangi bo, mana bo basaha nde, na peleve mu upeebete, bo utwala usoolo nde. Mu mbuli, Nzambi a hali lala tso na mumosi mu bisu ve.

²⁸ Mu toni ati: “Ni mu nde, bisu lili monyi, libanyingama na lili ba lili.” Maana ni ma basonihi bakima ba benu baaleeli: “Bisu ka lili ba ibandu hya Nzambi.”

²⁹ Ubaamono ti bisu ni ba ibandu hya Nzambi, bisu utwala uba na tsimi ve, ti Nzambi ifwani hi ifwita hya wolo. Tso nde ifwani hi ifwita hi itali hya talu, buve hi mamanya ma baavanga mu bungeele na matsimi ma bumuutu ve.

³⁰ Kaahu Nzambi asiidi kolo-kolo mu maana moosi, bu baatu baakaveleyaba ma baakavanga. Ka loloyi, nde li mu uyabisa huli boosi, mu mambuha moosi, mu unyongo mu mavanga ma bo, na usobo mbiili a bo.

³¹ Nzambi amiisoolo ilumbu hi nde hutsundasa baatu boosi mu butsiitsa, mu nzila a muutu wu nde hamiisoolo. Nde amiimwese imbangi huli baatu boosi, ti muutu mowuna na ali, bu hamiisuula nde ŋa hati la babaakwa.»

³² Bu bo baayuhi ti Pahuli li mu utoyo mu tsuhili a babaakwa, bana baasyebi nde. Na bakima baaleeli: «Mu dyambu molina, bisu ka ilumbu ikima lu uyuha we.»

³³ Buuna Pahuli asiisi bo.

³⁴ Ka mwana a kabu limosi la baatu, baayapfuutana na nde, na baasiidi hiitu mu Yisu. Ŋa hati la bo hwaba Denisya, mumosi wa pfuundu banzonzi ba Ayelopaze, na mukaasu mumosi nduhi Damalisya, na bakima-bakima.