Mavanga 14 - Musamu wu Mubwe

Pahuli na Baranabasi hu Ikoniwumi

¹ Bu Pahuli na Baranabasi baatoodi hu musyenge a Ikoniwumi, bo baakoti mu nzo lisambulu yi Bayudaayo. Huuna, ndongisili a bo yasiidi ti Bayudaayo na ba baavele Bayudaayo, baasiidi hiitu mu Pfumu.

² Ka Bayudaayo bakima ba baavelisa hiitu mu Pfumu, baatumbisi ba baavele Bayudaayo mana bayalwanisa baana ba bangu ba bo ba baasiidi hiitu.

³ Ka Pahuli na Baranabasi baadiingi hu Ikoniwumi. Bo baakalongese mambu ma Pfumu na hiitu hyosi, mu toni a Pfumu. Ni Pfumu akamwese imbuli hya ndongisili a bo. Na nde akava bo matwala ma uvanga bipadi bya kimwili, mu umwese imbuli hya ma bo baakalongese mu Pfumu.

⁴ Buli li musyenge laakabuhi. Bamosi baakakalila Bayudaayo, bana baakakalila bilumbi bya Nzambi.

⁵ Bisu musyenge na Bayudaayo napa bakuutu baba baavele Bayudaayo, baakavangama mu ukwamisa bilumbi na uduba bo mu mamanya.

⁶ Ka bu bo baayabi lo, bo baabati hu tsyelo a Lisitele na Derebe, misyenge mya itanzi hya Likawoni, na mala ma bibiingi bya mo bina.

⁷ Huuna ka, bo baatsaamuni Tsangu yi Mbwe.

Pahuli na Baranabasi hu Lisitele

⁸ Hu musyenge a Lisitele, hwaba na bahala limosi li miilu myaba myavolo. Nde aba imbolo hi imbutala-ngu, wu akaveletwala dwe.

⁹ Bahala mo akayuha ma Pahuli hakaleele. Bu Pahuli hasungimini nde, Pahuli amoni ti hiitu hya nde mu Nzambi, ubeeloso nde.

¹⁰ Pahuli atumi nde mu mifudi: «Teleme! Na sungama mu miilu mya we!» Bahala molinili laadambuhi na laatakuli.

¹¹ Bu konge yamoni ma Pahuli havangi, bo baafulihi mu ndaha a bo bisu Likayoni: «Banzambi bamiivolo ifwani hya baatu, na bamiisutaha ŋa hati la bisu.»

¹² Bo baaviidi bo makuumbu ma banzambi ba bo. Baakateele Baranabasi «Zusi», na Pahuli «Emesi», mu toni ati Pahuli aba mutoosili.

¹³ Nzo a nzambi a Zusi yaba ŋa kotili musyenge. Nganga a nzambi moyina, abehi bangombe ba baalwatisa bifulu bi baatunga nate ŋa kotili musyenge. Nde akasaha uva bungodu, mu itwadi na konge, huli Pahuli na Baranabasi.

¹⁴ Bu bilumbi byabyole byayuhi lo, baakasuli bikutu bya bo mu umwese lingebe ŋa busu bwa Nzambi. Na baabingilili ukoto hu tso a konge a baatu, na ubaafulaha mu mifudi:

¹⁵ «Oh! Bambaahi, hima lili mu usa buuna? Bisu ka baatu lili we benu. Bisu Musamu wu Mubwe lili mu ubehele benu, na uvondo benu mu utimba banzambi babavele na tsoongo. Buuna benu likinguha huli Nzambi a monyi, wu avanga yulu, toto, mubu, na byosi bi bili muuna.

¹⁶ Mu tsikulu, Nzambi anyahi baatu ba matsi moosi, baduukala manzila ma bo mwakulu baatondo.

¹⁷ Nde amwese ti nde monyi ali mu mamabwe moosi ma nde ubaasa mu boosi. Mu toni ati, nde Nzambi wu ubaanohese mvula, na uva mbutu yindahi mu tangu yi yafwana. Nde ubaava benu byudya mana aluusa mitima mya benu mu kinya.»

¹⁸ Tso bu bo baakaleele buuna, bo baamoni pasi mu ukala konge a baatu mu uva bo bungodu.

¹⁹ Bayudaayo ba baamati hu misyenge mya Antyokya na Ikoniwumi baayatumbasa konge. Baateti Pahuli mamanya mu uduba nde, na baadutihi nde hu mbadi musyenge, bu baatsimi ti nde miikwa.

²⁰ Ka bu bayihi baadiingi nde, Pahuli atelimi na afutihi hutso musyenge. Ilumbu hi hyaduuki, Pahuli na Baranabasi baayeni hu musyenge a Derebe.

Pahuli na Baranabasi baafutihi hu Antyokya

²¹ Pahuli na Baranabasi baamani ulongese Musamu wu Mubwe hutso musyenge a Derebe. Huuna, baatu babalahi baakinguli buyedi mu usa hiitu mu Yisu. Buuna bo baafutihi hu misyenge mya Lisitele, Ikoniwumi na hu Antyokya.

²² Bo baakahwadisa mitima mi bayihi, na baakatuma bo mu uteleme mu imiinu mu Nzambi. Bo baakaleele: «Bisu laafwana ubwana na mapasi mamalahi, tswamina mu ukoto mu Ipfumu hya Nzambi.»

²³ Mu pasi libundu, Pahuli na Baranabasi baakatsahisa bakuutu mu isalu hya Nzambi. Bo baakadya ikaandi na usambila mu bo. Na bo baakayeholo bakuutu mobaana ŋa myoho mya Pfumu Yisu, wu bo baakasa hiitu mu nde.

²⁴ Titswene Pahuli na Baranabasi baavyohi mu mukesu itanzi hya Pisidiya nate bu baatoodi hu Papfiliya.

²⁵ Bo balongisi mambu ma Nzambi hu musyenge a Perege, na bo baakulimini nate ŋa ngulu yi makuumbi ma nzali mabaatsikama, hu Ataliya.

²⁶ Bu Pahuli na Baranabasi baapali hu Ataliya, bo baakoti likuumbi la nzali mu uyene hu Antyokya musyenge a tsi a Syriya. Umata tangu moyina, hu Antyokya, ni huuna baasuusi bo ŋa myoho mya Nzambi, mu toni isalu hi bo baamani usa.

²⁷ Bu bo baatoodi hu musyenge a Antyokya, baakuukihi libundu. Baayabisi bo mambu ma Nzambi havangi mu mambuha moosi ma bo baaba. Na buni Nzambi hadibuli huli ba baavele Bayudaayo, nzila yi usa hiitu mu Pfumu.

²⁸ Pahuli na Baranabasi baavyosi bilumbu bibilahi itwadi na bayihi mobaana.