Luuka 7 - Musamu wu Mubwe

Yisu mibelooso musalili a mukuutu a kama li masadaadu

¹ Bu Yisu hamani uleele mambu mo manima mosi huli baatu ba baababaadiinga nde, nde ayeni hu musyenge a Kapernahumi.

² Huuna, hwaba na mukuutu a kama li masadaadu, wu aba na musalili mumosi wu nde haba hatondo. Musalili mowuuna abeedi na ubeele hwa ŋa pedu lipfu.

³ Bu nde hayuhi tsangu a Yisu, nde atsindihi mwana kabu li bakuutu ba Bayudaayo, mana bayalembesene nde mu uyabeeloso musalili a nde.

⁴ Bo baayato ŋa hwaba Yisu, baayayini nde: «Ufwani ti ni we uva bahala moli likumbasa,

⁵ mu toni ati, nde atondo tsi a bisu. Nde ni wu atunga nzo a bisu yi lisambulu.»

⁶ Yisu ayeni na bo. Bu bo batoodi bebele na nzo mukuutu mo, nde atsindihi bambaahi ba nde huli Yisu mu uleele nde: «Pfumu, amono nzuhu ve mu toni ati, me andi wakuha ti we koto mu nzo a me ve.

⁷ Ni mu buuna, me wu aveleyelemene pelinza me mwakulu mu uyamonehele na we. Ka leele dyambu limosi, na musalili a me sa abeeloho.

⁸ Mu toni ati, me mwakulu ndi hu tsina lituma li bakuutu ba me. Ka me kaka na masadaadu hutso lituma la me, na me undeele huli mumosi mu bo: “Yene!” — Na nde yeni. Na huli mukima: “Yanga!” — Na nde yidi. Huli muviha a me, me undele: “Sa bu!” — Na nde siidi.»

⁹ Yisu ayuha mambu momaana, nde asilisi mukuutu masadaadu. Nde akinguhi huli konge yi yakaduukala nde, na aleeli: «Me ndeele benu, tso hu Isereli, me a hamoni imiinu hya pila moyi ve.»

¹⁰ Bambaahi ba mukuutu bafutihi hu nzo a nde, na baayabiisa musalili a nde amiibeeloho.

Yisu asuuli mu lipfu mwana mukwili wu mukaasu hu Nayini

¹¹ Ilumbu hi hyaduuki, Yisu ayeni hu musyenge wa nduhi Nayini. Bayihi ba nde na konge yinene baakayene na nde mu nzila.

¹² Bu nde hatoodi bebele na musyenge, nde abwani konge a baatu yi yakayadiiha mwana mukwili. Mwana mo aba livingu la bahala. Bisu bula babalahi baakaduukala ngu a mwana.

¹³ Pfumu amoni mukwili na aluuli mu lingebe mu nde, na aleeli: «Nyaha ubwe lila!»

¹⁴ Titswene, nde ayasusaha na abembi kasu. Ba baakabita yo baatsikimi. Nde aleeli: «Mufudu mbahala! Me tumi we, teleme!»

¹⁵ Na mwana wu akwa atsahili, abaandihi utoyo. Yisu afutili nde huli ngu a nde.

¹⁶ Bu baatu baamoni maana, boosi baakiinzi na bayusi Nzambi. Bo baakaleele: «Mumbihuli wu munene mimonele ŋa hati la bisu. Nzambi miyakumbasa baatu ba nde.»

¹⁷ Musamu mowunuwu atsaamuhi itanzi hya Yuda hyosi, nate mu mala ma ibiingi hina hyosi.

Yowani Mutondihi li mu ufuula hyuhu huli Yisu

¹⁸ Bayihi ba Yowani ba yabisi nde moosi ma makavyoho. Yowani ni uteele boole ŋa hati la bo.

¹⁹ Nde ni utsindaha bo huli Pfumu mu ufula: «We ni Masiya wafwana uya, vo bisu lafwana ukeele mukima?»

²⁰ Bo bato huli Yisu, bo ni uleele nde: «Yowani Mutondihi mitsindaha bisu huli we mu ufuula we bu, “We ni Masiya wu afwana uya, vo bisu lafwana ukeele mukima?”»

²¹ Ka mu tangu mo yina, Yisu abeelusi baatu babalahi: babeedu, bikata, na banga mavupu mamabi. Na nde abeelusi ka binzimana bibilahi.

²² Yisu afutili bo: «Ya yabisaani Yowani ma benu limiimono, na ma benu limiiyuha. Binzimana bili mu umono, bikata bili mu uteleme na uyene, banga a bwatsi bali mu utsyeme, bikwa-matswi bili mu uyuha, babaakwa bali mu usuuha, na biyaha bili mu uyuha musamu wu mubwe.

²³ Kinya yili na muutu wuna wu uvelebwisa imiinu hya nde mu toni a me.»

Imbangi mu toni a Yowani mu tondihi

²⁴ Bilumbi bya Yowani bu byafutihi, Yisu abwidi mu utoyo mu toni a Yowani huli konge a baatu: «Benu hima layatala hu kumu? Litsotso li ifula hili mu unyingasa?

²⁵ Ka benu na laaya mono? Muutu walwata bikutu bibibwe? Naana! Ba bubaalwata bikutu bibibwe na babali hutso busina, ubaatsahala hutso bibanga bi batumi.

²⁶ Ka na benu laaya mono? Mumbihuli? Eye, me ndeele benu, wa luta paa mumbihuli.

²⁷ Yowani, nde wuna wu baasonehe: “Mono, me tsa tsindaha ilumbi hya me hu busu bwa we, mu uvangila nzila a we.”

²⁸ Me ndeele benu ti ŋa hati la baatu a huli wu alutaala Yowani ve. Ka wuli ikenyi mu Ipfumu hya Nzambi, alutaala nde.

²⁹ Baatu boosi, na paa bakaambi ba limandu baayuhi ndongisili a Yowani. Bo baasilisi ti Nzambi li wakuha, na baayaki tondihili a Yowani.

³⁰ Ka Bafarisi na milongisi mi mikele baanyasuli hwa bo litondo la Nzambi, na baabisi tondihili a Yowani.

³¹ Baatu ba tangu moyi, na baana me utwala ufwanisa bo? Bo na baana baafwanina?

³² Bo baafwana we baana ba bangebe ba baatsahala ŋa saandu, ba bali mu utelesene na bali mu uleele: “Bisu lafulili benu munzololo, benu a laakini ve! Bisu layimbili benu nyimbu yi ikwili, benu a laalili ve.”

³³ Bu Yowani Mutondihi hayidi, nde lipa udya ve, nde malamu unywa ve, na benu lili mu uleele: “Tengo lamilwata nde.”

³⁴ Mwana a muutu miiya. Nde li mu udya, nde li mu unywa, na benu lili mu uleele: “Monwani bahala moli, nga mubaka na ikolo-mbungu! Nde wu, mbaahi bakaambi ba limandu na baatu banga masumu.”

³⁵ Ka baatu ba bubaadyata we buhuli tsiki a Nzambi, bu baamwese imbuli hya tsiki moyina.»

Yisu asiidi mukaasu wu imbembo kolo-kolo

³⁶ Mufarisi mumosi atsihi Yisu mu uya dya huli nde. Yisu akoti mu nzo Mufarisi, na atsahili ŋa metse.

³⁷ Mu musyenge mowuna, hwaba na mukaasu mumosi wu imbembo. Nde ayabi ti Yisu aba mu udya mu nzo Mufarisi. Nde abehi itutu hya alabati hi hyaluula mu nyafi.

³⁸ Na nde avyohi Humbisa a Yisu bebele a miilu mya nde, abaandihi ulila. Matsanga ma nde maabolisi miilu mya Yisu, na nde akombili myo mu naanga a nde. Nde abumbi miilu mya Yisu, na ayitili myo nyafi.

³⁹ Mufarisi wu ateeli Yisu mu udya amono buuna, aleeli hutso mutima a nde: «Tso muutu mowunuwu beedi mumbihuli wa mbuli, kini nde kiyaba na li mukaasu wu mibembe nde, na mbiili a nde. Nde kiyaba ti mukaasu mowunuwu imbembo ali.»

⁴⁰ Yisu afutili huli Mufarisi: «Simoni, me na dyambu li uleele we.» Simoni afutili: «Eye Mulongisi, leele lo.»

⁴¹ Yisu ti: «Baatu boole baaba na mukanu a muutu mumosi. Wa tsomi aba asombo biteesi maakama mataanu (500) ma makuta. Wa boole aba asombo biteesi maku mataanu ma bakuta.

⁴² Ka bu baaveli na bakuta ba ufuta, musombisi asiidi bo kolo-kolo na anyahuli mukanu a bo. Mu ma we matsimi, na mu bo baboole nde hafula utondo?»

⁴³ Simoni afutili: «Me tsimi, ni wu mukanu hafulala bunene.» Yisu afutili nde: «We miikese dyambu bu hwafwana.»

⁴⁴ Titswene Yisu akinguhi huli mukaasu, na aleeli huli Simoni: «We li mu umono mukaasu mowunuwu? Bu me koti mu nzo a we, we a vidi me mamba ma uswaha miilu mya me ve. Ka mukaasu mowunuwu swahi miilu mya me mu matsanga ma nde, na nde kombili myo mu naanga a nde.

⁴⁵ We a buumbi me ve, ka nde, umata bu me anzakoto, nde a hakolo mu ubaaviva miilu mya me ve.

⁴⁶ We a tsatsili me maadi hu yulu mutswe a me ve, ka nde puhili nyafi mu miilu mya me.

⁴⁷ Ni mu buuna, me ndeeli ti nde miyaka linyahula li masumu ma nde ma malahi, mu toni ati nde mwesi litondo lililahi. Ka huli wu bali mu unyahula hole, ubamwese litondo la hole.»

⁴⁸ Na Yisu aleeli huli mukaasu: «We miyaka linyahula li masumu ma we.»

⁴⁹ Baatu ba baaba ŋa metse bu baayuhi maana, baakalelesene mu mitima mya bo: «Nde wu na! Wuli mu uyehele unyahula paa masumu?»

⁵⁰ Ka Yisu aleeli huli mukaasu: «Imiinu hya we hi mifuuhasa we, yene mu hyenze.»