Luuka 6 - Musamu wu Mubwe

Yisu Pfumu ilumbu hya saba

¹ Mu ilumbu imosi hya saba, Yisu akataangila matsyehe ma masangu. Bayihi ba nde baakakoolo masangu. Bu bo baakabuula na uhololo mo mu myoho myabo, bo baakadya masangu.

² Mwana a kabu li Bafarisi laaleeli bo: «Muhima benu lili mu uvanga ma baaveletuma mu ilumbu hya saba?»

³ Yisu afutili bo: «Benu a lataanga ma mutumi Davidi hasiidi bu haba na nzala, nde na baatu ba nde ve?

⁴ Nde akoti mu nzo a Nzambi, avoli mapa ma baayeholo huli Nzambi, adidi mo na aviidi ka huli bambaahi ba nde. Mapa mo maana, muutu mukima a hali na muswa mu udya mo ve, ka ndulu banganga ba Nzambi.»

⁵ Yisu aleeli huli Bafarisi mo baana: «Mwana a muutu li Pfumu a saba.»

Yisu abeelusi muutu mu ilumbu hya saba

⁶ Ilumbu ikima hya saba, Yisu akoti mu nzo lisambulu yi Bayudaayo, na abwi mu uyihasa. Muuna, hwaba na bahala limosi li kaka la mbahala laaba lavolo.

⁷ Balongisi ba mikele na Bafarisi baakatala Yisu mu umono, tso nde ubeeloso muutu mu ilumbu hya saba. Bo baakasa buna mu usaha buni bo bubahila nde toni.

⁸ Ka Yisu aba ayaba matsimi ma bo. Nde ni uleele bahala li kaka la mbahala laaba lavolo: «Teleme, na ba ŋa, ŋa hati la baatu.» Bahala laatelimi na laaba ŋana.

⁹ Na Yisu aleeli bo: «Me ndi mu upfuula benu, huli na muswa mu ilumbu hya saba mu uvanga lilibwe buve lilibi; mu ufuuhasa muvumu a muutu tso mu unyambasana nde?»

¹⁰ Yisu atali bo boosi, na aleeli huli bahala: «Laba kaka la we!» Nde ni usa buuna, na kaka la nde ni ubeeloho.

¹¹ Ka milongisi mi mikele na Bafarisi baakwidi kesi, na ubaalelesene ma bukutala Yisu.

Yisu asooli kuumi na bilumbi byole

¹² Mu tangu yina, Yisu avaati isyelo mu uyasambila, na asambili Nzambi butsuhu bwosi.

¹³ Bu busi bwakiidi, nde ateeli bayihi ba nde boosi na asooli kuumi na boole ŋa hati la bo, nde aviidi bo nduhi bilumbi.

¹⁴ Manduhi ma bo: Simoni wu nde haluhi Peetelo, Andele muhehe a Simoni, Yaki, Yowani, Filipo, Batolomayi,

¹⁵ Mataayi, Toma, Yaki mwana a Alafe, Simoni nga kumbu mu Zelote,

¹⁶ Yude mwana a Yaki, na Yuda Isikaryoti wu asumbiisi Yisu.

Yisu akalongese baatu na ubeeloso

¹⁷ Yisu bu hakakulamana isyelo na bayihi ba nde, nde atsikimi ŋa mbuha mosi yi idede ŋa hwaba konge yinene yi bayihi ba nde. Hwaba ka na baatu babalahi ba baamati hu itanzi hyosi hya Yuda, hu musyenge a Yeruselemi, na ba misyenge mya Tiilo na Sidoni mi myaba mu muvanga mubu.

¹⁸ Baatu mobaana baayidi mu uyuha nde, na mana nde abeeloso bo mu mabeedu ma bo. Baatu ba mavupu mamabi maakakwamisa, baabeeluhi.

¹⁹ Baatu boosi baakasaha ubembe Yisu, mu toni ati matwala mamosi maakapala mu nde na maakabeeloso bo boosi.

Yisu ayihisi mu mambu ma makinya na ma lingebe

²⁰ Yisu atali bayihi ba nde, na aleeli: «Kinya huli benu biyaha, ipfumu hi mayulu hili hya benu!

²¹ Kinya huli benu ba lili na nzala mu tangu yi, ka benu sa liywata! Kinya huli benu ba lili mu ulila tangu yi, benu sa lisyebe!

²² Kinya homo huli benu tso baatu bali mu ubele benu, bali mu unyasula benu, bali mu utuha benu na ubaakusa benu, mu toni a Mwana a muutu.

²³ Mu ilumbu mohina, baani mu kinya na mwesani musaangu mu ukina, musyendo wu munene li mu ukeele benu hu yulu. Ni buuna bakaaha ba bo baakakwamisa mimbihuli.

²⁴ Tsyembili huli benu bisina, benu laamitswamina ukanga mbombisili a benu!

²⁵ Lingebe huli benu ba lamikuha mu byosi tangu yi, benu sa libaha nzala! Lingebe huli benu ba lili mu usyebe tangu yi, benu sa liba mu bukwili na benu sa lilila!

²⁶ Lingebe huli benu tso baatu boosi bali mu utoyo bubwe mu benu, ni bumosi ka bakaaha ba bo baakaleele mu mimbihuli mi mapfuta!»

Yisu akayihasa mu litondo li baboho

²⁷ Benu ba lili mu uyuha me, me ndeele benu bu: tondwani baboho ba benu; baasaani lilibwe huli ba bali mu ubelele benu.

²⁸ Syemaani ba bali mu usinga benu; sambilaani Nzambi mu ba bali mu ukwamisa benu.

²⁹ Tso muutu mitete we mu tama la mbahala, bwe va nde la kaasu. Muutu avolo iyunga hya we, a liha nde mu uvolo ka simiisi a we ve.

³⁰ Pasi muutu wu uvondo we iloho, va nde hyo. Na tso muutu voli hya we, a kaamba nde hyove.

³¹ Ma benu litondi ti bakima bavangila benu, vangaani bumosi ka huli bo.

³² Tso benu libaatondo ndulu ba bubaatondo benu, ki tsalu benu luubaha? Banga masumu ka babaatondo ba bubaatondo bo.

³³ Na tso benu libavangila li libwe ndulu huli ba bubaavangila benu lilibwe, ki tsalu benu luubaha? Banga masumu bomo ka bali mu usa buuna.

³⁴ Na tso benu libasombese huli bo baana ba benu libaakeele ti bafutala benu, ki tsalu benu libaakeele? Banga masumu ka bubasombesene bomo na bomo, mana mumosi afutala wuna bi iteesi mo hina.

³⁵ Ka baatondwani baboho ba benu, baasiilaani bo mamabwe, baasombesaani hwavele ubaakeele ti bafutala benu. Buna musyendo a benu sa aba wu munene. Benu sa liba baana ba Nzambi a Pungu, mu toni ati nde li wu mubwe huli banga nyinga na banga bukanyi.

A litsundasa bambaahi ve

³⁶ «Kwilaani lingebe we bu Taata a benu haluula mu kwili lingebe.

³⁷ A litsundasa ve, mana Nzambi a hatsundasa benu ka. A lisyembe ve, baasaani bana kolo-kolo, mana Nzambi asa benu ka kolo-kolo.

³⁸ Vaani, na Nzambi sa ava benu. Sa basyeholo hyetso hi hyafulala, hi hyakomo hutso bihode bya benu. Mu toni ati Nzambi sa afutala benu hyetso hi benu libaava bambaahi.»

³⁹ Yisu abweleele bo kuma moyi: «Bee inzimana utwala ubita inzimana na nde? Naana! Inzimana utwala ubita inzimana na nde ve; bo baboole sa babwa hutso iyuna.

⁴⁰ Musalili a haluta pfumu a nde ve. Ka pasi musalili wu ayiha sa aba we pfumu a nde.

⁴¹ Mu hima we li mu umono isyesyele hi hili mutso a diisu la mwana a ngu a we, hwavele utala kuunzi li lili mutso a diisu la we?

⁴² Buve, buni we utwala uleele mwana a ngu a we: “Nyaha me maasa isyesyele hi hili mutso a diisu la we!” Ka we mwakulu mutso a la we na kuunzi? We nga muwala, maatswamina umaasa kuunzi li lili mutso a diisu la we, titswene we mono bubwe mu umaasa isyesyele hi hili mutso a diisu la mwana a ngu a we.

Muti na mbutu a nde

⁴³ A huli na muti wu mubwe, wu ubaabuta mbutu yimbi ve. A huli na muti wu mubi, wu utwala ubuta mbutu yimbwe ve.

⁴⁴ Mu toni ati, pasi muti ubayabaana mu mbutu a nde. A bubaakoolo baafiige mu yulu matsyende ve. Bumosi kaka, utwala ukoolo mbutu a vinye mu tso miti mi ifundi ve.

⁴⁵ Muutu wu mubwe ubamwese mavanga mamabwe ma mali hutso mutima a nde. Muutu wu mubi ubamwese mavanga mamabi ma mali hutso mutima a nde. Munywa a muutu ubapalisa mambu ma maluula mu mutima a nde.

Tuungili yimbwe na yimbi

⁴⁶ Muhima benu libaateele me: “Pfumu! Pfumu!” — Na benu a libaayuhala me ve?

⁴⁷ Me tsa mwese benu naana muutu wu uya huli me hafwanina, wu ubaayuha mambu ma me na usalila mo.

⁴⁸ Nde li mu ufwanina na muutu mumosi wu atunga nzo a nde. Muutu mowuna avahi hu hati a tsina nate hu manya, atelimisi yene ŋa yulu a manya. Mu ilumbu hi nzali haluli, nyamba yayidi, mamba maayabwa mu nzo na mifudi. Ka nyamba a yatwali unyingasa nzo ve, mu toni ati, baatungi yo bu hwafwana.

⁴⁹ Ka muutu wu ubaayuha mambu ma me, hwavele usalila mo, nde afwanina na muutu wu atunga nzo hwavele utelemese yo ŋa yulu a manya. Mu ilumbu hi nzali haluuli, nyamba bu yabwidi mu nzo, mu mawasa, yo yabwidi, na “yatsamuhi tsaa”.»