Luuka 4 - Musamu wu Mubwe

Mukuyi alobisi Yisu

¹ Yisu amati hu Yolodani wu alula mu Livupu la Ngidi, na lo laabiti nde hu kumu a nzala.

² Mukuyi alobisi nde mu maku mana ma bilumbu. Mu bilumbu mobiina, nde a hadiidi ve. Nde amoni nzala.

³ Buuna mukuyi aleeli nde: «Tso we li Mwana a Nzambi, tuma manya molinili likituha lipa.»

⁴ Yisu afutili nde: «Baasonehe: “Muutu a huba monyi ndulu mu lipa ve.”»

⁵ Mukuyi abiti Yisu ŋa mbuha yi yasyenoho, amwesi nde mu mwana tangu hole bipfumu bya toto yoosi,

⁶ na aleeli huli nde: «Me upa we lituma na muyusu a bipfumu mobinibi. Mu toni ati, biloho mobinibi byosi baava me, na me ndi mu upa byo huli wuuna wu me tondi.

⁷ Tso we tsokimi ŋa busu bwa me, byo sa byuba bya we.»

⁸ Yisu afutili nde: «Mu libuku la ngidi baasonehe: “We afwana usambila Pfumu Nzambi a we, na ukiinza ndulu nde.”»

⁹ Titswene mukuyi abwebita nde hu Yeruselemi, asusi nde hu yulu mubundu a nzo a Nzambi na aleeli nde: «Tso we li Mwana a Nzambi, dumaha na bwa,

¹⁰ mu toni ati baasonehe: “Nde utuma bapofi ba nde mu ukelese we.”

¹¹ Na: “Bo bu uyaka we mu myoho mya bo, mana hulu hwa we a hukubana mu manya.”»

¹² Yisu afutili nde: «Mu Libuku la ngidi baasonehe: “We alobese Pfumu Nzambi a we ve.”»

¹³ Bu nde hamani ulobese Yisu, mukuyi atahuhi na nde, nate mu ukeele tangu kima.

Yisu abaandihi isalu hya nde hu Ngalili

¹⁴ Yisu afutihi hu Ngalili wu aluula mu matwala ma Livupu la Ngidi, na lidumu la nde layeni mu itanzi hyosi.

¹⁵ Nde akalongese baatu mu manzo ma masambulu ma Bayudaayo, na boosi baakayusa nde.

Baabisi Yisu hu Nazareti

¹⁶ Yisu ayidi hu Nazareti, hu nde habuuhi. Mu ilumbu hya saba, nde akoti mu nzo lisambulu yi Bayudaayo, we bu huli ipfu hya nde. Nde atelimi mu utanga libuku la ngidi,

¹⁷ na baviidi nde muhanda mumbihuli Esaya. Bu hadibuli muhanda, nde asooli mbuha yi baaba baasonehe bunuubu:

¹⁸ «Livupu la Pfumu lili ŋa yulu a me, mu toni ati, Pfumu amiisoolo me mu uyabisa Musamu wu Mubwe huli biyaha. Nde atsindihi me mu uleele huli ba baakangama: “Benu ka bunyanga!” Mu uleele huli binzimana: “Benu lu umono!” Nde atsindihi me mu uyobolo babali mu munyongi,

¹⁹ na mu uyabisa ilima hi lisyeme la Pfumu.»

²⁰ Yisu afuti muhanda, afutili nde huli musalili a nzo lisambulu yi Bayudaayo, na atsahili. Mutso a nzo lisambulu yi Bayudaayo, boosi baaba miisu ŋa yulu a nde.

²¹ Buuna, nde aleeli bo: «Ma baasonehe mu Libuuku la ngidi, ma benu li miyuha, loloyi mamiitswiha.»

²² Na boosi baakasilasa nde, na baakakimuha mu mambu mamabwe ma maakapala mu munywa a nde na baakaleele: «Nde wunuwu a ni mwana a Yosefi ve?»

²³ Yisu aleeli bo: «Me ndi na hiitu, ti benu lu uta me kuma moyiniyi: “Nganga, beeloso we, we mwakulu.” Na benu lu uleele kaka bunuubu: “Vanga kaka huni hu tsi a we mwakulu, mambu moosi ma bisu layuhi mamavyohi hu Kapernahumi.”»

²⁴ Yisu aleeli: «Mu mbuli me nzaabisa benu: mumbihuli a bubaayaka bubwe mu tsi a nde mwakulu ve.

²⁵ Mu mbuli yoosi me ndi mu unzabisa benu: mu tsi a Isereli yoosi, hwaba na bakwili ba bakasu babalahi mu tangu mumbihuli Eliya. Mu bilima bitatu na batsungi basamunu hwaba lwanga, na limbunga laakoti mu tsi yoosi.

²⁶ Mu bakwili mobaana, Nzambi a hatsindihi Eliya tso huli mumosi mu bo ve. Ka nde atsindihi nde ndulu huli mukwili a bula bwa Sarepita, hu tsi a Sidoni.

²⁷ Hu tsi a Isereli mu tangu mumbihuli Elisa, hwaba kaka na banga bwatsi babalahi. Tso mumosi mu bo a baabelusi ve, ka ndulu Namani musi tsi a Siriya.»

²⁸ Baatu boosi ba baaba mu nzo masambulu yi Bayudaayo bu baayuhi maana, baluuli mu kesi.

²⁹ Bo baatelimi, baapalisi Yisu hu mbadi musyenge a Nazareti, nate hu yulu isyelo hi bo baaba baatunga musyenge a bo, mana batsindahala nde hu baanda.

³⁰ Ka Yisu avyohi ŋa hati la bo na avyasuhi.

Yisu miibeeloso bahala nga livupu lilibi

³¹ Yisu ayeni hu Kapernahumi, musyenge a Ngalili, na nde akalongese baatu mu ilumbu hya saba.

³² Ndongisili a nde yakimusi baatu, mu toni ati, nde akalongese mu mbuli na matwala ma Nzambi.

³³ Mu nzo lisambulu yi Bayudaayo, hwaba na muutu mumosi wu tengo laaba laalwata. Na muutu mowuuna, akafulaha mu ndaha yi mifudi:

³⁴ «Ah! We hima na bisu, Yisu musi Nazareti, we miiya mu uyadimbasa bisu? Me nzaabi na we li, wa Ngidi wa Nzambi.»

³⁵ Yisu afwengili livupu lilibi: «Ba swi! Pala mu muutu mowunuwu!» Bu tengo labwisi muutu ŋa busu bwa bo, lo lapali mu muutu mowuna hwavele usa nde pasi dyambu.

³⁶ Boosi baakimuhi, na baakalelesene: «Ki pila a dyambu li? Nde ni ubaatuma mavupu mamabi mu matwala na mifudi, na mo ni ubaapala mu baatu!»

³⁷ Na lidumu la nde laayabiini mu mala moosi ma itanzi mohina.

Yisu miibeeloso babeedu ba pila mu pila

³⁸ Bu Yisu hamati hu nzo lisambulu yi Bayudaayo, nde akoti mu nzo a Simoni. Huuna, nde amoni buko bwa Simoni bu mukasu wu aba na bahu li mifudi. Na baatu baavondi Yisu mu ubeeloso nga bahu.

³⁹ Yisu atelimi ŋa bebele a nde, na aleeli baahu mu udimbala, ka bahu laapali. Mu mawasa, mukasu atelimi na akabili bo byudya.

⁴⁰ Bu tangu yadyami, boosi ba baaba na babeedu ba pila mu pila, baabehi bo huli Yisu. Nde asuusili bo myoho mya nde, na baabeeluhi.

⁴¹ Matengo mamalahi mapali mu baatu, na ubaafulaha: «We ni Mwana a Nzambi.» Ka Yisu akafwengele mo na ubaaliha mo mu utoyo mu toni ati, mo maaba mayaba ti nde ni Masiya.

⁴² Ŋa busi bwakiidi, Yisu apali na ayeni hu tsi yi busiha. Makonge ma baatu maasahi nde, na maayasoolo nde. Bo baasahi ukwisa nde ibata, mana nde avelesiisa bo.

⁴³ Ka Yisu aleeli bo: «Me apfwana kaka uyayabisa Musamu wu Mubwe, wu Ipfumu hya Nzambi hu misyenge mikima mu toni ati, ni mu liina Nzambi hatsindaha me.»

⁴⁴ Na buuna, nde akalongese mu manzo ma masambulu ma Bayudaayo hu itanzi hya Yuda.