Luuka 3 - Musamu wu Mubwe

Yowani Mutondihi akalongese baatu hutso a kumu a nzala

¹ Hwaba ilima hya kumi na bitanu, hi Kayisaali Tiberiyu haba mutumi matsi moosi ma Looma. Ponse Pilaato aba mutumi a tsi a Yuda, mu ilima mohiina. Eloode aba pfumu itanzi hya Ngalili, na mwana a ngu a nde Filipo, pfumu itanzi hya Iturya na Takonita. Lisanyasi aba pfumu itanzi hya Abilena.

² Ane na Kayifa baaba bakuutu ba banganga ba Nzambi. Mu tangu moyiina, Yowani mwana a Zakariya aba mutso a kumu a nzala. Nzambi ayabisi nde mambu ma nde.

³ Ni mu buuna, Yowani hatangili itanzi hyosi hya Yolodani, mu ubaalongese bunubu: «Yakaani tondihili, mana benu limwese ti benu laamiikingula mitima na usobo mbiili, mana Nzambi atsindula masumu ma benu.»

⁴ Ni we bu baasonehe mu muhanda a mambu ma mumbihuli Esaya: «Ni ndaha a muutu wuna wu uli mu ufulaha mutso a kumu a nzala: Vangaani luuha la Pfumu, sungahani misoho mya nde.

⁵ Kisalaani mitsundu myosi, syengaani bisyelo na bitukidi bikituha bidede. Sungahani manzila ma maatengeme, na syengaani misoho mimilahi mi mabaku.

⁶ Buuna baatu boosi bu umono liyobolo la Nzambi.»

⁷ Konge a baatu yayidi huli Yowani, mana nde atondehe bo. Nde akaleele huli bo: «Ibandu hi bapili, na alongese benu mu ubata kesi a Nzambi?

⁸ Ni mu buuna, butaani mbutu yi yi ukaata imbangi ti benu limisobo mbiili a benu. Na a lilelesene mu mitima mya benu ve ti: “Bisu lili na taata a bisu Abrahami.” Ka me ndeele benu ti, mamanya momanima, Nzambi utwala ukitusa mo baana ba Abrahami.

⁹ Paa pibi bamiivangimasa mu ukwanga muti mu manganzi. Ni mu buuna, pasi muti wu uvelebuta mbutu yimbwe, bu ukwanga nde na ubwaha nde hu mbaahu.»

¹⁰ Konge a baatu yakafuula nde: «Bisu hima lafwana usa?»

¹¹ Nde afutili bo: «Nyaha muutu wu uli na biyunga byole, akaba imosi huli wu avele na hyo. Na wu uli na byudya, akabila bana.»

¹² Hwayidi kaka bakuk ihi ba limandu, mana batondehe bo, na bo baafuuli Yowani: «Mulongisi, bisu hima lafwana usa?»

¹³ Nde aleeli bo: «A linono bibyafulala ŋa yulu a bi baava benu muswa ve.»

¹⁴ Masadaadu kaka maayafuula nde: «Ka bisu kaka, hima lafwana usa?» Nde aleeli bo: «A lipatula mbongo a muutu ve, a lileele dyambu li upfuta mu muutu ve, ka baatalaani ndulu pfuta a benu.»

Yowani Mutondihi ayabisi wuna wu uli mu uya

¹⁵ Baatu bu baaba mu ukeele na hiitu hyosi, boosi baakafulasana byuhu bo mwakulu hutso mitima mya bo, tso Yowani ni Masiya.

¹⁶ Yowani afutili huli boosi: «Me, me ndi mu utondehe benu mu mamba. Ka, wu uli mu uya, afulala me matwala, na me a handi tso wu akuha mu uba muviha, mu unyangula midi mi bikodi bya miilu mya nde ve. Nde wuuna utondehe benu mu Livupu la Ngidi na mu mbaahu.

¹⁷ Nde li na iyengese hya nde ŋa hoho, mu ukahula mbutu na biimbu. Nde ukukaha muhunu hutso iswehili hya nde, ka nde utsuha biimbu hu mbaahu yi yi uveledima.»

¹⁸ Yowani akayabisa Musamu wu Mubwe huli konge, na uva bo kwadisili kima yindahi.

¹⁹ Ŋa yulu a ŋaana, Yowani asyembi mutumi Eloode wu avoli na ukwele Elodiyade, mukadi a mwana a ngu a nde. Na nde abwesyembe Eloode mu toni mavanga moosi mamabi ma nde hasiidi.

²⁰ Ŋa yulu a maana moosi, Eloode akotisi Yowani mu kondaayi.

Tondihili a Yisu

²¹ Humbisa utondehe baatu boosi, Yowani atondihi kaka Yisu. Na bu Yisu hakasambila, yulu laadibumi,

²² na Livupu la Ngidi laakulimini ŋa yulu a nde we libembe. Na ndaha mosi yamati hu yulu: «We ni Mwana a me wu litondo, wu me umbapfulala utondo.»

Bukulu bu ibandu hya Yisu

²³ Bu Yisu habandihi isalu hya nde, nde aba bebele na bilima maku matatu. Baatu baakatsima ti nde aba mwana a Yosefi. Na Yosefi mwana a Eli.

²⁴ Eli aba mwana a Matati, Matati mwana a Leevi. Leevi aba mwana a Meleki, Meleki mwana a Yanayi. Yanayi aba mwana a Yosefi,

²⁵ Yosefi mwana a Matatyasi. Matatyasi aba mwana a Amosi, Amosi mwana a Nahumi. Nahumi aba mwana a Esely, Esely mwana a Nangayi.

²⁶ Nangayi aba mwana a Mahate, Mahate mwana a Matatyasi. Matatyasi aba mwana a Semeni, Semeni mwana a Yoseki. Yoseki aba mwana a Yoda,

²⁷ Yoda mwana a Yowanani. Yowanani aba mwana a Resa, Resa mwana a Zorobabele. Zorobabele aba mwana a Salatyele, Salatyele mwana a Neri.

²⁸ Neri aba mwana a Meleki, Meleki mwana a Adi. Adi aba mwana a Kosami, Kosami mwana a Elemada. Elemada aba mwana a Eri,

²⁹ Eri mwana a Yisu. Yisu aba mwana a Elyezeri, Elyezeri mwana a Yorimi. Yorimi aba mwana a Matati, Matati mwana a Levi.

³⁰ Levi aba mwana a Simeyoni, Simeyoni mwana a Yuda. Yuda aba mwana a Yosefi, Yosefi mwana a Yonami. Yonami aba mwana a Elyakimi,

³¹ Elyakimi mwana a Meleya. Meleya aba mwana a Mena, Mena mwana Matata. Matata aba mwana a Natani, Natani mwana a Davidi.

³² Davidi aba mwana a Yese, Yese mwana a Obedi. Obedi aba mwana a Booze, Booze mwana a Sala. Sala aba mwana a Nasoni,

³³ Nasoni mwana a Aminadabi. Aminadabi aba mwana a Adimini, Adimini mwana a Alani. Alani aba mwana a Esiloni, Esiloni mwana a Falesi. Falesi aba mwana a Yuda,

³⁴ Yuda mwana a Yakobi. Yakobi aba mwana a Isaki, Isaki mwana a Abrahami. Abrahami aba mwana a Tara, Tara mwana a Naholi.

³⁵ Naholi aba mwana a Seruki, Seruki mwana a Ragahu. Ragahu aba mwana a Faleki, Faleki mwana a Heberi. Heberi aba mwana a Sela,

³⁶ Sela mwana a Kayinami. Kayinami aba mwana a Alfasade, Alfasade mwana a Semi. Semi aba mwana a Nowa, Nowa mwana a Lemeki.

³⁷ Lemeki aba mwana a Matusalemi, Matusalemi mwana a Enoke. Enoke aba mwana a Yaleti, Yaleti mwana a Maleleheli. Maleleheli aba mwana a Kayinami,

³⁸ Kayinami mwana a Enosi. Enosi aba mwana a Seti, Seti mwana a Adami. Adami aba mwana a Nzambi.