Luuka 23 - Musamu wu Mubwe

Bayudaayo bamiibita Yisu ŋa busu bu mutumi Pilaato

¹ Pfuundu banzonzi yoosi yatelimi na yabiti Yisu huli mutumi Pilaato.

² Huuna, bo baabandihi mu ukese nde na ubaaleele: «Bisu limiibiisa muutu mowunuwu mu ulobese tungi la bula: nde li mu uliha baatu mu ufuta limandu huli pfumu Kayisaali, na nde li mu ubamonehele nde mwakulu ti nde ni Kristo, pfumu.»

³ Pilaato afuuli nde bu: «We ni pfumu Bayudaayo?» Yisu akaali: «Ni we miileele lo.»

⁴ Pilaato aleeli huli bakuutu ba banganga ba Nzambi na huli konge a baatu: «Me a handi mu umono toni yi yayelemene mu ubelese bahala molinili ve.»

⁵ Ka bo baabweleele na mifudi myosi: «Mu ndongisili a nde, nde li mu utsindahala baatu ba itanzi hya Yuda hyosi mu uvelesiingala lituma la tsi. Nde abaandihi hu itanzi hya Ngalili nate huni.»

Pilaato miitsindaha Yisu huli pfumu Eloode

⁶ Bu mutumi Pilaato hayuhi buuna, nde afuuli bo: «Bahala molinili musi Ngalili ali?»

⁷ Pilaato ayuha buuna, nde ayabi ti Yisu musi Ngalili ali. Itanzi mohina hyaba hutso lituma la pfumu Eloode. Titswene Pilaato atsindihi nde huli Eloode wu aba hu Yeruselemi, mu bilumbu mobiina.

⁸ Eloode aba na kinya yindahi mu umono Yisu. Mu toni ati, umata beleve, nde akayuha tsangu a nde. Nde akasa hiitu ti Yisu sa asa ipadi ŋa miisu ma nde.

⁹ Nde aviidi nde bidoodo bibilahi, ka Yisu a hafutili nde dyambu tso limosi ve.

¹⁰ Bakuutu ba banganga ba Nzambi na balongisi ba Mikele baaba ŋana, baakakese Yisu na kesi yoosi.

¹¹ Eloode na masadaadu ma nde, baakasyebe na utuha Yisu. Bo baalwatisi nde ikutu hi ibwe na baafutili nde huli Pilaato.

¹² Eloode na Pilaato aba baboho. Ka umata ilumbu mohina bo baakituhi bambaahi.

Yisu bamiibelese mu lipfu

¹³ Pilaato akungi bakuutu ba banganga ba Nzambi, bakuutu ba Bayudaayo na baatu boosi.

¹⁴ Nde aleeli bo: «Benu limiibehele me muutu mowunuwu na uleele ti, nde li mu utsindahala baatu mu uvelesiingala lituma la tsi. Ka me mwakulu miipa nde byuhu, ŋa busu bwa benu, na me a hamono toni mu nde, mu moosi ma benu lili mu ukese nde ve.

¹⁵ Eloode ka, a hamoni toni mu nde ve. Nde miifutala bisu nde. Mu mbuli, muutu mowunuwu a hasa pasi dyambu li nde hubaha kesili yi lipfu ve.

¹⁶ Ni mu buuna, me utuma batete nde bikooti, humbisa me unyahula nde.» [

¹⁷ ]

¹⁸ Bo baafulihi boosi mu itwadi: «Duba muutu mowunuwu, na nyahula bisu Barabasi!»

¹⁹ Barabasi baakotisi kondaayi mu toni midingu mi myabwidi hutso musyenge, na bu nde hadubi muutu.

²⁰ Pilaato abweleele huli konge a baatu, bu haba na tsimi yi unyahula Yisu.

²¹ Ka konge yoosi yafulihi: «Komene nde ŋa kuruwa! Komene nde ŋa kuruwa!»

²² Pilaato abweleele leele li matatu: «Ki dyambu lilibi nde hasa? Me a hamono toni yi bu uduba nde ve. Ni mu buuna, me utuma batete nde bikooti, humbisa, me unyahula nde.»

²³ Ka bo baasinzifulaha mu mifudi, na ubaavondo ti bakomene Yisu ŋa kuruwa. Na ufulaha hwa bo hwabiingi.

²⁴ Pilaato avoli kesili yi ukuhasa litondo la bo.

²⁵ Nde anyahuli wuna wu bo baakavondo. Ni wu abeedi mu kondaayi mu toni midingu mi myabwidi hutso musyenge, na bu nde hadubi muutu. Pilaato ayehuli bo Yisu mu usa litondo la bo.

Yisu baakomini ŋa kuruwa

²⁶ Bu bo baakabita Yisu, bo baabwani na muutu mumosi nduhi Simoni, musi Kilene, wu akamata hu matsyehe. Masadaadu maakangi nde na maakwihi nde kuruwa mu ubita humbisa a Yisu.

²⁷ Konge a tungi la bula yinene yakaduukala nde. Hwaba ka na bakaasu ba baakalila na uyayana mu toni a nde.

²⁸ Yisu akinguhi huli bo na aleeli: «Bamama ba Yeruselemi, a lilila mu me ve. Ka lilaani mu benu na baana ba benu.

²⁹ Ka tangu yamiibeleme yi bu uleele: “Kinya huli bakaasu ba binguma, ba bakini a baabuti ve, na ba bakini a baaviidi mwana beelo ve!”

³⁰ Na baatu sa ba baaleele huli bisyelo: “Bwani ŋa yulu a bisu!” Na huli bikundahala: “Fungalaani bisu!”

³¹ Tso bavangili manima mu muti wu mubisu, buni bu uba mu muti wu akanya?»

³² Baabiti ka biyahudi byole, mana baduba bo nzila mosi na Yisu.

³³ Ŋa baayato ŋa mbuha mosi yi baakateele «Ibanga», masadaadu maakomini Yisu ŋa kuruwa, nzila mosi na biyahudi bibyole. Mumosi ŋa mbahala a Yisu, wuna ŋa kaasu a nde.

³⁴ [Yisu aleeli: «Taata, sa bo kolo-kolo, mu toni ati, bo a bayabi ma bali mu uvanga ve.»] Bo baatiidi ngodo mu ukaba bikutu bya nde.

³⁵ Konge a baatu yaba ŋana na yakatala. Bakuutu ba Bayudaayo, bo, baakakwede Yisu na baakaleele: «Nde fuuhisi bakima, nyaha nde afuuhasa nde mwakulu. Tso mbuli nde ni Kristo, wu Nzambi hasoolo!»

³⁶ Masadaadu ka maakakwede nde na maayasusaha mu uva nde vinye a nganyi.

³⁷ Na maaleeli: «Tso we ni pfumu Bayudaayo, nyaha we fuuhasa we mwakulu!»

³⁸ Ŋa yulu mutswe a nde hwaba na baya li baasonehe bu: «Nde wunuwu ni pfumu Bayudaayo.»

³⁹ Mumosi mu biyahudi bi baakomini ŋa kuruwa, akatuha Yisu na ubaaleele: «We ali Kristo ve? Fuuhasa we we mwakulu na bisu kaka!»

⁴⁰ Ka hya byole hyasyembi wuna na uleele: «We tso boomo bwa Nzambi ve? We wu uli mu tsyembili mosi na nde!

⁴¹ Mu bisu a we, tsyembili moyiniyi yayelemene. Mu toni ati bisu a we, tsyembili mavanga ma bisu a we lili mu uyaka. Ka nde wunuwu a hasa lilibi tso limosi ve.»

⁴² Titswene nde abweleele: «Yisu, yibwala me monyi, ŋa bu ubyalisa we mu Ipfumu hya we.»

⁴³ Yisu afutili nde: «Mu mbuli me ndi mu undeele we: loloyi, we uba itwadi na me hu paradiso.»

Lipfu la Yisu

⁴⁴ Hwaba hu pedu a ngunga ya mwangulu, na piipidi yabwidi mu tsi yoosi, na yakwilili te mu ngunga yi matatu ya humbisa a mwangulu.

⁴⁵ Litadi laadyami loosi, na nguumbu a mu nzo a Nzambi yapasihi mu bitini byole.

⁴⁶ Buuna Yisu afulihi mu mifudi myosi: «Taata, me tsusi ilunzi hya me ŋa myoho mya we.» Na bu nde haleeli buuna, nde amani muvumu.

⁴⁷ Hwaba na muutu mumosi, mukuutu a kama li balwani. Bu nde hamoni buuna, ayusi Nzambi na aleeli: «Ni mbuli, muutu mowunuwu a habeedi na toni ve.»

⁴⁸ Baatu ba baayidi mu konge, baamoni moosi ma maavyohi. Boosi baafutihi mu manzo, na ubaabula tulu mu lingebe.

⁴⁹ Bambaahi ba Yisu boosi, na bakaasu ba baaduukili nde umata hu Ngalili, baaba baateleme, mu ubaatalila moosi ma maakavyoho.

Ndihili a Yisu

^50-51 Hwaba na bahala limosi, nduhi a nde Yosefi. Nde aba musi bula bu Bayudaayo bwa nduhi Arimate. Bahala moliina aba muutu wu mubwe na wu asungama, na nde akakeele nziili Ipfumu hya Nzambi. Nde aba mumosi ŋa hati la pfuundu banzonzi ba Bayudaayo. Ka nde a hasiingi kesili na ma banzonzi bakima baasiidi ve.

⁵² Nde ayamono mutumi Pilaato na uvondo nde muswa mu uvolo mvumbi a Yisu.

⁵³ Nde asutisi nyutu a Yisu ŋa kuruwa, nde apoti yo mu tsanda ya lino. Na nde asuusi yo hutso a ngila yi baaba baavala hutso a manya. Ngila moyina aba kini a baadiihi mvumbi mu yo ve.

⁵⁴ Hu tsitsaha ilumbu hi bitaanu, baatu baakavangimasa mukungi mu toni ati, ilumbu hya saba hyaba bebele.

⁵⁵ Bakaasu ba baakayene na Yisu umata hu Ngalili, baaduukili Yosefi. Bo baatali ngila na baamoni buni baasuusi mvumbi a Yisu.

⁵⁶ Titswene bo baafutihi hu musyenge na baavangimisi maadi ma tsulu yimbwe na nyafi bya nyutu a Yisu. Mu ilumbu hya saba, bo baavumi, we bu hwaba tumili mukele a Moose.