Luuka 22 - Musamu wu Mubwe

Bakuutu ba Bayudaayo baakoti pfuundu yimbi mu Yisu

¹ Mukungi mapa ma maaveledaana, wu bubateele «mukungi a Paake» aba aka bebele.

² Bakuutu ba banganga ba Nzambi na bakuutu ba mikele baakasaha manzila ma uduba Yisu. Ka bo baaba na boomo bwa baatu.

Yuda asahi manzila ma usumbasa Yisu

³ Mono buni Satana hakoti mu Yuda, nga nduhi a Isikaryoti, wu aba mumosi ŋa hati la kuumi na bilumbi byole.

⁴ Yuda ayayuhasana na bakuutu ba banganga ba Nzambi, na bakuutu ba bakeedi ba nzo a Nzambi. Bo baayuhisini mu usaha buni nde hakisumbasa bo Yisu.

⁵ Bo baaba na kinya na bo baakuti mu uva Yuda mbongo.

⁶ Yuda asiingi na abwi mu usaha nzila yimbwe mu usumbasa bo Yisu, hwavele baatu uyaba.

Yisu atumi mu uvangimasa metse ma mukungi a Paake

⁷ Ilumbu hi mukungi mapa ma maaveledaana, hi baakatsuha bungodu bwa Paake hyatoodi.

⁸ Yisu atsindihi Peetelo na Yowani hu busu na aleeli bo: «Yavangilaani bisu ilaambu hya Paake.»

⁹ Bo baafuuli nde: «Huni we tondi ti bisu liyavangimasa hyo?»

¹⁰ Nde afutili bo: «Ŋa benu lu ukoto mu musyenge, bahala limosi, na lisanga li laaluula mu mamba, sa ayabwana benu. Dukalaani nde hutso a nzo yi nde hukoto,

¹¹ na benu lileele nga nzo bunuubu: “Mulongisi ti: ‘Itini hya nzo hi me undya Paake na bayihi ba me huni hili?’”

¹² Buuna nde sa alaha benu itini hinene hi baamiivanga hu yulu ibanga. Ni huuna benu luvangimasa Paake.»

¹³ Bo boole baayeni, baamoni mambu we bu Yisu hayabisi bo mo. Peetelo buna Yowani baavangimisi ilaambu hya Paake.

Ilaambu hya Pfumu

¹⁴ Tangu bu yatoodi, Yisu atsahili ŋa metse na bilumbi.

¹⁵ Nde ni uleele bo: «Me mbeedi na lehemene mu udya ilaambu hya Paake moyi na benu, tswamina me mono pasi.

¹⁶ Ka, me ndeele benu, me a humbwendya hyove, nate bu Nzambi huva tsalu a hyo hu Ipfumu hya nde.»

¹⁷ Nde avoli mbuungu, afutili matondo huli Nzambi, na aleeli: «Volwani mbuungu moyi, na kabasanani yo.

¹⁸ Me ndeele benu, vangani buuna, mu toni ati, me a umbwenywa vinye ve, nate bu Ipfumu hya Nzambi hyuya.»

¹⁹ Titswene nde avoli lipa, afutili matondo huli Nzambi, abukili lo, akabili bo mu bitini na aleeli: «Yiniyi ni nyutu a me yi me piidi mu benu. Saani buuna mu uyibwala me monyi.»

²⁰ Nde asiidi ka bumosi mu mbuungu. Bu bo baamani udya, Yisu aviidi bo mbuungu na aleeli: «Mbuungu mo yiniyi ni lahi li linyatihi, ŋa hati la Nzambi na baatu. Lahi moliina baasiidi lo mu makila ma me, ma maatsamuhi mu benu.

²¹ Ka monwani, nde wuna wu usumbasa me, ni ŋa metse ŋa ali na me.

²² Mwana a muutu sa akwa we bu huli kesili a Nzambi. Ka ni lingebe huli nde wuna wu usumbasa nde!»

²³ Na bilumbi byabandihi ufulasana ŋa hati la bo: «Na akisa buuna?»

Na afulala bukuutu?

²⁴ Ŋa hati li bayihi hwabwidi kele yinene, mu uyaba na ŋa hati la bo aba afulala bukuutu.

²⁵ Yisu aleeli bo: «Bapfumu ba mabuli ma matsi makima, bubaatsahilala baatu ba bo. Na babali na lituma ŋa yulu a bo, bubaasa ti baateele bo “banga mavanga ma mabwe”.

²⁶ A huyelemene buuna mu benu ve. Nyaha wu aluta bukuutu ŋa hati la benu, aba we ngebe a benu; wu ubaatuma benu, aba we musalili a benu.

²⁷ Na fuli bukuutu, wuli ŋa metse vo musalili wuli mu uva nde byudya? Wuli ŋa metse, ni mukuutu. Ka me ndi ŋa hati la benu we musalili.

²⁸ Benu likwilili na me hutso mapasi ma me.

²⁹ Ni mu buuna, we bu Taata a me hava me lituma, me kaka ndi mu upa benu lituma,

³⁰ Ni mu buuna benu lu udya na unywa na me, hutso Ipfumu hya me. Na benu sa litsahala ŋa makiti ma bupfumu, mu utsundasa bibandu kuumi na byole bya Isereli.»

Yisu ayabisi ti Peetelo sa atuna nde

³¹ «Simoni, Simoni! Kele! Satana amiivondo muswa mu ususa benu ŋa iyengese, we bu bubayengese mbutu a looso.

³² Ka me atsambili mu we, mana hiitu hya we mu Nzambi, hiveletsuda. Na ŋa we uyafutaha huli me, hwadisa baana ba ngu a we.»

³³ Peetelo aleeli nde: «Pfumu, me ndi wu avangama mu uyene na we hutso a kondaayi na ukwa na we.»

³⁴ Yisu afutili nde: «Peetelo, me ndeele we, tsusu na maakohele loloyi, we sa tuna me tuna tatu.»

Mbongo, koome na sabila

³⁵ Nde abweleele bo: «Ŋa me atsindihi benu hwavele ipoholo hya mbongo, tso koome, tso bikoodi, benu laakiimi mu isiha?» Bo baafutili: «Isiha tso imosi ve.»

³⁶ Na nde aleeli bo: «Ka bunuubu, woosi nga ipoholo hya mbongo, nyaha avolo hyo. Ni we nga koome ka. Na wu avele na sabila, asumbasa ikutu hya nde na asumba sabila a nde.

³⁷ Ka me ndeele benu, hwafwana mu ukuhasa ma mumbihuli a Nzambi hasonehe mu me: “Baasuusi nde mu litangu la banga mamabi, na dyambu mo liinili lafwana utswiha mu toni a me.” Mu toni ati moosi ma baasonehe mu me, sa matswiha.»

³⁸ Bayihi baaleeli: «Pfumu, mono basabila boole.» Na nde afutili bo: «Baana tsiitsa!»

Yisu asambili ŋa isyelo hya Olive

³⁹ Bu nde hapali, nde ayeni we bu hwaba ipfu hya nde hu isyelo hya Olive. Bayihi ba nde baaduukili nde.

⁴⁰ Bu nde hatoodi ŋa mbuha moyina, nde aleeli bo: «Sambilaani, mana Nzambi akumbasa benu mu uvelenyahula hiitu mu nde.»

⁴¹ Titswene nde atahuhi mwana lala na bo, na asambili.

⁴² Yisu aleeli: «Taata, tso we tondi, maasila me mbuungu yi mapasi yiniyi. Nyaha litondo la we livangama, ka a la me ve.»

⁴³ Na pofi amati huli Nzambi, ayamonehele na nde, mu uhwadisa nde.

⁴⁴ Hutso maangongo, nde akasambila na mifudi mi myavyohelele. Hyunga hya nde hyakituhi we matangi ma makila ma maakabwa ŋa toto.

⁴⁵ Bu nde hamani usambila buuna, Yisu atelimi, ayasusaha hu pedu bayihi ba nde. Nde abiisi bo tolo, utso ikolili na lingebe.

⁴⁶ Yisu aleeli bo: «Muhima benu lili mu ubwamina? Telemaani, na sambilaani, mana Nzambi akumbasa benu mu uvelenyahula hiitu mu nde.»

Yisu bamiiyakaanga

⁴⁷ Nde a hamani utoyo ve, konge a baatu yayidi. Nga nduhi a Yuda, mumosi ŋa hati la kuumi na bilumbi byole, aba ŋa busu. Nde ayasusaha ŋa pedu a Yisu mu uviva nde.

⁴⁸ Yisu aleeli nde: «Yuda, ni mu muvivu we misuumbasa Mwana a muutu!»

⁴⁹ Bilumbi bya Yisu, bu byamoni ma maaba mu uvyoho, baafuli nde: «Pfumu, litina bo mu basabila ba bisu?»

⁵⁰ Na, mumosi mu bo ateti musalili wu mukuutu banganga ba Nzambi, na akesi nde tswi la mbahala.

⁵¹ Ka Yisu aleeli: «Nyahani! Buuna ka tsiitsa.» Yisu abembi tswi la bahala mo, na abeelusi nde.

⁵² Titswene nde aleeli huli bakuutu ba banganga ba Nzambi, huli bakuutu ba bakeedi ba nzo a Nzambi, na huli bakuutu ba Bayudaayo ba baayidi, hu uyakanga nde: «Benu limiiya na basabila, na makooko we me wuli ipumbulu.

⁵³ Me kamba tangu yoosi na benu mu litandala la nzo a Nzambi, na benu a laakaangi me ve. Ka tangu mo yiniyi ka ya benu na yi matwala ma piipidi.»

Peetelo atuni Yisu

⁵⁴ Bu bo baamani ukanga Yisu, bo baabiti nde hu nzo mukuutu banganga ba Nzambi. Peetelo akadukala bo mu lilalala.

⁵⁵ Ŋa butima bu litandala la nzo, bo baaduuki mbaahu, na baatsahili. Peetelo atsahili ŋa hati la bo.

⁵⁶ Musalili mumosi wu mukaasu wu abeedi na bo, mu liyalala la mbaahu adihuli Peetelo. Mukaasu asungimini nde na aleeli: «Bahala molinili ka labeedi na Yisu!»

⁵⁷ Ka nde atuni na aleeli: «Mukaasu, me a nzaabi nde ve!»

⁵⁸ Mwana a tangu hole yivyoho, muutu mukima amoni nde na aleeli: «We kaka li mumosi wa ŋa hati la bo.» Na Peetelo akaali: «Bahala, a me ve!»

⁵⁹ Humbisa a bebele a ngunga mosi, mukima abwesilasa: «Mu mbuli, bahala molinili kaka libeedi na nde, mu toni ati nde musi Ngalili.»

⁶⁰ Peetelo akaali: «We, me a nzaabi ma we tondi uleele ve.» Mu tangu moyina, bu nde haba kini mu utoyo, tsusu akohili.

⁶¹ Pfumu akinguhi na atali Peetelo. Na Peetelo ayibwili monyi mu mambu ma Pfumu haleeli nde: «Tsusu na maakohele loloyi, we utuna me tunala tatu.»

⁶² Peetelo apali mu litandala, nde abwi mu ulila mu mifudi.

Baatu baakanyongese Yisu

⁶³ Baatu ba baakakelese Yisu baakakwede nde, na baakatete nde.

⁶⁴ Bo baakafungala nde hiinzi, na baakava nde byuhu, na ubaaleele: «Bihula! Na leele na miitete we.»

⁶⁵ Bo baahwadi mu usinzatuha nde.

Yisu ŋa busu bwa pfuundu banzonzi ba Bayudaayo

⁶⁶ Ŋa busi bwakiidi, bakuutu ba tungi la bula, bakuutu ba banganga ba Nzambi na balongisi ba Mikele, boosi baakuukimi. Baabiti Yisu ŋa busu bwa pfuundu a bo, pfuundu banzonzi yi Bayudaayo.

⁶⁷ Bo baleeli: «Tso we ni Kristo, leele bisu.» Yisu akaali bo: «Tso me ndeeli benu lo, benu a lusinga ve.

⁶⁸ Tso me piidi benu hyuhu, benu a lukaala me ve.

⁶⁹ Umata loloyi, Mwana a muutu sa atsahala ŋa mbahala a Nzambi a Pungu.»

⁷⁰ Boosi baaleeli: «We kaahu Mwana a Nzambi we li?» Na nde afutili bo: «Benu mwakulu limileele lo.»

⁷¹ Na bo baaleeli: «Bisu a lisaali na nzala bambangi ve. Mu toni ati bisu limiyuha bisu mwakulu ma mamipala mu munywa a nde.»