Luuka 21 - Musamu wu Mubwe

Bungodu bu mukwili

¹ Yisu asuuli miisu, nde amoni bisina bi byakasuusa bungodu bwa bo mu ipoholo hi bungodu hi hyaba hutso a nzo a Nzambi.

² Nde amoni ka mukaasu, mukwili wu iyaha wu ayasuusa mwa bakuta boole.

³ Na nde aleeli: «Mu mbuli, me ndeele benu, mukwili wu iyaha mowunuwu vidi hwaluta bana boosi.

⁴ Ka baatu mobaniba boosi, baayasuusa tsyetsyengu busina bwa bo. Mukwili mowunuwu hutso buyaha bwa nde, suusi byosi bi nde abeedi na byo mu uba monyi.»

Yisu ayabisi baatu tsalili a nzo a Nzambi

⁵ Kabu la baatu laakatoyo mu toni a nzo a Nzambi. Bo baamoni bubwe bwa yo, bu baaba bayolo yo mu mamanya ma talu na bisiha bi baakava bungodu huli Nzambi. Ka Yisu aleeli:

⁶ «Hubusu, bi benu lili mu umono bi, a husaala tso manya limosi ŋa yulu a manya ve. Byosi sa batsala.»

Yisu ayibusi bayihi mu toni lingebe na mapasi

⁷ Bo baafuuli nde: «Mulongisi, ki tangu mambu momanima mu utswiha na ki iliimbu humwese bisu ti mambu momanima mu utswiha?»

⁸ Yisu afutili bo: «Kebaani, muutu a hapfuta benu ve. Mu toni ati babalahi bu uya mu nduhi a me, na ubaaleele: “Ni me Masiya!” — Na “Tangu yamito.” Ka a liduuka bo ve.

⁹ Ŋa benu luyuha tsangu midiingu na miyungu, a liba na boomo ve, mu toni ati misamu momiina myafwana umavangama. Ka yina kini a ni tsukusu a tsi ve.»

¹⁰ Na Yisu abweleele: «Baatu ba tsi mosi sa balwanisa baatu ba tsi kima, na baatu ba ipfumu imosi sa balwanisa baatu ba ipfumu ikima.

¹¹ Toto sa yinyingama mu mifudi, na mu bitanzi bibilahi, sa uba na limbunga na mabeedu ma tsisu. Sa huba ka na misamu mya tsisu, na bilimbu bi binene bi umonehele hu yulu.

¹² Ka tswamina mambu momaana mavangama, sa bakaanga benu, sa batsuta benu. Sa bayeholo benu hu tsundusu mu manzo ma lisambulu ma Bayudaayo. Sa babwaha benu mu kondaayi. Sa babita benu ŋa busu bu bapfumu na lituma la tsi mu toni a nduhi a me.

¹³ Sa huba huli benu nzila yi uta imbangi mu nduhi a me.

¹⁴ Yabani li: benu a lu utehele uvangimasa ma benu lu uleele mu ukalila nyutu a benu ve, tso ki mambu benu luupalisa ve.

¹⁵ Memo tsapa benu mambu na buyedi mana muutu tso mumosi ŋa hati li bambeene ba benu avelesa paha na uleele ti benu na upfuta.

¹⁶ Tso bataata na ba ngu ba benu, baana ba ngu ba benu, baakedi ba benu, ikuta na bambaahi ba benu, sa basumbasa benu, na sa baduba babalahi mu benu.

¹⁷ Baatu boosi sa babelele benu mu toni a me.

¹⁸ Ka tso linanga limosi li mutswe a benu a luudimbala ve.

¹⁹ Hwadaani! Ni mu mukami a benu, benu luyobolo monyi a benu.»

Yisu li mu uyabisa utsala hu musyenge a Yeruselemi

²⁰ «Ŋa benu luumono mabundu ma balwani ma midiinga musyenge a Yeruselemi, benu sa liyaba mu tangu moyina, ti utsala hwa yo huka bebele.

²¹ Buuna, ba bu uba hu itanzi hya Yuda, nyaha bo babata hu yulu bisyelo. Boosi ba bu uba hutso musyenge a Yeruselemi nyaha bo bapala na batahuha hu lala. Boosi ba bu uba mu mala, nyaha bavelekoto mu musyenge.

²² Bilumbu mobiina sa biba bilumbu bi Nzambi husyembe bisu Yeruselemi. Moosi ma baasonehe ma Ngidi sa matswiha.

²³ Ni lingebe huli bakaasu banga mayimi, buve banga a baana ŋa beelo mu tangu moyina. Mu toni ati, baatu ba tsi sa bakoto hutso lingebe, na kesi a Nzambi sa yibwa ŋa yulu a baatu mobana.

²⁴ Sa baduba bo mu basabila, buve sa babita bo hu buviha mu matsi moosi. Mabuli ma matsi makima sa mayabyalila Yeruselemi, nate bu tangu tumili a mo yi usuka.

Nziili a Mwana a muutu

²⁵ Sa huba na bilimbu bya kimwili hutso a tangu, hutso a tsuungi na hutso bamvwelele. Mabuli ma matsi makima sa maaba hutso a tsisu na munyongo, mu toni a kele a nyamba yi yili mu umata hu tsyelo mibu.

²⁶ Babalahi sa bakoto mu ikolili mu toni a ma muubwa ŋa toto yoosi, mu toni matwala ma mu nyingama hu mayulu.

²⁷ Humbisa, sa bamono Mwana a muutu mu uya hutso mayidu na matwala na muyusu a nde woosi.

²⁸ Na bu misamu mominimi myubaandiha uvangama, hwadaani mutele na suulaani mutswe, mu toni ati liyobolo la benu lika bebele.»

Ndongisili muti a fiige

²⁹ Nde abweta bo sahu molinili: «Monwani muti a fiige, tso pasi muti.

³⁰ Bu benu luumono ti miti mika mu ufula makaya, benu limiyaba ti tangu yimbwe yika mu uya.

³¹ Ni bumosi ka, bu benu luumono bisiha mobiina mu uya, yabaani ti Ipfumu hi mayulu hika bebele.

³² Me ndeele benu mu mbuli, tungi la baatu molinili a bukwa boosi ve, na mamoosi sa matswiha.

³³ Yulu na toto sa bidimbala, ka mambu ma me a mundimbala ve.»

Sambilaani tangu yoosi

³⁴ «Liba likanda! A lilemese mivuumu mya benu mu mikuungi ve, mu udya, mu ukolo malamu na mu toni minyongo mu mya idiingu mohi ve. Tso likuhisi maana, ilumbu mo hina sa hipadumasa benu,

³⁵ we mweto. Mu toni ati hyo sa hibwa ŋa yulu a baatu ba ŋa toto yoosi.

³⁶ A libwamina matolo ve, sambilaani tangu yoosi. Lisa buuna mana benu libaha mifudi mu upala mutso a moosi mamali mu uya, na uyamonehele mutele ŋa busu bwa Mwana a muutu.»

³⁷ Bilumbu byosi ŋa nyangu, Yisu akalongese mu nzo a Nzambi. Butsuhu nde akayene hu isyelo hya Olive hu nde hakabaaba butsuhu boosi.

³⁸ Na baatu boosi, ŋa hati a ngwali, baakayene hu litandala la nzo a Nzambi mu uya duukala ndongisili a nde.