Luuka 19 - Musamu wu Mubwe

Zakaayi miyaka Yisu hu nzo a nde

¹ Yisu akoti mu musyenge a Yeriko na ataangili nde.

² Huuna hwaba na bahala limosi la nduhi a Zakaayi. Nde aba mukuutu bakambi ba limandu na nde aba isina.

³ Nde akasaha umono Yisu, ka nde a hakatwala ve mu toni a konge a baatu. Zakaayi aba mukusi.

⁴ Nde ayeni tiinu hu busu, na avati hu yulu muti wa sikomore mana nde amono Yisu wu akavyohele ŋana.

⁵ Bu Yisu hatoodi ŋa mbuha moyina, nde asuuli miisu na aleeli nde: «Zakaayi, sutaha mawasa! Loloyi me apfwana uba hu nzo a we.»

⁶ Zakaayi asutihi mu mawasa na ayaki nde na kinya yoosi.

⁷ Baatu bamono buuna, boosi baakaŋono na baakaleele: «Muutu mowunuwu miyabala mupaaku huli wu asumaha.»

⁸ Ka Zakaayi, mutele, ŋa busu bwa Pfumu, ni uleele nde: «Pfumu! Me tsapa ibadi hi busina bwa me huli biyaha. Tso me apolo mbongo yi ndahi huli muutu ŋa me akakamba limandu, me tsapfutala nde byetso bina ŋa yulu a bi me apoli.»

⁹ Yisu aleeli nde: «Loloyi Nzambi miiyobolo baatu babali mu nzo moyi, mu toni ati muutu mowunuwu ka li wu imbisa hya Abrahami.

¹⁰ Eye, Mwana a muutu aya mu usaha na uyobolo ba baadimbala.»

Sahu li bikuuku bya wolo

¹¹ Yisu abweta sahu likima huli ba baabeedi baamiiyuha mambu momaana. Nde aba bebele na musyenge a Yeruselemi. Nde hatiidi sahu moliina, mu toni ati baatu baakatsima ti Ipfumu hya Nzambi a hyakibwetamba mu umonehele ve.

¹² Yisu ni uleele: «Bahala limosi la nzo bapfumu, layeni hu tsi a lala hu uyabaha bupfumu. Ka Humbisa nde akiyafutaha.

¹³ Teehele nde mu uyene, ateeli kuumi ŋa hati li basalili ba nde, na aviidi pasi nde ikuuku hya wolo imosi hya talu yindahi. Nde aleeli bo: “Saani mumbungu, nate bu me unzapfutaha.”

¹⁴ Ka baatu ba bula bwa nde baaba baabelele nde. Bo baatsindihi konge bilumbi ŋa mbisa a nde mu uyaleele: “Bisu a litondi ti nde aba pfumu a bisu ve.”

¹⁵ Baabyalisi nde bupfumu. Bu nde hayafutaha, nde hatsihi basalili ba nde, ba nde havidi mbongo, mu uyaba ki kaluha bo baabahi.

¹⁶ Wu a tsomi ayamonehele na aleeli: “Pfumu, ikuuku hi we ava me hyabuta bikuuku kuumi.”

¹⁷ Pfumu aleeli nde: “We siidi bubwe. We musalili wu mubwe, mu toni ati we mi mwese imbuli mu mwa bisiha bya hole. Me piidi we lituma li misyenge kuumi.”

¹⁸ Wu a boole ayidi na aleeli: “Pfumu, ikuuku hi we ava me hyabuta bikuuku bitaanu.”

¹⁹ Pfumu aleeli huli nde wu: “We kaka, me miipa we lituma li misyenge mitaanu.”

²⁰ Mukima ayidi na aleeli: “Pfumu, mono ikuuku hya we hya wolo hi me mbeedi atswehe hutso a itini hya tsanda.

²¹ Me tsiidi buuna, bu me mbeedi na boomo bwa we. We li muutu nga likondinakaali, mu toni ati we ubaavolo bi we aveleswehe na we ubaakuukaha bi we avelekuna.”

²² Pfumu aleeli nde: “Musalili wu mubi! Me tsa tsundasa we ŋa yulu mukuma a we mwakulu. We ayaba ti me muutu nga likondinakaali, ti me umbaapolo bi me apele tswehe, me umbaakuukaha bi me apele kuna.

²³ Muhima we avelesuusa mbongo a me hutso a nzo iswehili hya mbongo? Humbisa a pfutihili a me, me kipolo yo na kaluha ŋa yulu.”

²⁴ Titswene nde aleeli huli baatu ba nde ba baaba ŋana: “Patulaani nde ikuuku hya nde hya wolo, na vaani hyo huli nga bikuuku kuumi.”

²⁵ Bo baaleeli huli nde: “Pfumu, a li buni! Nde ti amiikwabaha bikuuku kuumi.”

²⁶ Pfumu akaali: “Me ndeele benu, sa basinzava huli wuna wu abaha. Ka huli wu avelebaha, sa bapatula pa bi nde ali na byo.

²⁷ Titswene, behelaani me baboho ba me, ba baavelitondo ti me mba pfumu a bo, na baduba bo, ŋa busu bwa me.”»

²⁸ Nde amana utoyo buuna, Yisu avyohi ŋa busu, na nde akumi hu tsyelo musyenge a Yeruselemi.

Yisu miikoto mu musyenge a Yeruselemi

²⁹ Ŋa Yisu hayato hupedu a mala ma Betefage na Betanya hu tsyelo Isyelo hya Olive, nde atsindihi bayihi boole.

³⁰ Yisu aleeli bo: «Yenaani hu bula bwa hu busu. Ŋa benu luuto huuna, benu lu umono ibubuuru baakutala. Ibubuuru mohiina kini a hyabiti muutu ve. Nyangulaani hyo na behelaani me hyo.

³¹ Tso muutu fuuli benu: “Mu hima benu lili mu unyangula hyo?” Benu lifutili nde: “Pfumu li na nzala hyo.”»

³² Ba baatsindihi bayene, baabiisi we bu Yisu hayabisi.

³³ Bu bo baakanyangula ibubuuru, banga hyo baaleeli bo: «Mu hima benu lili mu unyangula ibubuuru?»

³⁴ Bayihi ba boole bafutili: «Pfumu li na nzala a hyo.»

³⁵ Na bo baabitili Yisu ibubuuru. Bo baabwahi biyunga bya bo ŋa yulu iboodi, na baakumbisi Yisu mu uvata ŋa yulu hyo.

³⁶ Ŋa nde hakabita ibubuuru, baatu baakayala biyunga bya bo mu nzila.

³⁷ Yisu ayato hupedu musyenge a Yeruselemi. Nzila yi nde haba, ni yi yakakulamana isyelo hya Olive. Konge bayihi boosi, hutso a kinya, yakayusa Nzambi mu ndaha yi mifudi, mu toni bipadi bi bo baamoni.

³⁸ Bo baakaleele: «Nyaha Pfumu Nzambi asyeme pfumu a bisu wuli mu uya mu nduhi a nde! Hyenze ŋa toto, na muyusu huli Nzambi hu hati mayulu.»

³⁹ Mwana kabu li Bafarisi, ŋa hati la konge baaleeli Yisu: «Mulongisi, liha bayihi ba we kele.»

⁴⁰ Na Yisu afutili bo: «Me ndeele benu, tso bo badibuhi minywa, mamanya sa masa muyali!»

Yisu alili mu toni a bisu Yeruselemi

⁴¹ Bu Yisu hakayasusaha hupedu musyenge, nde atalila Yeruselemi, abwi mu ulila mu toni a nde.

⁴² Nde aleeli: «Tso we kaka beedi ayaba buni we usoolo hyenze loloyi! Ka mu tangu moyi, hyo hyasweme ŋa miisu ma we.

⁴³ Bilumbu sa biya, bambeene ba we sa bayadiinga we na utelemese bikahu mu manzila ma we. Bo bu uvinyala na uswekemese we matsyelo moosi.

⁴⁴ Bo sa banyihula we woosi, we na bisu bula boosi. Bo a busiisa ŋa hati la we, manya ŋa yulu a manya ve. Mu toni ati, we a hatsikaha tangu yi Nzambi hu uyakumbasa we ve.»

Yisu abingi banga mumbungu ba baaba mu litandala la nzo a Nzambi

⁴⁵ Yisu akoti mu litandala la nzo a Nzambi, na nde abwi mu ubinga banga mumbungu.

⁴⁶ Nde aleeli bo: «Mambu ma Ngidi mali mu uleele bu: “Nzo a me yili nzo lisambulu.” Ka benu laamiikitusa yo iswemili hya biibi.»

⁴⁷ Yisu akabaalongese bilumbu byosi mu litandala la nzo a Nzambi. Bakuutu ba banganga ba Nzambi, balongisi ba mikele na bakuutu ba bibandu, baakasaha uduba nde.

⁴⁸ Ka bo a baabahi nzila ve, mu toni ati baatu baakasilasa ma nde hakaleele na isuusi hyosi.