Luuka 11 - Musamu wu Mubwe

Yisu li mu ulongese baatu usambila Nzambi

¹ Ilumbu imosi, Yisu akasambila ŋa mbuha mosi. Bu nde hamani, muyihi a nde mumosi ni uleele nde: «Pfumu, longese bisu usambila Nzambi, we bu Yowani halongisi bayihi ba nde.»

² Yisu ni uleele bo: «Ŋa benu li baasambila, baaleelaani bu: “Taata, nyaha nduhi a we bakiinza, nyaha Ipfumu hya we hibaaya!

³ Byudya bya bisu bya pasi tsuhu, va bisu loloyi.

⁴ Nyahula masumu ma bisu, we bu bisu ka libaasa kolo-kolo, huli ba bubaavanga bisu mamabi, kaakala bisu mu ukoto mu mamabi.”»

⁵ Yisu abweleele bo: «Buhuli muutu mumosi mu benu li na mbaahi, na nde yamono nde huhahati a busi na uleele nde: “Mbaahi a me, soombese me mapa matatu.

⁶ Mu toni ati, mumosi mu bambaahi ba me miimata hu mudyenge miya huli me, me andi na hi me upa nde ve.”

⁷ Na tso wu uli huhati a nzo futili mbaahi a nde: “A kwamisa me ve, bunuubu munywa a nzo baamiidibuha, bisu a baana ba me laaka tolo, me a utwala usuuha mu uyava we mapa ve.”

⁸ Me ndeele benu, nde a huteleme mu uyava nde mo mu toni bumbaahi bwa bo ve. Ka nde sa ateleme mu toni mukebudu a nde, na nde sa ava nde byosi bi nde ali na byo nzala.

⁹ Na me ndi mu undeele benu: Vondwani, na benu sa liyaka; sahani, na benu sa lisoolo; doodwani, na sa badibula benu munywa a nzo.

¹⁰ Mu toni ati, pasi nde wu ubaavondo, ubaayaka; woosi wu ubaasaha, ubaasoolo; bu baadibula munywa a nzo huli wu li mu udoodo.

¹¹ Ki taata ŋa hati la benu, tso mwana a nde li mu uvondo nde tswi, nde uva nde taadi na myangala myosi?

¹² Buve tso nde vondi nde ki, nde sa ava nde ngeenge?

¹³ Ni mu buuna, tso benu ba lili banga bubi, benu li yaabi uva baana ba benu bisiha bibibwe. Tandisini a Taata wa hu yulu, buni nde hu uveleva Livupu la Ngidi huli boosi ba bali mu uvondo nde lo!»

Yisu abeelusi iduka imosi nga matengo

¹⁴ Yisu abingi tengo li laasiidi muutu mumosi buduka. Bu tengo laapali, muutu mo ayambili, na konge a baatu yaba hutso a kimwili.

¹⁵ Ka bakima ŋa hati la bo baaleeli: «Mu matwala ma Belesebuli, pfumu matengo, nde ubaabinga matengo!»

¹⁶ Na, bakima mu umese nde, mu umoono bu nde husa: baakavondo nde iliimbu hi humwese ti Nzambi ni wu atsindaha nde.

¹⁷ Ka Yisu bu haba hayaba matsimi ma bo, nde ni uleele bo: «Pasi ipfumu hi baatu bali na burandu ŋa hati la bo, hi baafwa mu utsamuha; manzo ma hyo ni ubaasyengomono ŋa yulu a mana.

¹⁸ Tso Satana kabuhi na nde mo, ipfumu hya nde utwala ukwilala ve. Ka benu lili mu uleele ti me umbambinga matengo mu toni a Belesebuli wu ubaava me matwala.

¹⁹ Tso mu mbuli me umbambinga mo mu Belesebuli, ka bayihi ba benu, na ubaava bo matwala mu ubingasa mo? Ni mu buuna, bayihi ba benu sa baba bo mwakulu baatsundisi ba benu.

²⁰ Ka tso mu matwala ma Nzambi me ndi mu umbinga matengo, Ipfumu hya Nzambi ka hyamiiyato nate huli benu.

²¹ Bu muutu nga mifudi na bilwanili bya nde ubaakeelese nzo a nde, bya mu nzo a nde byosi bili ŋa mbuha ya tsiki.

²² Ka tso muutu wu aluta nde mifudi yalwanisa nde na biingili nde, nde sa apatula nde bilwanili byosi bi nde abeedi hasa hiitu. Na nde sa apatula bya nde byosi na ukaba byo.

²³ Woosi wu avele itwadi na me li muboho a me. Woosi wu aveleyakumbasa me mu ukuukaha baatu, nde li mu utsala.

²⁴ Ŋa livupu li libi limiipala mu muutu, lo libaayene yayuhu mu mambuha ma kumu a nzala, mu usaha ivumili. Bu lo livelibaha ivumili, lo ka ubaaleele: “Me ka ufutaha hu nzo yi me apali mu yo.”

²⁵ Ŋa lo lufutaha hu nzo mooyina, lo sa libiisa nzo yi baakombolo, yi baavanga bubwe.

²⁶ Na lo libaayene mu uyavolo mavupu mamabi tsaambu makima ma maluta lo bukanyi, na lo libaayafutaha na mo. Mo mabaakoto mu nzo na ukwilala muuna. Na idiingu hya tsyelele hya muutu mowunuwu hibaafula pasi na hya tsomi.»

²⁷ Ŋa Yisu hakaleele buuna, mukaasu mumosi afulihi ŋa hati la konge a baatu: «Kinya yili na mukaasu wu abuta we na wu anywisi we mabeelo!»

²⁸ Ka Yisu afutili: «Kinya homo yili na ba bali mu uyuha mambu ma Nzambi na ba bubaasalila mo.»

Baatu baakavondo ti Yisu amwese bo iliimbu

²⁹ Bu makonge ma baatu maakakula mu muvanga a Yisu, nde abweleele: «Baatu ba tungi moli, bali baatu bababi. Bo bali mu usaha iliimbu hi humwese ti Nzambi ni wu atsindihi me. Ni mu buuna, a busiila bo iliimbu ikima ve ŋa yulu a hi mumbihuli Yonasi.

³⁰ We bu Yonasi haba iliimbu huli bisu Niniive, ni buuna ka, Mwana a Muutu sa aba iliimbu mu baatu ba loloyi.

³¹ Mu ilumbu hya tsundusu, mutumi wu mukaasu hu tsi a Sude sa ateleme ŋa busu bwa baatu ba tungi moli, na sa akeese bo. Nde husa buuna, mu toni ati nde amati hu matsi ma mafula lala ŋa toto. Nde uya mu uyayuha mambu ma maaluula mu buyedi bu mutumi Soolomo. Ka ŋaniŋa huli na nde wuuna wu aluta Soolomo.

³² Mu ilumbu hya tsundusu, baatu ba Niniive sa bateleme ŋa busu bwa baatu ba tungi moli, na sa bakeese bo. Mu toni ati baatu ba tsi a Niniive baasobi mbiili a bo, mu toni a ndongisili a Yonasi. Ka ŋaniŋa huli na nde wuuna wu aluta Yonasi!

³³ A huli na muutu wu ubabaangisa mwinda mu ususa nde ŋa mbuha yi yasweme ve, buve hutso a poonzi. Ka bubaasuusa nde ŋa yulu isuusili hya nde, mana babali mu ukoto mu nzo, bamono liyalala.

³⁴ Diisu la we lili mwinda a nyutu a we. Tso diisu la we lili polo, nyutu a we yoosi yili hutso liyalala; ka tso diisu la we lili li laabeele, nyutu a we yili hutso a piipidi.

³⁵ Ni mu buuna, baakele, mana liyalala li lili mu we a liyilasa we busi.

³⁶ Bumosi ka, tso nyutu a we yoosi yili hutso liyalala, hwavele inama imosi hutso a piipidi, yo yoosi sa yiba hutso liyalala. Nyutu a we, sa yiba we bu mwinda huyalusa we mu liyalala la nde.»

Yisu asyembi Bafarisi na Milongisi mi mikele

³⁷ Bu Yisu hamani uyambila, Mufarisi mumosi avondi nde mu uyadya huli nde. Yisu akoti na atsahili mu udya ilaambu hi itwadi.

³⁸ Mufarisi akimuhi bu nde hamoni ti Yisu a haswahi myoho ve tswamina mu udya.

³⁹ Pfumu ni uleele huli nde: «Mono buni benu lili, benu Bafarisi: benu libaaswaha mu utsyemese imbadi hi mambuungu na bikombe bya benu, ka hutso mitima mya benu hwaluula mu nzala uyiba na mamabi.

⁴⁰ Benu a lili na buyedi ve! Bee Nzambi wu avanga mbadi a havanga ka hati ve?

⁴¹ Ni mu buuna, baavaani biyaha bisiha biina bi bili hutso mambungu na bikombe bya benu. Na byosi sa biba bi byatsyeme huli benu.

⁴² Lingebe huli benu Bafarisi! Mu toni ati, benu libaava Nzambi ikuuku hya kuumi-kuumi hya bi benu libaakuna hutso matsyehe ma benu we lenge, banduungu ba mbala, na paa misooso mya pila mu pila. Ka benu li baatimba mbiili yimbwe na litondo la Nzambi: biina ti ni bisiha bya tsiki bi benu lafwana usalila, hwavele uvusaana bina.

⁴³ Lingebe huli benu Bafarisi! Benu laatondo bitsiha bi byafula umonehele mu manzo ma masambulu ma Bayudaayo. Benu ubaatondo ti baava benu mabwehe ma maaluta butsitu ŋa miisu ma baatu.

⁴⁴ Lingebe huli benu! Mu toni ati benu lili we bidunda bi baaveletsikaha, na baatu bu baasumaha ŋa bubaadyata byo hwavele uyaba.»

⁴⁵ Ngeele mikele mumosi ni uleele Yisu: «Mulongisi, ŋa we li mu utoyo buuna, we paa bisu li mu utuha!»

⁴⁶ Yisu afutili: «Lingebe ka huli benu bangeele ba mikele! Benu libaakwiha baatu mipfuna mi myaleme mu ubita. Ka mipfuna momiina benu mwakulu a libaabembe myo mu ukuumbasa bo mu utsyete tso mu mulembo a benu mumosi ve.

⁴⁷ Lingebe huli benu! Mu toni ati benu libaatuunga mangila ma mimbihuli, mimbihuli mi bataata ba benu baadubi.

⁴⁸ Ni buuna benu lili mu umwese ti benu lili mu usilasa mavanga ma bakaaha ba benu. Mu toni ati bo baadubi mimbihuli, na benu, benu lili mu utuunga mangila ma myo.

⁴⁹ Ni mu buuna Nzambi mu bungeele bwa nde aleeli: “Me tsa tsindaha bo mimbihuli mya me, na bilumbi bya me. Baatu sa baduba bakima ŋa hati la bo, na sa batsuta bakima.”

⁵⁰ Ni mu buuna, baatu ba tangu yi, Nzambi ukwiha bo mupfuna mapasi ma lipfu li mimbihuli myosi umata paangili a tsi.

⁵¹ Nzambi ukwiha bo mupfuna umata lipfu la Abeli nate la Zakariya, wu baadubi ŋa hati la diiku la tsuhili bungodu na nzo a Nzambi. Eeye, me ndi mu utsilasa benu, baatu ba tangu yi sa bafuta mapasi ma, mu toni mapfu moma.

⁵² Lingebe huli benu, bangeele ba mikele! Mu toni ati benu lamaasa tsaafi a ndibulili munywa a nzo a nzaabili: benu mwakulu a libaakoto ve, na benu libaakala ukoto huli boosi ba bali na nzala ukoto.»

⁵³ Ŋa Yisu hapali mu nzo moyina, bangeele ba mikele na Bafarisi baabahili nde kesi yi mifudi. Bo baabwi mu uva nde byuhu mu misamu mya pila mu pila.

⁵⁴ Bo baatehili nde myeto mu uyehele usoolo dyambu li libi mu ma nde hakaleele.