Luuka 10 - Musamu wu Mubwe

Isalu hi bayihi maku tsaambu na boole

¹ Ŋa yulu ŋana, Pfumu asooli bayihi maku tsaambu na boole, na a tsindihi bo boole-boole mu misyenge myosi na mu mambuha ma nde mo hakayene.

² Nde akaleele bo: «Ngundu yili yinene, ka basali bali babakeehe. Ni mu buuna, vondwani Pfumu a ngundu, mana nde atsindaha basali mu uyakoolo mbutu mu ngundu a nde.

³ Yenaani! Me ndi mu utsindaha benu we baana ba mameme ŋa hati la miinzi.

⁴ A libita paala ve, tso koome, tso bikoodi, na a liva bwehe huli pasi muutu mu nzila ve.

⁵ Mu pasi nzo yi benu lu ukoto, maaleelaani ti: “Hyenze hiba mu nzo moyi.”

⁶ Mu nzo yi benu lu ukoto, tso muutu nga hyenze li muuna, hyenze hya benu sa hiba mu nde. Tso a buuna ve, hyo sa hiyafutaha huli benu mo.

⁷ Tsahalaani mu nzo moyina, dyanaani na nywanaani bi bu uva benu. Mu toni ati, ngamba afwana na pfuta a nde. A lipala mu nzo moyina ve, mu yabwamina mu nzo kima.

⁸ Ŋa benu likoti mu musyenge wu buyaka benu, dyanaani byosi bi bu uva benu.

⁹ Beeloswani babeedu ba bu uba mu musyenge mowuna, na leelaani huli boosi: “Nzambi aka bebele mu uyabyala ŋa yulu a benu.”

¹⁰ Ka mu pasi musyenge wu benu lu ukoto na hu bu uveleyaka benu, palaani mu maluuha, na leelaani:

¹¹ “Bisu limikubalala benu paa mufundu musyenge a benu wu amiikatita mu miilu mya bisu, mu uyibusa benu. Ka yabaani bu, Nzambi aka bebele mu uyabyala ŋa yulu a benu.”

¹² Me ndeele benu ti, mu ilumbu hi Nzambi hutsundasa musyenge mowuna, tsyembili a baatu mobaana, sa yifulala ya bisu Sodoomo.

Misyenge mi myavelesa imiinu

¹³ Lingebe huli benu bisu Korazini! Lingebe huli bisu Betesayida! Benu sa liba mu lingebe mu toni ati, tso bipadi byosi bi baasiidi ŋa hati la benu baayasa byo huli bisu Tiilo na bisu Sidoni. Kini basiidi buuna huli bo, kini umata beleve, baatu ba misyenge momina baamiikingula buyedi. Bo baakiimwese lingebe laa bo ŋa busu bwa Nzambi mu ulwata basaahu na uyobo mufutu.

¹⁴ Ni mu buuna, mu ilumbu hya tsundusu, tsyembili yi benu luuyaka yi uvyohelele ya baatu ba misyenge mya Tiilo na Sidoni.

¹⁵ Benu bisu Kapernahumi! Benu libaatsima ti Nzambi sa asyenolo benu te hu yulu? Naana! A buna ve. Sa bakulamasa benu nate hu tsi a babaakwa.»

¹⁶ Nde abweleele huli bayihi ba nde: «Muutu wu uyuhala benu, li mu uyuhala me. Wuli mu unyasula benu, li mu unyasula Nzambi wu atsindaha me.»

Maku tsambu na bayihi boole baayafutaha huli Yisu

¹⁷ Bayihi maku tsambu na boole baayafutaha mu kinya, na ubaaleele: «Pfumu, paa matengo masiingili bisu, bu likabinga mo mu nduhi a we!»

¹⁸ Yisu afutili bo: «Me amoni Satana wu amati hu yulu na abwidi ŋa toto we muvedyavedi.

¹⁹ Yuhani! Me apiidi benu lituma li udyata ŋa yulu bataadi na bangenge, na uhesolo matwala moosi ma muboho. A huli na isiha hi hyutwala ukwamisa benu ve.

²⁰ Ka a lisa muyali bu mavupu mali mu usiingala benu ve, ka saani muyali bu Nzambi hasonehe manduhi ma benu hu mayulu.»

Yisu li mu ufutala matondo huli Taata a nde

²¹ Ndulu mu tangu moyina, Livupu la Ngidi laluusi Yisu mu kinya, na nde afulihi: «Taata, Pfumu a yulu na toto, me ndi mu uyusa we mu toni ati we miimwese huli bikenyi mambu ma we avelimwese huli biyedi. Eye, Taata, ni buuna bu we mwakulu atondo.

²² Taata a me aviidi me byosi ŋa myoho mya me. A huli na muutu wu uyaba Mwana ni na, tso a ni Taata ve. Na muutu a hayaba Taata ni na, tso a ni Mwana ve, na huli nde wuna ka wu Mwana atondi usaangula lo.»

²³ Titswene, Yisu akinguhi huli bayihi ba nde na nde aleeli ndulu huli bo: «Kinya huli benu ba lili mu umono mambu ma benu lili mu umono!

²⁴ Ni mu buuna me ndi mu undeele benu, mimbihuli mimilahi na bapfumu baatondi umono mambu ma benu lili mu umono, ka bo a baamono mo ve. Bo baatondi ka uyuha mambu ma benu lili mu uyuha, ka bo a baayuhi mo ve.»

Kuma a musi Samariya wu mubwe

²⁵ Ngeele mikele mumosi, atelimi na afuuli Yisu mu uyebe nde: «Mulongisi, hima me apfwana usa mu ubaha monyi wu bilima na bilima?»

²⁶ Yisu ka afuuli nde: «Buni baasonehe mu mikele? Hima we li mu utaanga muuna?»

²⁷ Ngeele mikele afutili: «We sa tondo Pfumu Nzambi a we mu mutima a we woosi. Mu muvumu a we woosi, mu mifudi mya we myosi, na mu matsimi ma we moosi. We sa tondo muutu naawe we we mwakulu.»

²⁸ Yisu aleeli nde: «We futili bubwe! Vanga buuna, na we sa baha monyi.»

²⁹ Ka Ngeele mikele bu hasahi umwese ti hyuhu hya nde hyakuha, nde afuuli Yisu: «Muutu naawe a me na?»

³⁰ Yisu afutili nde: «Bahala limosi lakamata hu musyenge a Yeruselemi mu ukulamana hu musyenge a Yeriko. Bataani baabwi mu nde, bo baapatuli nde byosi bi nde haba na byo. Titswene bu bo baabeeti nde, baabati, na bo baatimbi nde hutso a nyambu.

³¹ Nganga a Nzambi mumosi wu aba mu uvyoho mu nzila moyina, bu hamoni bahala mo, amiinguhi na avyohi hwa nde.

³² Mulevi ka mumosi wu ayato ŋana, bu hamoni, asabuhi nzila na avyohi hwa nde.

³³ Ka musi Samariya mumosi wu akadyenge, bu hayato ŋa hu aba bahala molina, bu hamoni lo, akwili lo lingebe.

³⁴ Nde ayasusaha, na apupili mbuma maadi na malamu, na akuti yo birende. Titswene nde avaatisi nde ŋa yulu a buuru a nde mwakulu, abiti nde hu nzo a byenyi, na akumbisi nde mu myosi.

³⁵ Ŋa ngwali, nde apalisi makuta moole, aviidi huli pfumu a nzo, na aleeli: “Kumbasa nde bubwe, bi we usalila ŋa yulu mu toni a nde, me tsa pfutala we byo ŋa me unzapfutaha.”»

³⁶ Yisu abweleele: «Mu we, mu bo ba batatu na abeedi “muutu naawe” a muutu wu bataani baabeeti?»

³⁷ Ngeele mikele ni ufutala nde ti: «Wuna wa kwili nde lingebe.» Na Yisu ni uleele nde: «Yene, na we ka yasa buuna.»

Mariya na Malata bamiiyaka Yisu

³⁸ Bu Yisu haba mu nzila na bayihi ba nde, nde akoti ŋa bula bumosi. Ni huuna mukaasu mumosi nduhi Malata, ayaki nde mu nzo a nde.

³⁹ Nde aba na muhehe nduhi Mariya. Wu ayatsahala ŋa pedu a miilu mya Pfumu, mu uyuha mambu ma nde.

⁴⁰ Malata aba isalu hya miifulala, mu uvangimasa byudya. Ni mu buuna nde hayidi na aleeli: «Pfumu, a huli mu umwese we pasi bu mwana a ngu a me amiisiisa me siha mu ubasa byudya ve? Leele nde ayakumbasa me.»

⁴¹ Pfumu afutili nde: «Malata, Malata, we li na matsimi helini-helini, we li mu ukina matsada mu bisiha bibilahi.

⁴² Ka isiha himosi hiluti tsalu. Mariya amiisoolo uvanga lilibwe, li bu uvelepatula nde.»