Luuka 1 - Musamu wu Mubwe

Kotili Muhanda

¹ Ngeele Tehofile, baatu babalahi basonihi moosi ma maavyohi ŋa hati la bisu.

² Baatu mobaana ba baasonihi mambu momaana, bo bali bambangi umata mbandu. Bambangi mobaana, baakituhi basalili ba baakalongese mambu ma Nzambi.

³ Ni mu buuna, hufwani huli me kaka mu usonehele we mambu we bu mo maavangimi umata beleve, humbisa a hu me atsahi mo mu bukuhu.

⁴ Me tsiidi buuna, mana we yaba imbuli hya ndongisili yi we ayaki.

Pofi ayabisi mbutili a Yowani Mutondihi

⁵ Mu tangu a Eloode mutumi a tsi a Yuda, hwaba na nganga a Nzambi wu baakateele Zakariya. Nde aba wu a kabu li banganga ba Nzambi la Abiya. Mukadi a nde wu baakateele Lisabeti, aba wu imbisa hya Aloni.

⁶ Bo baboole baaba baasungama ŋa busu bwa Nzambi, na baakaduukala mikele mya Pfumu na tumili a nde we bu hwafwana.

⁷ Ka bo a baaba na mwana ve, mu toni ati Lisabeti aba inguma, na bo abeedi aka binunu.

⁸ Ilumbu imosi, Zakariya akasa isalu hya nde hi bunganga bwa Nzambi, ŋa busu bwa Nzambi, mu toni ati aba bilumbu bya kabu la bo mu usala.

⁹ We bu hwaba ipfu hi isalu hi banganga ba Nzambi, batiidi ngodo mu usoolo nde mu ukoto mu nzo a Pfumu, na mu utsuha paha a tsulu yimbwe.

¹⁰ Mu tangu yi Zakariya hakatsuha bungodu bwa paha a tsulu yimbwe, baatu babalahi baaba mu usambila Nzambi hu mbadi.

¹¹ Mu tangu moyina, pofi a Pfumu ayamonehele ŋa busu bwa Zakariya. Pofi mo aba ateleme ŋa mbahala a metse ma paha a tsulu yimbwe.

¹² Bu Zakariya hamoni pofi, nde akimuhi na aluuli mu boomo.

¹³ Ka pofi aleeli nde: «Zakariya, a ba na boomo ve. Nzambi miyuha lisambulu la we: Mukadi a we Lisabeti ubutala we mwana wa bahala, na we uluha nde nduhi Yowani.

¹⁴ Buuna Yowani uba huli we dyambu la kinya yindahi, na musangu. Mu toni a mbutili a nde, babalahi bu umono kinya.

¹⁵ Nde uba wu munene ŋa busu bwa Pfumu. Nde a hunywa vinye ve, tso pasi malamu ma mu ubaakolese ve. Nde uluula mu Livupu la Ngidi, ubandiha mu tso a monyi a ngu a nde.

¹⁶ Ni nde Yowani, wu ubwefutala bisu Isereli babalahi, huli Pfumu Nzambi a bo.

¹⁷ Nde uyene ŋa busu bwa Nzambi mu livupu na mifudi bi mumbihuli Eliya. Nde unongese mitima mi bataata na mya baana. Nde ufutala baatu ba baaveleyuhala Nzambi, mu uba ba baasungama. Na nde uvanga ibandu hya Pfumu hi hyafwana.»

¹⁸ Zakariya aleeli huli pofi: «Buni me umono imbuli? Mu toni ati, me na mukadi a me, laaka binunu.»

¹⁹ Pofi afutili nde: «Me ni Ngabiyeli, wu ubaateleme ŋa busu bwa Nzambi mu ukumbasa nde. Nzambi miitsindaha me mu umohese we, na uyabisa we musamu mo wunuwu, wu mubwe.

²⁰ Ka bu we velisa hiitu ti mambu ma me ndeli we mu uvangama, we uba iduka. We a ubwetwala uyambila ve, nate mu ilumbu hi mo mu uvangama. Mambu mo manima mu uvangama mu tangu yi yafwana.»

²¹ Mu tangu moyina, baatu baakakeele Zakariya, na baakimuhi bu nde hadiingi mu nzo a Nzambi.

²² Bu hapali mu nzo a Nzambi, nde a hatwali uyambila na bo ve. Ka nde akavese bo, na nde akwilili buduka. Na bo baayabi ti nde amoni imono-miisu mu nzo a Nzambi.

²³ Bu bilumbu bya nde bi isalu hya Pfumu byafwidi, nde afutihi hu nzo a nde.

²⁴ Mwana tangu bu yavyohi, mukadi a nde Lisabeti abahi yimi. Mukadi mo, aswemi mu batsungi batanu, na akaleele:

²⁵ «Mono ma Pfumu hamiisiila me. Mu tangu yi, nde miisukasa ma maakamwese me tsonyi ŋa busu bwa baatu boosi.»

Pofi ayabisi mbutili a Yisu

²⁶ Bu yimi la Lisabeti laakuhisi batsungi basamunu, Nzambi atsindihi pofi wa nduhi Ngabiyeli hu Nazareti, musyenge a Ngalili.

²⁷ Nde atsindihi pofi huli numba yi baakateele Mariya. Nde aba mutangula a Yosefi, muutu wu imbisa hya pfumu Davidi.

²⁸ Pofi akoti huli nde na aleeli: «Bwehe! Ba mu kinya mu toni ati, Pfumu amiisa we hyese, na nde li na we.»

²⁹ Mariya bu hayuhi mambu momaana, akimuhi hu ulahi na akafuula hutso mutima a nde: «Ki pila a bwehe bwa bunuubu?»

³⁰ Pofi aleeli Mariya: «A ba na boomo ve! Mu toni ati, we miibaha hyese ŋa busu bwa Nzambi.

³¹ Mono, we ubaha yimi, we ubuta mwana wa bahala, na we uluha nde nduhi Yisu.

³² Nde uba wu munene, na bu ukaateele nde Mwana a Nzambi a Pungu. Pfumu Nzambi uva nde itsiha hi ipfumu hya Davidi, kaaha a nde.

³³ Nde utuma ŋa yulu ibandu hya Yakobi mu bilima na bilima, Ipfumu hya nde a hyufwa ve.»

³⁴ Mariya aleeli huli pofi: «Buni mambu momanima mu utswiha? Mu toni ati, me a hanzaba bahala ve!»

³⁵ Pofi afutili nde: «Livupu la Ngidi lu ukulamana ŋa yulu a we, na matwala ma Nzambi a Pungu mu ufuuha we mu posi a mo. Ni mu buuna, mwana wa ngidi wu bu ubuta, sa bateele nde Mwana a Nzambi.»

³⁶ «Mono, Lisabeti ikuta hya we kaka amiibaha yimi, mu ubuta mwana wa bahala hu bununu bwa nde. Nde wu baakateele inguma, yimi laaka batsungi basamunu.

³⁷ Mu toni ati, Nzambi a baakondo dyambu ve.»

³⁸ Mariya aleeli: «Me ndi musalili a Pfumu wu mukasu. Nyaha mambu ma we mavangama ŋa yulu a me.» Ka buuna, pofi asiisi nde.

Mariya ayeni hu nzo a Lisabeti

³⁹ Mu matsuhu momaana, Mariya atelimi na ayeni mawasa hu musyenge wu bisyelo wa Yuda.

⁴⁰ Ni huuna nde hakoti mu nzo a Zakariya, na asuuli Lisabeti.

⁴¹ Mu tangu yi Lisabeti hayuhi bwehe bwa Mariya, mwana anyingimi mutso a monyi a nde. Lisabeti aluuli mu Livupu la Ngidi,

⁴² na afulihi mu mifudi: «Nzambi asyeme we hwafula bakaasu boosi, na mwana wu we ubuta li wu baasyeme.

⁴³ Buni hutwala uba ti ngu a Pfumu a me aya huli me?

⁴⁴ Me ndeeli buuna mu toni ati, mu tangu yi me nzuhi bwehe bwa we mu matswi ma me, mwana nyingimi mu kinya mutso a monyi a me.

⁴⁵ Kinya yili na we mukasu wu siidi hiitu, ti Pfumu sa avangimasa ma nde hayabisi we.»

Dimbu la Mariya

⁴⁶ Titswene Mariya aleeli: «Muvumu a me yusa Pfumu,

⁴⁷ na livupu la me lili mu kinya mu Nzambi, Muyobili a me.

⁴⁸ Mu toni ati, nde amiisusa miisu ŋa yulu musalili a nde wu mukasu wu akulamana. Eye, bunuubu, baatu ba matungi moosi bu ukaaleele me: nga hyese.

⁴⁹ Mu toni ati, Nzambi nga Matwala miisa me mavanga mamanene. Nduhi a nde yili ya ngidi.

⁵⁰ Kwili lingebe a Nzambi, yi baaba tangu yoosi mu matungi na matungi. Nde ubaava yo huli boosi ba bubaakiinza nde.

⁵¹ Nde miimwese mifudi mya hoho hwa nde. Nde miitsala boosi ba babeedi na matsimi ma isayi mutso mitima mya bo.

⁵² Nde miikulamasa banga matwala ŋa yulu makiti ma bo ma ipfumu, ka nde miisyenolo ba baakulamana.

⁵³ Banga nzala, nde miiywatisa bo mu mamabwe, ka miifutala bisina myoho bunyanga.

⁵⁴ Nzambi amiiyobolo Isereli musalili a nde, a havusana ba bubaasalila nde ukwila lingebe ve.

⁵⁵ Ni mu buuna, Nzambi hamisa lahi huli bakaaha ba bisu, huli Abrahami na imbisa hya nde mu bilima na bilima.»

⁵⁶ Mariya atsahili huli Lisabeti batsungi bebele na batatu, na nde afutihi hu bula bwa nde.

Mbutili na ketili a Yowani Mutondihi

⁵⁷ Tangu Lisabeti yi ubuta bu yatoodi, nde abuti mwana wa bahala.

⁵⁸ Tungi la bula, na baatu ba ibandu hya Lisabeti, baayuhi ti Pfumu amwesi kwili a nde lingebe huli nde. Na bo baasangili itwadi na nde.

⁵⁹ Bu mwana hakwasi bilumbu pombo, baatu baayidi hu ukete nde. Bo baakatondo uteele nde mu nduhi a taata a nde, Zakariya.

⁶⁰ Ka ngu a nde aleeli: «Naana, bu uteele nde: Yowani.»

⁶¹ Bo baabisi na baaleeli nde: «Mu ikuta hya we, a huli na muutu nga nduhi moyina ve.»

⁶² Na mu bilimbu, bo baafuuli taata a nde Zakariya, mu uyaba ki nduhi nde atondi uva mwana.

⁶³ Zakariya avondi itini hya baya mu usonehe, na nde asonihi: «Nduhi a nde: Yowani.» Na baatu boosi baakimuhi.

⁶⁴ Mawasa-mawasa, ndaha a nde yadibumi. Zakariya akatoyo na uyusa Nzambi.

⁶⁵ Baatu boosi ba ibingi mohiina baaba na boomo, na ba itanzi hi bisyelo bya Yuda, baakayambila mu toni a moosi ma maabwidi.

⁶⁶ Boosi ba baakayuha maana, baakakeelese mo hutso mitima, na baakaleele: «Imwa-mwana mohinihi na hu uba?» Hoho hwa Pfumu mu mbuli, hwaba ŋa yulu a nde.

Dimbu la Zakariya

⁶⁷ Zakariya, taata a Yowani, aluuli mu Livupu la Ngidi na abihuli bunuubu:

⁶⁸ «Muyusu huli Pfumu Nzambi mabuli ma Isereli, mu toni ati, nde ayidi mu uyobolo baatu ba nde.

⁶⁹ Na bu nde abehili bisu Muyobili nga matwala, wu imbisa hya Davidi, musalili a nde.

⁷⁰ Ni maana ma nde hayabisi mu minywa mi mimbihuli mya nde mya ngidi, umata matangu ma maavyohi.

⁷¹ Nde asiidi lahi ti, nde uyobolo bisu mu myoho mi baboho ba bisu, na mu matwala ma babali mu ubelele bisu.

⁷² Nzambi amwesi kwili a nde lingebe huli bakaaha ba bisu. Na nde ayibwili monyi mu lahi la nde la ngidi.

⁷³ Ni mulabu wu nde halabi huli Abrahami, kaaha a bisu.

⁷⁴ Nde ayobili bisu ŋa myoho mi baboho ba bisu, mana bisu libaasalila nde hwavele a boomo,

⁷⁵ napa mu bungidi na butsiitsa bu bwafwana mu nde. Bisu libaasalila nde mu bilumbu byosi bi idiingu hya bisu.

⁷⁶ Na we, mwana a me, bu uteele we mumbihuli a Nzambi a Pungu, mu toni ati, we uteehele Pfumu mu uvangila nde nzila,

⁷⁷ mu uyabisa baatu ba nde ti nde uyobolo bo, mu umaasa masumu ma bo.

⁷⁸ Nzambi a bisu usa buuna, mu toni bunene bu lingebe la nde. Litondo moliina lu uba we ŋa nyangu ubaapala hu yulu, na umwedeme ŋa yulu a bisu.

⁷⁹ Nde kaka uyalusa ba bali mu pipidi na mu posi lipfu, mana babita bisu mu nzila a hyenze.»

⁸⁰ Ka Mwana akakula na uhwada mu livupu la nde. Nde akatsahala hutso a kumu, nate ilumbu hi nde hayamonehele ŋa busu bwa bisu Isereli.