Looma 9 - Musamu wu Mubwe

Nzambi na baatu ba nde hasoolo

¹ Ma me ndi mu undeele mali ma mbuli. Me a handi mu upfuta ve, mu toni ti me ndi itwadi na Kristo. Iluunzi hya me, itwadi na Livupu la Ngidi hili mu utiila me imbangi:

² mutima a me aluula mu lingebe li lilahi na mu munyongo wu avelefwa.

³ Eye, hukiiba bubwe ti, me mba wu baasinga, na wu atahuha na Kristo mu toni libwe la baana ba ngu ba me Bayudaayo.

⁴ Bo ni bisu Isereli: Nzambi akitusa bo baana ba nde. Nde amwese bo muyusu a nde, nde asiidi likoongo na bo, na aviidi bo Mikele, nde alahi bo buni bo baafwana uyuusa nde, na nde asiidi bo malahi.

⁵ Bo bali imbisa hi bakaaha ba bo, na Kristo mu bumuutu bwa nde li musi ibandu hya bo. Nde ni Nzambi wu li ŋa yulu a byosi. Nyaha ba baasyeme nde tangu yoosi. Amen!

Mambu ma Nzambi ma maavele na tsongo

⁶ Me a handi mu undeele ve ti Mambu ma Nzambi mali ma maavele na tsongo. Ka boosi ba bali imbisa hya Yakobi a bali bisu Isereli ba mbuli ve.

⁷ Ka a baana boosi ba Abrahami bali imbisa hya nde ve. Mu toni ati, Nzambi aleeli huli Abrahami ti: «Ni mu Isaaki we ubaha imbisa hi buuteele imbisa hi me atsi we lahi».

⁸ Pila mosi ti, a baana boosi ba imbisa hya Abrahaami mu musunya bali baana ba Nzambi ve. Ndulu baana ba baabuta we bu huli lahi, bali imbisa hya nde hya mbuli.

⁹ Nzambi aviidi lahi la nde bu: «Mu ilima hi hyuya me unzapfutaha. Na Sara ubuta mwana wa bahala.»

¹⁰ Titswene, hwaba bumosi kaka mu Lebeka wu abuti mavasa ndulu na bahala limosi Isaki, kaaha a bisu.

¹¹ Abeedi kini abaabuti baana mobaana ve, na bo kaka aba kini a baavangi dyambu li libwe tso li libi ve, ŋa Nzambi hayambili huli Lebeka, mana makani ma Nzambi, ma mali we bu huli tsolili a nde makwilala.

¹² Makani momaana mali tsolili a nde, mo mali mbila a nde huli baatu, ka a mu mavanga ma bo ve. Nzambi aleeli huli Lebeka: «Mukulu usalila muheehe a nde.»

¹³ We bu Mabaasonehe mali mu uleele: «Me atsooli Yakobi, ka me anyahi Esawu.»

¹⁴ Buuna, hima lu uleelaani? Nzambi a hali wu akuha ve? Naana!

¹⁵ Eye, nde aleeli huli Moose: «Me tsa kwila lingebe huli pasi wu me tondi ukwila lingebe. Me umba wu mubwe huli muutu wu me tondi ubweye na nde.»

¹⁶ Ni buuna, bubwe bwa Nzambi a buli mu litondo la muutu, buve mu mifudi mya nde ve. Ka ndulu huli Nzambi wu ubaakwila baatu lingebe.

¹⁷ Mu Mabaasonehe ma Ngidi, Nzambi li mu uleele huli mutumi a tsi a Ngipiti: «Me atsuusi we pfumu, mana me mwese we matwala ma me, na nduhi a me yiyabaana mu toto yoosi.»

¹⁸ Ni mu buuna, Nzambi ubaakwila lingebe huli muutu wu nde atondi ukwila lingebe na nde ubaatumbasa woosi wu nde atondi utumbasa.

Kesi na kwili lingebe bya Nzambi

¹⁹ Peleve we sa fuula me: «Ka muhima Nzambi ubaafwengele bisu? Na utwala ubisa mambu ma Nzambi ubaatondo?»

²⁰ Homo ati, we muutu, na we li, mu ukaakana na Nzambi? Nzungu a biinga utwala ufuula huli muyuhi a yo: «muhima we ayuha me bunuubu?»

²¹ Muyuhi ubaayuha mu liba, bu nde atondi uyuha. Mu liba moliina, nde utwala uyuha itehili hya tsongo buve hi hyavele a tsongo.

²² Nzambi akiitondo umwese kesi na uyaabisa matwala ma nde huli bitehili bikima. Ka nde akuundi na mukami wu munene, bitehili bya kesi, bi baavangi mu utsala.

²³ Eye, we lima ubweleele, tso Nzambi asiidi buuna, mu umwese busina bu muyusu a nde huli bitehili bi nde hakwili lingebe. Bitehili bi nde hatswamini uvangimasa mu toni muyusu a nde.

²⁴ Baatu mo ni bisu. Bisu ba nde hateeli, a ndulu ba ŋa hati li Bayudaayo ve, ka napa ba ŋa hati la babaavele Bayudaayo.

²⁵ Ni mambu momaana Nzambi ali mu uleele mu libuuku li mumbihuli Oseya: «Baatu ba baaba baavele ba ibandu hya me, me tsa teele bo ibandu hya a me, na tsi yi me akapeletondo, me tsa teele yo tsi yi me atondo huulahi.

²⁶ Na hu baaleeli bo: “Benu a lili ibandu hya me ve”, sa bateele bo baana ba Nzambi a monyi».

²⁷ Mu ma matali baatu ba Isereli, mumbihuli Esaya li mu uyaabisa: «Ka tso bisu Isereli bali bulahi we musyeŋunyu mu muvanga mubu, ka ndulu baatu hoole ba busaala ŋa hati la bo, bu uyoboho.

²⁸ Mambu ma Pfumu haleeli, nde sa avangimasa mo mosi mu mawasa ŋa toto.»

²⁹ Na we bu Esaya mo hatswamini uleele: «Tso Pfumu a tsi yoosi a haasiisi bisu mwa bateehudu ba imbisa hya benu ve, bisu laakinyambaana we musyenge a Sodoomo, na baakisyembe bisu we musyenge a Ngomooro!»

Nzambi ubaakuhasa ba bubaasa Yisu imiinu

³⁰ Hima luleele mu tangu yi? Bunuubu: baatu ba matsi makima ba baavelesaha uba ba butsiitsa ŋa busu bwa Nzambi, baaka ba butsiitsa ŋa busu bwa nde mu imiinu;

³¹ ka ba ibandu hya Isereli ba baakasaha uba ba butsiitsa ŋa miisu ma Nzambi mu likumbasa li Mikele, a baatwali ukiinza Mikele ve.

³² Mu ki toni? Mu toni ati bo a baakasaha uba ba butsiitsa mu imiinu ve, ka mu mavanga. Bo baayakubaana manya li libaabwisa baatu,

³³ we bu ma Baasonehe ma Ngidi mali mu uleele: «Me ndi mu utsusa mu musyenge a Syoni, manya li libaakubasa baatu baku, manya li linene li libaabwisa baatu. Ka pasi muutu wu usa imiinu mu nde, a humono tsonyi ve.»